TSHIFHINGANI tsha kale, ho vha na ṱhoho dza mafhungo dzi nyanyulaho dze dza vha dzi kha gurannḓa ya Vhakorea ine ya vhidzwa The Chosun Ilbo. Yo vhudzisa uri: “‘Shim Cheong Wavhuḓi,’ We A Vha A Sa Ḓivhi Tshithu Nga Ha Yesu—Naa O Ya Heleni?”

Ṱhoho dza mafhungo dzo sinyusa vhathu ngauri Shim Cheong ndi mufumakadzi we a vha e muswa a funwaho kha ḓivhazwakale ya Korea we a ṋekedza vhutshilo hawe u itela u thusa khotsi awe vhe vha vha vhe bofu. Miṅwahani minzhi, o khoḓwa vhukuma. Zwi re zwone ndi uri ngei Korea, Shim Cheong o vha e tsumbo ya u ḓiṋekedzela kha vhananyana.

Kha vhanzhi, muhumbulo wa uri muthu o raloho u ḓo shengedzwa heleni ya mulilo nga nṱhani ha uri o vha e si Mukriste o lovhedzwaho, zwo vha zwi tshi vhonala zwi sa pfali nahone zwi tshi khukhulisa. Naho zwo ralo, yeneyo ḓivhazwakale yo itea kale hu sa athu ḓa mulaedza une wa amba nga ha Kristo henefho fhethu.

Yeneyo thero yo vha i tshi katela nyambedzano na mufunzi. O vhudziswa arali vhoṱhe vhe vha fa vha songo wana tshibuli tsha u guda nga ha Yesu vho iswa heleni ya mulilo. O fhindula a ri mini? O ri: “A ri ḓivhi. Ri sokou humbulela uri khamusi hu na iṅwe nḓila ine Mudzimu a ḓo i itela vhenevho vhathu.”

The New Catholic Encyclopedia i ri: “Ndovhedzo ndi ya ndeme u itela u tshidzwa. Samusi Kristo o ri, arali muthu a sa bebwa nga maḓi na muya, a nga si kone u dzhena Muvhusoni wa Mudzimu (Jn 3.5).” Nga nṱhani ha zwenezwo, vhaṅwe vha tenda uri vhe vha fa vha songo lovhedzwa vho poswa heleni ya mulilo kana vha shengedzwa nga iṅwe nḓila musi vha tshi fa.

Naho zwo ralo, vhaṅwe vha humbula uri zwenezwo a zwi itei. Vhathu vha dzimilioni vho fa vha si na nḓivho ya Bivhili. Naa vhenevho vha fanela u tambudzwa lwa tshoṱhe? Bivhili i ri mini nga ha eneo mafhungo?

Bivhili i zwi vhea khagala uri Mudzimu ha hangwi vhathu vhe vha fa vha sa ḓivhi zwilinganyo zwawe. Mishumo 17:30 i ri khwaṱhisedza uri: “Mudzimu o litsha u humbula zwithu zwe vhathu vha ita musi vha sa athu ḓivha.” Nga zwenezwo-ha, Bivhili i ri ṋea fulufhelo ḽifhio nga vhe vha fa vha songo wana tshibuli tsha u guda nga ha Mudzimu?

Phindulo i nga wanala kha zwe Yesu a zwi vhudza muṅwe wa vhaitazwivhi we a fa tsini nae. Onoyo munna o vhudza Yesu uri: “U nkhumbule musi u tshi dzhena Muvhusoni wau.” Yesu o fhindula a ri mini? O ri: “Ngoho ndi a u vhudza ṋamusi, u ḓo vha na nṋe Paradisoni.”—Luka 23:39-43.

Naa Yesu o fulufhedzisa onoyo munna uri u ḓo ya ṱaḓulu? Hai. Munna o vha a sa athu “bebwa hafhu” nga maḓi na muya, zwe zwa vha zwi ṱhoḓea ya u dzhena Muvhusoni wa ṱaḓulu. (Yohane 3:3-6) Nṱhani hazwo, Yesu o fulufhedzisa mutshinyi uri u ḓo dovha a tshila Paradisoni. Sa Muyuda, onoyo munna o vha a tshi ḓivha nga ha Paradiso ya ḽifhasi—tsimuni ya Edeni—ye ya ṱaluswa buguni ya u thoma ya Bivhili. (Genesi 2:8) Fulufhelo ḽa Yesu ḽo ita uri a vhe na fulufhelo ḽa uri u ḓo vuswa Paradisoni musi i tshi dovha ya vha hone kha ḽifhasi.

Zwi re zwone ndi uri Bivhili i fulufhedzisa “mvuwo ya vho lugaho na vha songo lugaho.” (Mishumo 24:15) “Vha songo lugaho” ndi vhe vha vha vhe si na nḓivho ya zwilinganyo zwa Mudzimu zwo lugaho ngauri vho vha vha sa ḓivhi zwine Mudzimu a zwi funa. Yesu u ḓo vusa muitazwivhi a songo lugaho we a amba nae, u katela na vha dzimilioni, khamusi dzibilioni vhe vha fa vha si na nḓivho. Nga zwenezwo, Paradisoni kha ḽifhasi, vha ḓo gudiswa zwine Mudzimu a zwi ṱoḓa nahone vha ḓo wana tshibuli tsha u sumbedza uri vha funa Mudzimu nga u thetshelesa ndaela dzawe.

Musi vha songo lugaho vha tshi vuswa, naa vha ḓo haṱulwa nga zwe vha zwi ita tshifhingani tsho fhiraho? Hai. Vharoma 6:7 i ri: “O faho o vhofhololwa kha zwivhi zwawe.” Vha songo lugaho vha ḓo vha vho no lifha zwivhi zwavho nga u fa. Nga zwenezwo, vha ḓo haṱulwa nga zwithu zwine vha ḓo zwi ita nga murahu ha mvuwo, hu si nga zwe vha zwi ita nga u sa ḓivha musi vha sa athu u fa. Vha ḓo vhuyelwa hani?

Nga murahu ha mvuwo vha songo lugaho vha ḓo wana tshibuli tsha u guda milayo ya Mudzimu, ine ya ḓo dzumbululwa musi mipombo ya pfanyisedzo i tshi vuliwa. Nga zwenezwo vha ḓo haṱulwa “u ya nga mishumo yavho,” zwi tshi ya nga uri vho thetshelesa milayo ya Mudzimu kana hai. (Nzumbululo 20:12, 13) Kha vhanzhi vha songo lugaho, hu nga si vhe na tshibuli tsha vhuvhili, fhedzi vha ḓo wana tshibuli tshithihi tsha u wana vhutshilo vhu sa fheli kha ḽifhasi nga u guda na u ita zwine Mudzimu a zwi funa.

Yeneyi pfunzo i re Bivhilini yo thusa vhanzhi u dovha vha vha na lutendo kha Mudzimu. Muṅwe wavho ndi Yeong Sug. O aluswa sa Mukatolika a fhiseaho. Miraḓo ya muṱa wawe yo vha i vhafunzi. E na fulufhelo ḽa u vha mununu, o ya tshikoloni tsha vhanunu. Nga murahu, o litsha nga nṱhani ha u shoniswa nga zwe zwa vha zwi tshi khou itea henefho. Zwiṅwe hafhu, ho ngo kona u ṱanganedza pfunzothendwa ya u fhiswa heleni ya mulilo ngauri o vhona u nga u tambudza vhathu heleni ya mulilo a si khaṱulokwayo nahone a zwi sumbedzi lufuno.

Nga zwenezwo, iṅwe Ṱhanzi ya Yehova yo sumbedza Yeong Sug maipfi a tevhelaho a re Bivhilini: “Vha tshilaho vha ḓivha uri vha ḓo fa; vho faho a vha na tshine vha tshi ḓivha; a vha tshee na tshine vha ṋewa.” (Muhuweleli 9:5) Ṱhanzi yo mu thusa u ṱhogomela uri vho faho a vha khou tambudzwa muliloni wa hele. Nṱhani hazwo, vho eḓela nahone vho lindela u vuswa.

U ḓivha ha Yeong Sug uri vhathu vhanzhi a vha athu u pfa ngoho i re Bivhilini, zwo ita uri a dzhiele nṱha maipfi a Yesu a wanalaho kha Mateo 24:14 ane a ri: “Mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe. Ndi hone hu tshi ḓo ḓa vhufhelo.” Zwino u huwelela mafhungo maḓifha na u vhudza vhaṅwe fulufhelo ḽavhuḓi ḽi re Bivhilini.

Bivhili i ri vhudza uri: “Mudzimu ha ṱaluli, fhedzi kha tshaka dzoṱhe muthu ane a mu ofha nahone a ita zwo lugaho u a mu ṱanganedza.” (Mishumo 10:34, 35) Yeneyi ndi khaṱulokwayo yo fhelelaho ye ra i lavhelela kha Mudzimu, ane a ‘funa u luga na u sa ṱalula.’—Psalme ya 33:5.