Ndo bebelwa ngei Székesfehérvár kha ḽa Hungary, ḓorobo ine ya vha na ḓivhazwakale nnzhi ya miṅwaha i fhiraho 1 000. Zwi ṱungufhadzaho ndi uri ndi kha ḓi humbula masiandoitwa a nndwa ya vhuvhili ya shango e a vha hone henefho.

Musi ndi tshee muṱuku ndo aluswa nga vho-makhulu wanga. Ndi a vha humbula vhukuma—zwihuluhulu makhulu wanga vha mukegulu Vho-Elisabeth. Vho ita uri ndi vhe na lutendo lwo khwaṱhaho kha Mudzimu. U bva ndi na miṅwaha miraru, vhusiku vhuṅwe na vhuṅwe ndo vha ndi tshi dovholola navho Thabelo ya Murena. Naho zwo ralo, ndo vha ndi sa pfesesi zwine yeneyi thabelo ya amba zwone u swika musi ndi miṅwahani ya u fhedza ya vhu-20.

Vho-makhulu wanga vho nṱhogomela musi ndi tshee muṱuku ngauri vhabebi vhanga vho vha vha tshi shuma masiari na vhusiku, vhe na fulufhelo ḽa u wana tshelede ya u renga nnḓu yavhuḓi. Naho zwo ralo, nga Mugivhela muṅwe na muṅwe wa vhuvhili, muṱa woṱhe wo vha u tshi kuvhangana wa ḽa woṱhe. Ndo takalela zwenezwo zwifhinga zwe ra zwi fhedza ri roṱhe.

Nga 1958, muloro wa vhabebi vhanga wo ḓadzea; vho kona u renga nnḓu ine vhuraru hashu ra ḓo kona u dzula khayo. Ndo fhedzisela ndi tshi vho dzula na vhabebi vhanga—ndo vha ndo takala! Naho zwo ralo, ḽeneḽo dakalo ḽo ṱavhanya ḽa fhela nga murahu ha miṅwedzi ya rathi. Khotsi anga vho fa nga khentsara.

Ndo vha ndo tsikeledzea. Ndi humbula ndi tshi rabela ndi tshi ri: “Mudzimu, ndo u humbela uri u tshidze khotsi anga. Ndi a vha ṱoḓa. Ndi ngani u songo fhindula thabelo dzanga?” Ndo vha ndi tshi ṱoḓa u ḓivha vhukuma he khotsi anga vha vha vhe hone. Ndo ḓivhudzisa uri: ‘Naa vho ya ṱaḓulu? Kana a vha tsha ḓo dovha vha tshila?’ Ndo tama vhaṅwe vhana vhane vha kha ḓi vha na khotsi.

Lwa miṅwaha minzhi, ndo ya mavhiḓani lu ṱoḓaho u vha ḓuvha ḽiṅwe na ḽiṅwe. Ndo vha ndi tshi gwadama kha vhiḓa ḽa khotsi anga nahone nda rabela nda ri: “Mudzimu, ndi khou u ṱoḓa u ḓivha hune khotsi anga vha vha hone.” Nga thabelo, ndo dovha nda humbela u thusiwa u pfesesa ndivho ya vhutshilo.

Musi ndi na miṅwaha ya 13, ndo dzhia phetho ya u guda Ludzheremane.  Ndo humbula uri khamusi ndi nga wana phindulo dza mbudziso dzanga kha bugu nnzhi dza Ludzheremane. Nga 1967, ndo thoma u guda ngei ḓoroboni ya Jena, hune ha vha tshipiḓa tsha Vhubvaḓuvha ha Dzheremane. Ndo vha ndi tshi vhala bugu dza vhaḓivhi vha pfunzo dza maṱali vha Dzheremane nga u fhisea, zwihuluhulu vhane vha amba nga ha u vha hone ha vhathu. Naho ndo wana zwiṅwe zwithu zwi nyanyulaho, fhedzi a hu na zwe zwa mpfusha vhukuma. Ndo bvela phanḓa ndi tshi ṱoḓa phindulo nga thabelo.

Nga 1970, ndo humela ngei Hungary, he nda ṱangana na Rose we a fhedzisela o vha mufumakadzi wanga. Nga tshenetsho tshifhinga, shango ḽa Hungary ḽo vha ḽi fhasi ha mulayo wa Vhukomunisi. Nga murahu ha mbingano yashu, nṋe na Rose ro shavhela ngei Austria. Tshipikwa tshashu tsho vha tshi tsha u pfulutshela ngei Sydney kha ḽa Australia, he malume anga vha vha vha tshi dzula hone.

Nga u ṱavhanya ndo wana mushumo ngei Austria. Ḽiṅwe ḓuvha, muṅwe ane nda shuma nae o mmbudza uri ndi nga wana phindulo Bivhilini dza mbudziso dzoṱhe dzine nda vha nadzo. O nṋea bugu dzo vhalaho dzine dza amba nga ha Bivhili. Ndo vhala dzenedzo bugu nga u ṱavhanya na nga mafulufulu nahone nda ṱoḓa u ḓivha zwo engedzeaho. Nga zwenezwo, nda ṅwalela Ṱhanzi dza Yehova, vhagandisi vha dzibugu nahone nda humbela khandiso dzo engedzeaho.

Nga ḓuvha ḽa u thoma ḽa u humbula ḓuvha ḽe ra vhingana ngaḽo, nṋe na Rose ro dalelwa nga muswa wa Ṱhanzi wa Austria. O vha o nnḓisela khandiso ye nda vha ndo i humbela nahone a humbela u guda na nṋe Bivhili, nda tenda. Samusi ndo vha ndi tshi ṱoḓa u ḓivha, ro vha ri tshi vhala luvhili nga vhege—ngudo iṅwe na iṅwe yo vha i tshi fhedza awara dzi ṱoḓaho u vha nṋa!

Ndo takadzwa nga zwe Ṱhanzi dza mpfunza zwone zwi bvaho Bivhilini. Musi dzi tshi ntsumbedza dzina ḽa Mudzimu, Yehova, kha Bivhili yanga ya Luhungary, a tho ngo zwi kholwa. Kha miṅwaha yanga ya 27 ndi tshi khou dzhena kereke, a tho ngo vhuya nda pfa na luthihi dzina ḽa Mudzimu ḽi tshi ambiwa. Ndo takadzwa nga phindulo dzi pfalaho dzi bvaho Bivhilini. Sa tsumbo, ndo guda uri vhafu a vha pfi tshithu, u fana na musi vho eḓela khofhe khulu. (Muhuweleli 9:5, 10; Yohane 11:11-15) Ndo dovha nda guda nga ha fulufhelo ḽi re Bivhilini ḽa shango ḽiswa ḽa uri “lufu a lu tsha ḓo vha hone.” (Nzumbululo 21:3, 4) Ndi fulufhela u dovha nda vhona khotsi anga, ngauri kha ḽeneḽo shango ḽiswa, “hu ḓo vha na mvuwo.”—Mishumo 24:15.

Rose o ṱanganela na nṋe kha u guda Bivhili nga mbilu yoṱhe. Ro ita mvelaphanḓa nga u ṱavhanya, ra fhedza u guda nga miṅwedzi mivhili! Ro ya muṱanganoni muṅwe na muṅwe une Ṱhanzi dza u fara Holoni ya Muvhuso. Ro takadzwa vhukuma nga lufuno, thuso, na vhuthihi vhu re hone vhukati ha Ṱhanzi dza Yehova.—Yohane 13:34, 35.

Nga 1976, nṋe na Rose ro tendelwa u pfulutshela Australia. Nga u ṱavhanya, ro ṱoḓa Ṱhanzi dza Yehova henefho. Ṱhanzi dza henefho dzo ita uri ri ḓipfe ro vhofholowa. Nga 1978, ro vha Dziṱhanzi.

Ndo wana phindulo dza mbudziso dze dza vha dzi tshi mmbilaedzisa u bva kale. Nga u sendela tsini na Yehova Mudzimu, ndo wana Khotsi wavhuḓi vhukuma. (Yakobo 4:8) Ndi takadzwa vhukuma nga fulufhelo ḽanga ḽa u dovha nda vhona khotsi anga vha malofhani shangoni ḽiswa ḽine ḽa khou ḓa.—Yohane 5:28, 29.

Nga 1989, nṋe na Rose ro dzhia phetho ya u humela Hungary uri ri kone u vhudza khonani dzashu na muṱa washu u katela na vhaṅwe vhane ra nga ṱangana navho nga ha lutendo lwashu. Ri na ndugelo ya u gudisa vhathu vhanzhi nga ha Bivhili. Vha fhiraho 70 vho ṱanganela na rine kha u shumela Yehova, u katela na mme anga vha funwaho.

Ndo rabela lwa miṅwaha ya 17 u itela u wana phindulo dza mbudziso dzanga. Ho no fhira miṅwaha ya 39, nahone ndi kha ḓi rabela—zwino ndi nga ri, “Ndi a livhuha Khotsi anga wa ṱaḓulu wa lufuno, nge a fhindula thabelo dzanga dza u bva vhuṱukuni.”