Mubulo u “bebwa hafhu” u ambela kha vhushaka vhuswa vhune ha vha hone vhukati ha Mudzimu na muthu o bebwaho hafhu. (Yohane 3:3, 7) Mudzimu u nanga vhathu vho bebwaho hafhu uri vha vhe vhana vhawe. (Vharoma 8:15, 16; Vhagalata 4:5; 1 Yohane 3:1) Vhuimo havho vhu a shanduka nahone vha vha miraḓo ya muṱa wa Mudzimu.​—2 Vhakorinta 6:18.

Ndi ngani muthu a tshi bebwa hafhu?

 Yesu o ri: “Arali muthu a sa bebwa hafhu, a nga si kone u vhona Muvhuso wa Mudzimu.” (Yohane 3:3) U bebwa hafhu zwi ita uri muthu a lugele u vhusa na Kristo Muvhusoni wa Mudzimu. Wonoyo Muvhuso u vhusa u ṱaḓulu, nga zwenezwo, Bivhili i ṱalusa u ‘bebwa nga huswa’ sa u wana ifa ḽe vha “vhetshelwa ḽone ṱaḓulu.” (1 Petro 1:3, 4) Vho bebwaho hafhu vha na fulufhelo ḽa uri vha ḓo ‘vhusa vhoṱhe sa mahosi’ na Kristo.​—2 Timotheo 2:12; 2 Vhakorinta 1:21, 22.

Muthu u bebwa hani nga huswa?

 Musi Yesu a tshi haseledza nga ha enea mafhungo, o ri vhane vha bebwa hafhu vha fanela u “bebwa nga maḓi na muya.” (Yohane 3:5) Enea maipfi a ambela kha u lovhedzwa maḓini na nga muya mukhethwa.​—Mishumo 1:5; 2:1-4.

 Yesu o vha muthu wa u thoma u bebwa nga huswa. O lovhedzwa Mulamboni wa Yorodane, he Mudzimu a mu ḓodza (kana u mu lovhedza) nga muya mukhethwa. Musi Yesu a tshee kha ḽifhasi o bebwa hafhu a vha murwa wa Mudzimu wa muya e na fulufhelo ḽa u vhuyelela ṱaḓulu. (Marko 1:9-11) Mudzimu o ḓadzisa zwe a zwi fulufhedzisa nga u vusa Yesu sa tshivhumbiwa tsha muya.​—Mishumo 13:33.

 Vhaṅwe vho bebwaho hafhu vha thoma vha lovhedzwa maḓini vha sa athu u ḓodzwa nga muya mukhethwa. a (Mishumo 2:38, 41) Nga murahu ha zwenezwo vha vha na fulufhelo ḽo khwaṱhaho ḽa uri vha ḓo tshila ṱaḓulu, ḽine Mudzimu a ḓo ḽi ḓadzisa musi a tshi vha vusa.​—1 Vhakorinta 15:42-49.

Mazwifhi nga ha u bebwa hafhu

 Mazwifhi: Muthu u tou ḓinangela u bebwa hafhu.

 Ngoho: Vhathu vhoṱhe vha na tshibuli tsha u vha na vhushaka na Mudzimu na u tshidzwa. (1 Timotheo 2:3, 4; Yakobo 4:8) Naho zwo ralo, Mudzimu u nanga vhane vha ḓo bebwa nga huswa kana vhane a ḓo vha ḓodza nga muya mukhethwa. U ya nga Bivhili, u bebwa hafhu “a zwi ḓitiki nga ane a zwi tama kana ane a khou ita vhuḓidini vhuhulu, fhedzi zwi ḓitika nga Mudzimu.” (Vharoma 9:16) Mubulo u “bebwa hafhu” u nga dovha wa ṱalutshedzelwa nga uri u bebwa zwi tshi bva ṱaḓulu, zwine zwa khwaṱhisedza uri vhane vha bebwa hafhu vha nangiwa ṱaḓulu kana nga Mudzimu.