1, 2. Ndi ngani Yesu o amba nga ha tshifanyiso tsha dzitalente?

YESU o amba nga ha tshifanyiso tsha dzitalente u itela u bvisela khagala vhuḓifhinduleli vhune vhatevheli vhawe vho ḓodzwaho vha vha naho. Fhedzi tshenetsho tshifanyiso tshi kwama vhafunziwa vhoṱhe vha Yesu. Hu sa londwi uri ri na fulufhelo ḽa u tshila ṱaḓulu kana kha ḽifhasi, ri fanela u pfesesa zwine tshenetsho tshifanyiso tsha amba zwone.

² Yesu o amba lini nga ha tshenetsho tshifanyiso? O amba nga hatsho musi a tshi ṋea vhafunziwa vhawe tshiga tshine tsha ḓo sumbedza uri o no vha Khosi na uri tshifhinga tsha vhufhelo tsho no thoma. (Mateo 24:3) Ngauralo, tshifanyiso tsha dzitalente ndi tshipiḓa tsha tshiga nahone tshi khou ḓadzea misini yashu.

3. Ri guda mini kha tshifanyiso tshi re kha Mateo ndima ya 24 na ya 25?

³ Musi Yesu a tshi amba nga ha tshifanyiso tsha dzitalente, o amba nga ha zwiṅwe zwifanyiso zwiraru zwe na zwone zwa vha zwi tshipiḓa tsha tshiga tsha tshifhinga tsha vhufhelo. Zwenezwo zwifanyiso zwoṱhe zwi ṱalusa pfaneleo dzo khetheaho dzine vhatevheli vhawe vha fanela u vha nadzo. Ri nga vhala nga ha zwenezwo zwifanyiso kha Mateo 24:45 u swika kha 25:46. Tshifanyiso  tsha u thoma tshi amba nga ha mulanda a fulufhedzeaho ane a vha tshigwada tshiṱuku tsha vhaḓodzwa, vhane vha vha na vhuḓifhinduleli ha u funza vhathu vha Yehova. Vha fanela u fulufhedzea na u ṱalifha. * (Sedzani ṱhaluso i re magumoni a siaṱari.) Tshifanyiso tsha vhuvhili tshi amba nga ha vhasidzana vha fumi. Kha tshenetsho tshifanyiso, Yesu o sevha vhaḓodzwa vhoṱhe uri vha fanela u ḓilugiselela na u fhaṱuwa ngauri a vha nga ḓivhi ḓuvha kana tshifhinga tshine a ḓo swika ngatsho. * (Sedzani ṱhaluso i re magumoni a siaṱari.) Kha tshifanyiso tsha vhuraru, Yesu o amba nga ha tshifanyiso tsha dzitalente u itela u funza vhaḓodzwa vhoṱhe uri vha fanela u shuma vhukuma u itela u hwala vhuḓifhinduleli havho ha Vhukriste. Kha tshifanyiso tsha u fhedza, Yesu o amba nga ha tshifanyiso tsha nngu na mbudzi, tshine tsha livhisa ṱhogomelo kha vhane vha vha na fulufhelo ḽa u tshila kha ḽifhasi. O ombedzela uri vha fanela u fulufhedzea nahone vha ite zwoṱhe zwine vha nga kona u itela u thusa vharathu vhawe vho ḓodzwaho. * (Sedzani ṱhaluso i re magumoni a siaṱari.) Yeneyi thero i ḓo ṱalutshedza zwine tshifanyiso tsha dzitalente tsha amba zwone.

4, 5. Munna o bulwaho kha tshifanyiso u fanyisela nnyi, nahone talente ndi mini?

⁴ Vhalani Mateo 25:14-30. Kha tshifanyiso tsha dzitalente, Yesu o amba nga ha munna we a vha o fara lwendo. Kha tshifanyiso tshi fanaho, Yesu o amba nga ha munna we a fara lwendo u itela uri a vhewe sa khosi. * (Sedzani ṱhaluso i re magumoni a siaṱari.) (Luka 19:12) Miṅwahani minzhi yo fhiraho khandiso dzashu dzo amba uri kha zwenezwo zwifanyiso zwivhili onoyo munna u fanyisela Yesu, we a ya ṱaḓulu nga ṅwaha wa 33 C.E. Fhedzi Yesu ho ngo vha Khosi musi a tshi ya ṱaḓulu. O lindela u swikela nga 1914, musi maswina awe a tshi “vhewa sa vhukando ha milenzhe yawe.”—Vhaheberu 10:12, 13.

⁵ Yesu o amba uri munna we a bulwa kha tshifanyiso o vha e na talente dza malo. Yeneyo yo vha i tshelede nnzhi. * (Sedzani ṱhaluso i re magumoni a siaṱari.) Musi onoyo munna a sa athu u ṱuwa, o ṋea vhalanda vhawe tshelede. O vha vhudza uri vha i shumise u itela uri i vhe na nzwalelo nnzhi. Samusi yeneyo tshelede yo vha i ya ndeme vhukuma kha onoyo munna, ho vha hu na tshithu tsha ndeme vhukuma kha Yesu. Tshenetsho tshithu tsho vha tshi mini? Ho vha hu mushumo we a u ita musi e kha ḽifhasi.

6, 7. Talente dzi fanyisela mini?

⁶ Mushumo wa u huwelela wo vha u wa ndeme vhukuma kha Yesu. U huwelela hawe zwo ita uri vhathu vhanzhi vha vhe vhafunziwa vhawe. (Vhalani Luka 4:43.) Naho zwo ralo, o vha a tshi zwi ḓivha uri hu  tshe na mushumo munzhi wa u huwelela nahone vhathu vhanzhi vho vha vha tshi ḓo ṱanganedza mafhungo maḓifha. Zwi re zwone ndi uri o vhudza vhafunziwa vhawe a ri: “Lavhelesani masimu, o tshena o lugela u kaṋiwa.” (Yohane 4:35-38) Mulimi makone a nga si ṱutshele tsimu ine ya fanela u kaṋiwa. Yesu o vha e na mavhonele a fanaho. Nga zwenezwo, musi Yesu a sa athu u humela ṱaḓulu, o vhudza vhatevheli vhawe uri: “Nga zwenezwo, iyani ni ite . . . vhafunziwa.” (Mateo 28:18-20) Nga yeneyo nḓila, Yesu o vha ṋea lupfumo lwo khetheaho lune lwa vha vhuḓifhinduleli ha ndeme ha u huwelela.—2 Vhakorinta 4:7.

⁷ U fana na munna we a ṋea vhalanda vhawe tshelede yawe, Yesu o ṋea vhatevheli vhawe vho ḓodzwaho mushumo wa u ita vhafunziwa. (Mateo 25:14) Nga zwenezwo, talente dzi fanyisela vhuḓifhinduleli ha u huwelela na u ita vhafunziwa.

8. Naho mulanda muṅwe na muṅwe o wana tshelede i sa eḓani na ya muṅwe, muṋe o vha o lavhelela mini khavho?

⁸ Yesu o amba uri muṋe o ṋea mulanda wa u thoma talente ṱhanu, wa vhuvhili a mu ṋea mbili, wa vhuraru a mu ṋea nthihi. (Mateo 25:15) Muṋe o ṋea mulanda muṅwe na muṅwe tshelede i sa eḓani na ya muṅwe, fhedzi o vha o lavhelela uri vhoṱhe vha ite zwi re maanḓani avho uri vha vhe na nzwalelo nnzhi. Nga nḓila i fanaho Yesu o lavhelela uri vhatevheli vhawe vho ḓodzwaho vha ite zwi re maanḓani avho kha mushumo wa u huwelela. (Mateo 22:37; Vhakolosa 3:23) Nga Pentekoste ya 33 C.E., vhatevheli  vha Yesu vho thoma u ita vhathu vha tshaka dzoṱhe vhafunziwa. Musi ri tshi vhala bugu ya Bivhili ya Mishumo, ri a kona u vhona nḓila ye vha shuma ngayo vhukuma. * (Sedzani ṱhaluso i re magumoni a siaṱari.)—Mishumo 6:7; 12:24; 19:20.

9. (a) Vhalanda vhavhili vha fulufhedzeaho vho shumisa hani tshelede, nahone ri guda mini kha zwenezwo? (b) Vha re na fulufhelo ḽa u tshila kha ḽifhasi vha fanela u ita mini?

⁹ Vhalanda vhavhili vha u thoma vhe vha shumisa tshelede ya muṋe wavho zwavhuḓi, vha fanyisela vhahashu vha tshinnani na vha tshisadzini vho ḓodzwaho vha fulufhedzeaho tshifhingani tsha vhufhelo. Zwihuluhulu u bva nga 1919, vho shuma nga maanḓa mushumoni wa u huwelela. Kha tshifanyiso, vhalanda vho ṋewa tshelede i sa eḓani, fhedzi zwenezwo a zwi ambi uri hu na zwigwada zwivhili zwi sa fani zwa vhaḓodzwa vha fulufhedzeaho. Vhenevho vhalanda vhavhili vho shuma nga maanḓa nahone vho bindulisa tshelede yavho. Fhedzi naa ndi vhaḓodzwa vhe vhoṱhe vhane vha fanela u shuma nga maanḓa mushumoni wa u huwelela na u funza? Hai. Tshifanyiso tsha Yesu tsha nngu na mbudzi tshi ri funza uri vhane vha vha na fulufhelo ḽa u tshila kha ḽifhasi vha fanela u thusa vharathu vha Yesu vho ḓodzwaho kha mushumo wa u huwelela nahone vha fulufhedzee khavho. Vha pfa vho huliswa vhukuma nga u vha thusa. Ngoho ndi ya uri vhathu vha Yehova ndi “sambi ḽithihi,” nahone vhoṱhe vha shuma nga maanḓa kha mushumo wa u huwelela na u ita vhafunziwa.—Yohane 10:16.

10. Ndi tshipiḓa tshifhio tsha tshiga tshine tsha sumbedza uri ri khou tshila maḓuvhani a vhufhelo?

¹⁰ Yesu u lavhelela uri vhatevheli vhawe vhoṱhe vha shume nga maanḓa u itela u wana vhafunziwa vho engedzeaho. Zwenezwo ndi zwe zwa itwa nga vhafunziwa vhawe vha ḓanani ḽa u thoma ḽa miṅwaha.  Kha tshino tshifhinga tsha vhufhelo, tshine khatsho tshifanyiso tsha Yesu tsha dzitalente tsha khou ḓadzea, naa vhatevheli vhawe vha khou u ita wonoyu mushumo? Ee, vha khou u ita nga nṱhani ha uri vhathu vhanzhi vho pfa mafhungo maḓifha nahone vha vha vhafunziwa u fhira naho hu lini! Samusi vhatevheli vhoṱhe vha Yesu vha tshi khou shuma nga maanḓa, zwenezwo zwi ita uri hu lovhedzwe vhathu vhanzhi-vhanzhi ṅwaha muṅwe na muṅwe. Na vhone vha shela mulenzhe kha mushumo wa u huwelela. Zwenezwo zwoṱhe zwine zwa khou itwa na mvelelo dzavhuḓi ndi vhuṱanzi ho khwaṱhaho ha uri mushumo wa u huwelela ndi tshipiḓa tsha ndeme tsha tshiga tshe tsha ṋewa nga Yesu malugana na tshifhinga tsha vhufhelo. A zwi timatimisi uri Yesu u ḓirwa khana nga vhashumi vhawe!

11. Ri zwi ḓivha hani uri Yesu u ḓo vhuya kana u ḓa tshifhingani tsha maṱungu mahulu?

¹¹ Yesu o ri: “Nga murahu ha tshifhinga tshilapfu, muṋe wa vhenevho vhalanda a vhuya u itela u dzudzanya mafhungo a dzitshelede navho.” (Mateo 25:19) Muṋe ane a vha Yesu, u ḓo ita zwenezwo musi maṱungu mahulu e tsini na u fhela. Zwenezwo ri zwi ḓivha hani? Kha vhuporofita vhu re kha Mateo ndima ya 24 na 25, Yesu o amba lunzhi uri u khou vhuya kana u khou ḓa. Sa tsumbo, o amba uri vhathu vha “ḓo vhona Murwa-muthu a tshi ḓa e kha makole a ṱaḓulu.” Zwenezwo zwi ambela kha tshifhinga tsha maṱungu mahulu musi Yesu a tshi haṱula vhathu. O dovha a sevha vhatevheli vhawe vhane vha khou tshila maḓuvhani a vhufhelo uri vha fhaṱuwe. O ri: “A ni ḓivhi ḓuvha ḽine Murena waṋu a ḓo ḓa ngaḽo” nahone “Murwa-muthu u ḓo ḓa nga tshifhinga tshine ni si tshi humbulele.” (Mateo 24:30, 42, 44) Ngauralo, kha tshifanyiso tsha dzitalente, Yesu o vha a tshi khou ambela kha tshifhinga tshine a ḓo vhuya kana u ḓa u haṱula vhathu na u fhelisa shango ḽa Sathane. *—Sedzani ṱhaluso i re magumoni a siaṱari.

12, 13. (a) Muṋe o vhudza mini vhalanda vhavhili, nahone ndi ngani? (b) Vhaḓodzwa vha ḓo swaiwa lini lwa u fhedza? (Dovhani ni sedze bogisi “ Vha Haṱulwa Sa Vho Lugaho Musi Vha Tshi Fa.”) (c) Vhane vha tikedza vhaḓodzwa vha vhuyelwa nga mini?

¹² Musi muṋe a tshi vhuya lwendoni lwawe, o wana uri mulanda ane a vha na talente ṱhanu o vha o no vha na dziṅwe talente ṱhanu, nahone we a wana mbili o vha o no  vha na dziṅwe mbili. Muṋe a amba na muṅwe na muṅwe wavho, a ri: “Wo shuma zwavhuḓi, mulanda wavhuḓi na a fulufhedzeaho! Wo fulufhedzea kha zwiṱuku. Ndi ḓo u kumedza na zwiṅwe zwinzhi.” (Mateo 25:21, 23) Ndi mini zwine Yesu ane a vha Muṋe a ḓo zwi ita musi a tshi vhuya tshifhingani tshi ḓaho?

¹³ Musi maṱungu mahulu a sa athu u swika, Mudzimu u ḓo ṱanganedza lwa u fhedza vhaḓodzwa vha shumaho vhukuma vhane vha ḓo vha vha tshee kha ḽifhasi nga tshenetsho tshifhinga. Zwenezwi ndi u swaiwa havho ha u fhedza. (Nzumbululo 7:1-3) Nga zwenezwo, Yesu u ḓo vha lambedza nga u vha vusela ṱaḓulu musi Haramagedo i sa athu u swika. Fhedzi hu pfi mini nga vhane vha vha na fulufhelo ḽa u tshila kha ḽifhasi vhe vha tikedza vhaḓodzwa mushumoni wa u huwelela? Vha ḓo vha vho no haṱulwa sa dzinngu. Vha ḓo lambedzwa nga u tshila kha ḽifhasi nga fhasi ha vhuvhusi ha Muvhuso wa Mudzimu.—Mateo 25:34.

14, 15. Naa Yesu o vha a tshi khou amba uri vhunzhi ha vhaḓodzwa vha ḓo vha vhavhi na vhabva? Ṱalutshedzani.

¹⁴ Tshifanyiso tsho dovha tsha amba nga ha mulanda we a ṋewa talente nthihi. Ho ngo i bindulisa u itela u wanela muṋe wawe nzwalelo nnzhi kana u i vhea banngani u itela nzwalelo. Nṱhani hazwo, o i bwela fhasi. Muṋe o amba uri onoyo mulanda o vha e muvhi nahone a tshi bvafha. O dzhiela mulanda muvhi talente nahone a i ṋea mulanda wa u thoma. Nga zwenezwo, a posela mulanda muvhi “nnḓa swiswini,” nahone onoyo mulanda a lila lu ṱungufhadzaho.—Mateo 25:24-30; Luka 19:22, 23.

¹⁵ Musi Yesu a tshi amba uri muṅwe wa vhenevho vhalanda vhararu ndi muvhi nahone  u a bvafha, o vha a sa khou amba uri muṅwe wa vhaḓodzwa u ḓo nga onoyo mulanda. Zwenezwo ri zwi ḓivha musi ri tshi vhambedza tshenetsho tshifanyiso na zwiṅwe zwivhili. Kha tshifanyiso tsha mulanda a fulufhedzeaho na wa vhuṱali, Yesu o amba nga ha mulanda muvhi we a tovhola vhaṅwe vhalanda. Yesu o vha a sa khou amba uri vhane vha vha tshipiḓa tsha mulanda a fulufhedzeaho na wa vhuṱali vha ḓo vha vhavhi. Nṱhani hazwo, o vha a tshi khou sevha vhenevho vhaḓodzwa uri vha songo fana na mulanda muvhi. Nga zwenezwo, kha tshifanyiso tsha vhasidzana vha fumi, Yesu o amba nga ha vhasidzana vhaṱanu vha matsilu. O vha a sa khou amba uri hafu ya vhaḓodzwa i ḓo vha matsilu. Nṱhani hazwo, Yesu o vha a tshi khou sevha nga ha zwine zwa ḓo itea arali vha sa ḓilugiselela na u fhaṱuwa. * (Sedzani ṱhaluso i re magumoni a siaṱari.) Nga hu fanaho, kha tshifanyiso tsha dzitalente, Yesu o vha a sa khou amba uri maḓuvhani a vhufhelo vhunzhi ha vhaḓodzwa vha ḓo vha vhavhi nahone vha vha vhabva. O vha a tshi khou sevha vhaḓodzwa uri vha si fane na mulanda muvhi, fhedzi vha bvele phanḓa vha tshi shuma vhukuma kha mushumo wa u huwelela.—Mateo 25:16.

16. (a) Ndi ngudo dzifhio mbili dzine ra dzi guda kha tshifanyiso tsha dzitalente? (b) Yeneyi thero yo ri thusa hani u pfesesa tshifanyiso tsha dzitalente? (Sedzani bogisi “ Ri Nga Pfesesa Hani Tshifanyiso Tsha Dzitalente?”)

¹⁶ Ndi ngudo dzifhio mbili dzine ra dzi guda kha tshifanyiso tsha dzitalente? Ya u thoma, Yesu o ṋea vhafunziwa vhawe vho ḓodzwaho lupfumo lwo khetheaho lune lwa vha vhuḓifhinduleli ha ndeme ha u huwelela na u ita vhafunziwa. Ya vhuvhili, Yesu u lavhelela uri roṱhe ri fhisetshele mushumo wa u huwelela. Arali ra konḓelela nga u fulufhedzea kha wonoyu mushumo nahone ra dzula ri tshi thetshelesa na u fulufhedzea kha Yesu, ri nga vha na vhungoho ha uri u ḓo ri lambedza.—Mateo 25:21, 23, 34.