THERO I RE KHA GWATI
Ṱhanzi Dza Yehova Ndi Vhonnyi?
“Ndi na miṅwaha minzhi ndi tshi ḓivha Mike. Ndi muṅwe wa Ṱhanzi dza Yehova. Fhedzi vhurereli hawe vhu a nkanganyisa. Yehova ndi nnyi? Ndi ngani Ṱhanzi dzi sa pembeleli dziholodei? Naa Mike o ḓidzhenisa kha tshigwada tsha vhurereli vhu songo ḓoweleaho?”—Becky, California, U.S.A.
“Musi vhahura vhanga vha tshi thoma u guda Bivhili na Ṱhanzi dza Yehova, ndo ḓivhudzisa uri: ‘Dzina Ṱhanzi dza Yehova ḽi amba mini? Ndi dzina ḽi songo ḓoweleaho ḽa vhurereli!’”—Zenon, Ontario, Canada.
“Nṋe na mufumakadzi wanga ro vha ri tshi humbula u nga Ṱhanzi dza Yehova dzi ṱoḓa ri tshi ḓivhona mulandu nga u sa dzhena hashu kereke. Nahone ro ṱhogomela uri arali vhurereli ho ḓoweleaho ho vha vhu si na zwine ra zwi ṱoḓa, na tshigwada tsha vhurereli ha Ṱhanzi dza Yehova tshi nga si vhe nazwo.”—Kent, Washington, U.S.A.
“Ngoho ndo vha ndi sa ḓivhi uri ndi vhonnyi na uri vha tenda mini.”—Cecilie, Esbjerg, Denmark.
Khamusi ni nga vha no no vha vhona vha tshi khou huwelela nnḓu nga nnḓu kana fhethu ha vhomuthumunzhi, vha tshi khou phaḓaladza khandiso dzo thewaho Bivhilini na u humbela pfunzo ya Bivhili ya mahala. Ni nga vha no wana hoyu magazini kha muṅwe wavho. Fhedzi ni nga ḓivhudzisa uri Ṱhanzi dza Yehova ndi vhonnyi zwa vhukuma. Khamusi mahumbululele aṋu a fana na e a bulwa afho nṱha.
Arali ni na mbudziso na mbilaelo dzo raloho, ni nga wana ngafhi phindulo? Ni nga guda hani zwine Ṱhanzi dza Yehova dza tenda khazwo, nḓila ine mushumo na fhethu havho ha vhurabeli ha tikedzwa ngayo nga zwa dzitshelede na uri ndi ngani vha tshi ḓa hayani haṋu na u amba na inwi fhethu ha vhomuthumunzhi?
Cecilie we a bulwa mathomoni, o ri: “Ndi vhala zwithu zwinzhi nga ha Ṱhanzi dza Yehova kha Inthanethe. Ndo pfa mavhari-vhari nahone nda thetshelesa mafhungo a si avhuḓi e a ambiwa nga havho. Nga zwenezwo, ndo thoma u vha na mavhonele a si avhuḓi nga ha Ṱhanzi dza Yehova.” Naho zwo ralo, nga murahu o amba na Ṱhanzi dza Yehova nga ho livhaho nahone a wana phindulo dzi fushaho dza mbudziso dzawe.
Naa ni nga takalela u wana phindulo dza ngoho dza mbudziso dzaṋu nga ha Ṱhanzi dza Yehova? Ri ni ṱuṱuwedza uri ni ambe na Ṱhanzi dza Yehova, dze dza gandisa yeneyi magazini. (Mirero 14:15) Ri a fulufhela uri thero dzi tevhelaho dzi ḓo ni thusa u ḓivha uri ri vhonnyi na zwine ra zwi tenda, u katela na u pfesesa mushumo une ra u ita.
