Musi Bivhili i tshi sumbedza phambano vhukati ha vhane vha vha kha vhurereli ha ngoho kana ha mazwifhi i ri: “Ni ḓo vha ḓivha nga mitshelo yavho. Naa vhathu vha a fula nḓirivhe kha zwiṱaka zwa mipfa, kana u fula mahuyu kha zwikhopha?” (Mateo 7:16) Samusi ni tshi kona u ṱalula munḓirivhe na miri ya mipfa nga zwine ya zwi aṋwa, ni nga kona u ṱalula vhurereli ha ngoho kha ha mazwifhi nga mitshelo yaho kana nga zwi tevhelaho.

1.   Vhurereli ha ngoho vhu funza zwo thewaho Bivhilini, hu si mihumbulo ya vhathu. (Yohane 4:24; 17:17) Zwenezwi zwi katela ngoho nga ha muya na fulufhelo ḽa vhutshilo vhu sa fheli Paradisoni kha ḽifhasi. (Psalme ya 37:29; Yesaya 35:5, 6; Hesekiele 18:4) Nahone vhu bvukulula vhurereli ha mazwifhi.—Mateo 15:9; 23:27, 28.

2.   Vhurereli ha ngoho vhu thusa vhathu uri vha ḓivhe Mudzimu na dzina ḽawe, Yehova. (Psalme ya 83:18; Yesaya 42:8; Yohane 17:3, 6) A vhu funzi uri Mudzimu ha pfesesei kana u kule na vhathu, nṱhani hazwo, vhu funza uri u ṱoḓa u vha na vhushaka ha tsini na riṋe.—Yakobo 4:8.

3.   Vhurereli ha ngoho vhu ombedzela uri Mudzimu u ri tshidza a tshi shumisa Yesu Kristo. (Mishumo 4:10, 12) Miraḓo yaho i thetshelesa milayo ya Yesu nahone i lwela u tevhela tsumbo yawe.—Yohane 13:15; 15:14.

4.   Vhurereli ha ngoho vhu dzhia Muvhuso wa Mudzimu sa ḽone fulufhelo ḽi ḽoṱhe ḽa vhathu. Miraḓo yaho i vhudza vhathu nga ha wonoyo Muvhuso.—Mateo 10:7; 24:14.

5.   Vhurereli ha ngoho vhu ṱuṱuwedza vhathu uri vha funane zwi tshi bva mbiluni. (Yohane 13:35) Vhu ri gudisa u ṱhonifha vhathu vhoṱhe hu sa londwi tsinde, mvelele, luambo na hune vha bva hone. (Mishumo 10:34, 35) Nga nṱhani ha uri vha funa vhaṅwe, a vha dzheneleli zwa dzinndwa.—Mixa 4:3; 1 Yohane 3:11, 12.

6.   Vhurereli ha ngoho a vhu na mufunzi ane a holelwa nahone miraḓo yaho a i na madzina a vhuimo ha nṱha.—Mateo 23:8-12; 1 Petro 5:2, 3.

7.   Vhurereli ha ngoho a vhu dzheneleli kha zwa politiki. (Yohane 17:16; 18:36) Naho zwo ralo, miraḓo yaho i a ṱhonifha na u thetshelesa mivhuso, u tendelana na mulayo wa Bivhili une wa ri: “Kesare mu ṋeeni zwi re zwa Kesare [ane a imela mivhuso], Mudzimu ni mu ṋee zwi re zwa Mudzimu.”—Marko 12:17; Vharoma 13:1, 2.

8.   Vhurereli ha ngoho ndi nḓila ya vhutshilo kha Vhakriste, hu si mukhuvha kana u vhu tevhedza u itela u bva mulanduni. Miraḓo yaho i tevhela zwine Bivhili ya zwi amba nga ha vhuḓifari. (Vhaefesa 5:3-5; 1 Yohane 3:18) Nṱhani ha u gungula, vha bvela phanḓa vha tshi takalela u gwadamela “Mudzimu o takalaho.”—1 Timotheo 1:11.

9.   Vhane vha vha kha vhurereli ha ngoho a si vhanzhi. (Mateo 7:13, 14) Miraḓo ya vhurereli ha ngoho i anzela u nyadziwa, u semiwa na u tovholwa ngauri i ita zwine Mudzimu a zwi funa.—Mateo 5:10-12.

Vhurereli ha ngoho a vhu sokou vha vhurereli vhuṅwe na vhuṅwe kha nṋe

 U khetha vhurereli nga nṱhani ha nḓila ine ra ḓipfa ngayo nga haho zwi na khombo. Bivhili yo amba hu tshee nga phanḓa uri hu ḓo vha na vhathu vhane vha ḓo “kuvhanganya vhagudisi [vha vhurereli] vhane vha ḓo vha vhudza zwine zwa takadza nḓevhe dzavho.” (2 Timotheo 4:3) Zwo fhambanaho na zwenezwo, Bivhili i ri ṱuṱuwedza uri ri tevhele “vhurabeli ho kunaho na vhu si na tshika u ya nga mavhonele a Mudzimu washu na Khotsi,” naho honoho vhurereli vhu songo ḓowelea.—Yakobo 1:27; Yohane 15:18, 19.