Gudani Kha Ipfi Ḽa Mudzimu

Ni Nga Ṱalula Hani Vhurabeli Ha Ngoho?

Yeneyi thero i haseledza nga ha mbudziso dze na vhuya na dzi vhudzisa nahone i ḓo sumbedza hune na ḓo wana hone phindulo Bivhilini yaṋu. Ṱhanzi dza Yehova vha ḓo takalela u haseledza dzenedzo phindulo na inwi.

1. Naa hu na vhurereli vhuthihi fhedzi ha ngoho?

Yesu o funza vhatevheli vhawe nga ha vhurereli vhuthihi fhedzi ha ngoho. Vhu fana na nḓila i isaho vhutshiloni. Musi Yesu a tshi amba nga ha yeneyo nḓila o ri: “Vha i wanaho a si vhanzhi.” (Mateo 7:14) Mudzimu u ṱanganedza vhurabeli ho thewaho Ipfini ḽawe ḽa ngoho. Vhagwadameli vhawe vhoṱhe vha ngoho vha na vhuthihi lutendoni.—Vhalani Yohane 4:23, 24; 14:6; Vha-Efesa 4:4, 5.

2. Ndi ngani vhurereli vhunzhi ho fhamba-fhambanaho vhu tshi ḓiamba uri ndi ha Vhukriste?

Vhaporofita vha mazwifhi vho tshinyadza Vhukriste nahone vho vhu shumisa u itela u ḓivhuyedza. Samusi Yesu o dzula o amba, vha ḓo ḓa sa “nngu” fhedzi vha tshi nga zwivhanda zwi re na nḓala. (Mateo 7:13-15, 21, 23) Vhukriste ha mazwifhi ho engedzea nga maanḓa musi vhaapostola vha Yesu vho no fa.—Vhalani Mishumo 20:29, 30.

3. Ndi zwifhio zwiṅwe zwithu zwine zwa ṱalula vhurabeli ha ngoho?

Vhagwadameli vha ngoho vha ṱhonifha Bivhili ngauri ndi Ipfi ḽa Mudzimu. Vha lingedza u tshila nga maitele ayo. Nga zwenezwo, vhurereli ha ngoho ho fhambana na vhurereli ho thewaho kha mihumbulo ya vhathu. (Mateo 15:7-9) Vhagwadameli vha ngoho a vha funzi zwiṅwe vha ita zwiṅwe.—Vhalani Yohane 17:17; 2 Timotheo 3:16, 17.

Vhurereli ha ngoho vhu hulisa dzina ḽa Mudzimu, Yehova. Yesu o ḓivhadza dzina ḽa Mudzimu. O thusa vhathu u ḓivha Mudzimu na u vha funza u rabelela uri dzina ḽa Mudzimu ḽi khethwe. (Mateo 6:9) Ndi vhurereli vhufhio vhune ha tikedza u shumiswa ha dzina ḽa Mudzimu hune na dzula hone?—Vhalani Yohane 17:26; Vha-Roma 10:13, 14.

  4. Ni nga ṱalula hani vhagwadameli vha ngoho?

Vhakriste vha ngoho vha funza nga Muvhuso wa Mudzimu. Mudzimu o rumela Yesu uri a funze nga Muvhuso wawe. Muvhuso wa Mudzimu ndi ḽone fulufhelo ḽi ḽoṱhe ḽa vhathu. Yesu o bvela phanḓa a tshi amba nga ha muvhuso u swikela a tshi fa. (Luka 4:43; 8:1; 23:42, 43) O vhudza vhatevheli vhawe uri vha huwelele nga Muvhuso wa Mudzimu. Arali ha ḓa muthu a amba na inwi nga Muvhuso wa Mudzimu, kanzhi onoyo muthu u vha e wa vhurereli vhufhio?—Vhalani Mateo 10:7; 24:14.

Vhatevheli vha Yesu a si vha shango ḽino ḽivhi. A vha dzhii sia kha zwa politiki na nndwa dza vhadzulapo. (Yohane 17:16) A vha edzisi zwithu zwivhi zwi no itwa nga vhathu vha shango na mavhonele avho.—Vhalani Yakobo 1:27; 4:4.

5. Ndi lufhio luswayo luhulwane lwa Vhukriste ha ngoho?

Vhakriste vha ngoho vha na lufuno lwa vhukuma nga tshavho. Vho guda Ipfini ḽa Mudzimu u ṱhonifha vhathu vha mvelele dzo fhamba-fhambanaho. Naho vhurabeli ha mazwifhi vhu tshi tikedza nndwa dza dzitshaka, vhagwadameli vha ngoho a vha tendi u ita nga u ralo. (Mixa 4:1-4) Nṱhani hazwo, miraḓo ya vhurereli ha ngoho i shumisa tshifhinga na thundu dzayo u itela u thusa na u ṱuṱuwedza vhaṅwe.—Vhalani Yohane 13:34, 35; 1 Yohane 4:20, 21.

Ndi tshigwada tshifhio tshine tsha thea pfunzo dzatsho Ipfini ḽa Mudzimu, tsha hulisa dzina ḽa Mudzimu na u ḓivhadza uri Muvhuso wa Mudzimu ndi ḽone fulufhelo ḽi ḽoṱhe ḽa vhathu? Ndi tshigwada tshifhio tshine tsha funana tshine tsha si tikedze dzinndwa? Ngoho ndi ya uri ndi Ṱhanzi dza Yehova fhedzi.—1 Yohane 3:10-12.

U itela u wana mafhungo o engedzeaho, sedzani ndima ya 15 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.

[Tshifanyiso kha siaṱari 16]

“Vha ri: Mudzimu ri a mu ḓivha, huno nga mishumo yavho vha a landula.”—Tito 1:16