Vhunzhi ha vhathu vhane vha vhudzisa dzenedzi mbudziso, vho xelelwa vhukuma nga zwithu zwa ndeme nahone vha ṱoḓa phindulo na u khuthadzwa. Vhaṅwe vha dzhia honohu u vhulawa ha vhathu hu tshivhi tshihulusa tshe vhathu vha tshi ita, ndi ngazwo zwi tshi vha konḓela u tenda kha Mudzimu.

Mazwifhi: Zwo khakhea u vhudzisa uri ndi ngani Mudzimu o tendela hu tshi vhulawa vhathu vhanzhi lwa tshiṱuhu.

 Ngoho: Vhathu vha re na lutendo lwo khwaṱhaho vho vhuya vha vhudzisa uri ndi ngani Mudzimu a tshi tendela vhuvhi. Sa tsumbo, muporofita Habakuku o vhudzisa Mudzimu a ri: “Ndi ngani u tshi ntendela ndi tshi vhona vhukhakhi? Ndi ngani u tshi tendela vhaṅwe vha tshi tsikeledzwa? Ndi ngani hu tshi tshinyadzwa na u itwa khakhathi phanḓa hanga? Ndi ngani khani na nndwa zwi tshi khou engedzea?” (Habakuku 1:3) Nṱhani ha u kaidza Habakuku, Mudzimu o ita uri mbudziso dze Habakuku a dzi vhudzisa dzi ṅwalwe Bivhilini u itela uri dzi vhalwe nga vhathu vhoṱhe.

Mazwifhi: Mudzimu ha na ndavha na u tambula ha vhathu.

 Ngoho: Mudzimu u a vhenga vhuvhi na u tambula hune ha vhangwa nga vhuvhi. (Mirero 6:16-19) Misini ya Noaxe, Mudzimu o “pfa vhuṱungu” nga nṱhani ha khakhathi dze dza vha dzi tshi khou ṋaṋa kha ḽifhasi. (Genesi 6:5, 6) A zwi timatimisi uri Mudzimu o pfa vhuṱungu nge vhathu vhanzhi vha vhulawa lwa tshiṱuhu.—Maḽeaxi 3:6.

Mazwifhi: Mudzimu o tendela hu tshi vhulawa vhathu vhanzhi lwa tshiṱuhu u itela u ṱarafa Vhayuda.

 Ngoho: Ḓanani ḽa u thoma ḽa miṅwaha, Mudzimu o tendela Vharoma vha tshi fhelisa muḓi wa Yerusalema. (Mateo 23:37–24:2) Fhedzi u bva tsheetsho, Mudzimu ha ṱaluli vhathu u ya nga lushaka lwavho uri a vha itele zwithu zwavhuḓi kana u vha ṱarafa. Kha Mudzimu “Muyuda na Mugerika vha a fana.”—Vharoma 10:12.

Mazwifhi: Arali hu na Mudzimu ane a vha na maanḓa na ane a funa vhathu, o vha a tshi ḓo vha o thivhela uri hu si vhulawe vhathu vhanzhi lwa tshiṱuhu.

 Ngoho: Naho hu si Mudzimu ane a ita uri hu vhe na tshengelo, nga zwiṅwe zwifhinga u a tendela i tshi vha hone lwa tshifhinganyana.—Yakobo 1:13; 5:11.

 Mudzimu o tendela hu tshi vhulawa vhathu vhanzhi lwa tshiṱuhu nga nṱhani ha tshiitisi tshi fanaho na tsho itaho uri a tendele vhathu vha tshi tambula: u itela u tandulula thaidzo ye ya thomiwa kale-kale. Bivhili i zwi bvisela khagala uri ndi Diabolo ane a khou vhusa shango, a si Mudzimu. (Luka 4:1, 2, 6; Yohane 12:31) Hu na zwithu zwivhili zwa ndeme Bivhilini zwine zwa nga thusa u ṱalutshedza uri ndi ngani Mudzimu o tendela hu tshi vhulawa vhathu vhanzhi lwa tshiṱuhu.

1.   Mudzimu o sika vhathu vhe na mbofholowo ya u ḓikhethela. Mudzimu o vhudza Adamu na Eva zwine a ṱoḓa vha tshi zwi ita, fhedzi ho ngo vha kombetshedza uri vha mu thetshelese. Vho ṱoḓa u ḓikhethela zwo lugaho na zwi songo lugaho. Na vhaṅwe vhe vha vha tevhela nga murahu vho ita phetho i fanaho, nahone phetho yavho i si yavhuḓi yo ita uri hu vhe na masiandoitwa a si avhuḓi kha vhathu. (Genesi 2:17; 3:6; Vharoma 5:12) Zwi fana na zwe zwa ambiwa kha bugu Statement of Principles of Conservative Judaism, ye ya ri: “Tshengelo nnzhi ya vhathu i itiswa nga u shumisa luvhi mbofholowo yavho ya u ḓikhethela.” Nṱhani ha u vha dzhiela mbofholowo ya u ḓikhethela, Mudzimu o vha ṋea tshifhinga tsha uri vha lingedze u ḓilanga vhone vhaṋe.

2.   Mudzimu u ḓo fhelisa vhuṱungu hoṱhe he ha itiswa nga u vhulawa ha vhathu vhanzhi nga nḓila ya tshiṱuhu. Mudzimu o fhulufhedzisa uri u ḓo vusa vhathu vhanzhi-vhanzhi vho lovhaho, u katela na vhe vha vhulawa nga nḓila ya tshiṱuhu. U ḓo dovha a fhelisa na vhuṱungu vhune ha khou pfiwa nga vhathu vhe vha ponyoka musi hu tshi vhulawa vhathu vhanzhi nga nḓila ya tshiṱuhu. (Yesaya 65:17; Mishumo 24:15) Mudzimu u ḓo ita zwenezwi zwithu zwoṱhe nga nṱhani ha uri u a funa vhathu.—Yohane 3:16.

 Vhunzhi ha vhe mashaka avho a vhulawa na vhe vha ponyoka musi hu tshi vhulawa vhathu vhanzhi lwa tshiṱuhu, vho kona u pfesesa uri ndi ngani Mudzimu o tendela vhuvhi na nḓila ine a ḓo vhu fhelisa ngayo. Zwenezwi zwo ita uri vha vhe na lutendo nahone vha ḓivhe uri vha khou tshilela mini.