1. Yehova u ḓipfa hani nga ha mushumo nahone zwi mu sudzulusela u ita mini?

YEHOVA ndi mushumi ane a takalela zwine a zwi ita. (Ps. 135:6; Yoh. 5:17) U itela uri zwivhumbiwa zwo ṱalifhaho zwi tshenzhele dakalo ḽi fanaho na ḽawe na u wana dakalo ḽi ḓiswaho nga u fhedza u shuma, Yehova o vha ṋea mushumo u takadzaho na u fushaho. Sa tsumbo, o katela Murwa wawe wa tanzhe kha mushumo wawe wa u sika. (Vhalani Vhakolosa 1:15, 16.) Bivhili i ri vhudza uri musi a sa athu u vha muthu wa ṋama, Yesu o vha e tsini na Mudzimu ṱaḓulu sa “muḓinḓa wawe.”—Mir. 8:30.

2. Ndi mini zwine zwa sumbedza uri zwivhumbiwa zwa muya zwo dzula zwi na mushumo wa ndeme na u takadzaho?

² U bva mathomoni u swika magumoni, Bivhili i ri ṋea tsumbo dzine dza sumbedza uri Yehova u dzula a tshi ṋea vhana vhawe vha muya mushumo. Musi Adamu na Eva vha tshi ita tshivhi nahone vha pandelwa hayani havho ha Paradiso, Mudzimu “a dzudza Vha-kherube tsimuni ya Edeni thungo ya Vhubvaḓuvha, na lupenyo lwa tshusa i ṱungedzaho; ha vha u linda nḓila i yaho murini wa vhutshilo.” (Gen. 3:24) Nahone Nzumbululo 22:6 i dzumbulula uri Yehova “o rumela muruṅwa wawe uri a sumbedze vhalanda vhawe zwithu zwine zwa ḓo vha hone nga u ṱavhanya.”

3. Musi Yesu e kha ḽifhasi, o tevhela hani tsumbo ya Khotsi awe?

³ Musi Yesu e kha ḽifhasi sa muthu o fhelelaho, o ḓiphina nga u ita mushumo we Yehova a mu ṋea uri a u ite. Musi a tshi tevhela tsumbo ya Khotsi awe, Yesu o dovha a ṋea vhatevheli vhawe mushumo wa ndeme. O ita uri vha takalele mushumo wavho nga u vha vhudza uri: “Ngoho ndi a ni vhudza ndi ri: Ane a vha na lutendo kha nṋe, na ene u ḓo ita mishumo ine nda i ita; nahone u ḓo ita mishumo i fhiraho yeneyi, ngauri ndi khou ya ha Khotsi.” (Yoh. 14:12) U itela u ombedzela ndeme ya wonoyo mushumo wo ṱavhanyiswaho, Yesu o ri: “Ri fanela u shuma mishumo ya o nthumaho musi ḽi tshi kha ḓi vha masiari; vhusiku vhu khou ḓa hune muthu a nga si kone u shuma.”—Yoh. 9:4.

4-6. (a) Ndi ngani ri tshi nga livhuha uri Noaxe na Mushe vho ita mushumo we vha ṋewa nga Yehova? (b) Mishumo yoṱhe ine Mudzimu a i ṋea vhathu i fana nga nḓila-ḓe?

⁴ Musi Yesu a sa athu u ḓa kha ḽifhasi, vhathu vho vha vho ṋewa mushumo u vhuyedzaho une vha fanela u u ita. Naho Adamu na Eva vho kundelwa u ita mushumo we vha vha vho ṋewa wone, vhaṅwe vho ita zwe Mudzimu a vha vhudza zwone. (Gen. 1:28) Noaxe o vha o ṋewa ndaela yo livhaho ya nḓila ine a fanela u fhaṱa ngayo gungwa u itela u tshidza vhutshilo kha Maḓi Mahulu. O ita nga vhuronwane zwoṱhe zwe Yehova a ri a zwi ite. Ri livhuha u thetshelesa hawe ngauri ri khou tshila ṋamusi!—Gen. 6:14-16, 22; 2 Pet. 2:5.

⁵ Mushe o vha o ṋewa vhulivhisi ho livhaho ha u fhaṱa nnḓu ya mulanga na u dzudzanya vhutshifhe, o zwi ita nga vhuronwane. (Ek. 39:32; 40:12-16) Na ṋamusi, ri a vhuyelwa nga u fulufhedzea hawe kha u ḓadzea ha wonoyo mushumo. Nga nḓila-ḓe? Muapostola Paulo o ṱalutshedza uri yeneyo mifuda ya Mulayo yo vha i tsumbo ya “zwithu zwavhuḓi zwine zwa khou ḓa.”—Vhaheb. 9:1-5, 9; 10:1.

⁶ Mushumo une Mudzimu a u ṋea vhashumeli vhawe u a fhambana nga u ya ha tshifhinga zwi tshi ya nga nḓila ine ndivho yawe ya ḓo ḓadzea ngayo. Zwiṅwe hafhu, mushumo we vha ṋewa wone wo ṋea Yehova vhugala tshifhinga tshoṱhe na u vhuyedza vhathu vhane vha vha na lutendo. Zwenezwi zwi shuma kha zwithu zwe Yesu a zwi khunyeledza a sa athu u ḓa kha ḽifhasi na musi o no vha kha ḽifhasi. (Yoh. 4:34; 17:4) Nga hu fanaho, mushumo we ra ṋewa wone ṋamusi u ṋea Yehova vhugala. (Mat. 5:16; vhalani 1 Vhakorinta 15:58.) Ndi ngani zwo ralo?

7, 8. (a) Ṱalusani mushumo une Vhakriste ṋamusi vha vha na ndugelo ya u u ita. (b) Ri fanela u aravha hani kha vhulivhisi ha Yehova?

⁷ Ni nga tendelana nazwo uri zwi a mangadza uri Yehova o ramba vhathu vha songo fhelelaho uri vha takalele u mu shumela sa vhashumisani nae. (1 Vhakor. 3:9) Vhane vha ṱanganela kha u fhaṱa Holo dza Maguvhangano, Holo dza Muvhuso na zwifhaṱo zwa davhi vha khou shela mulenzhe kha mushumo wa u fhaṱa sa zwe Noaxe na Mushe vha zwi ita. Hu sa londwi uri ni shuma u vusulusa Holo dza Muvhuso hune na dzula hone kana u fhaṱa ofisini dzashu khulwane dza shango ḽoṱhe ngei Warwick kha ḽa New York, takalelani ndugelo yaṋu ya u shuma nga yeneyi nḓila. (Sedzani tshifanyiso tsha u thoma tsho tou oliwaho.) Ndi mushumo mukhethwa. Naho zwo ralo, tsha ndeme vhukuma, Vhakriste vha rambiwa uri vha shele mulenzhe kha mushumo wa muya wa u fhaṱa. Na wone wo itelwa u ṋea Yehova vhugala na u vhuyedza vhathu vhane vha thetshelesa. (Mish. 13:47-49) Ndangulo ya Mudzimu i ṋea vhulivhisi ho teaho vhune wonoyo mushumo wa fanela u itwa ngayo nga nḓila ya khwine. Nga zwiṅwe zwifhinga, zwenezwi zwi nga amba u ṋewa mushumo muswa.

⁸ Vhashumeli vha Yehova vha fulufhedzeaho vha dzula vha tshi ṱuṱuwedzea u tevhela vhulivhisi ha lwa ṱaḓulu. (Vhalani Vhaheberu 13:7, 17.) Mathomoni ri nga kundelwa u pfesesa nga vhuḓalo zwi itaho uri  ri ite wonoyo mushumo nga yeneyo nḓila. Naho zwo ralo, ri a kona u vhona nga vhuḓalo mbuyelo dza u tshimbidzana na tshanduko dzine Yehova a vhona dzo tea.

9. Ndi tsumbo ifhio ine vhahulwane vha i vhetshela tshivhidzo malugana na mushumo?

⁹ Lutamo lwo khwaṱhaho lwa u khunyeledza zwine Yehova a zwi funa lu vhonala nga nḓila ine vhahulwane vha livhisa ngayo tshivhidzo. (2 Vhakor. 1:24; 1 Vhathes. 5:12, 13) Vha sumbedza uri vho ḓiimisela u shuma vhukuma na u tshimbidzana na zwiimo zwine zwa khou shanduka. Vha fhisetshela u tshimbidzana na tshanduko dza nḓila ntswa dzine mushumo washu wa u huwelela nga ha Muvhuso wa Mudzimu wa itwa ngayo. Naho mathomoni vhaṅwe vho vha vha tshi timatima u dzudzanya u ṱanziela nga luṱingo, vhuimazwikepe kana khagala, nga u ṱavhanya vho vhona mbuyelo dzavhuḓi. Sa tsumbo, vhavulanḓila vhaṋa vha ngei Dzheremane vho dzhia phetho ya u shuma tsimuni ya mabindu o litshelelwaho. Michael o ri: “Ro vha ri sa athu u vhuya ra shuma nga yeneyo nḓila miṅwahani i si gathi yo fhiraho, nga zwenezwo, ro vha ro tshuwa vhukuma. Yehova a nga vha o ṱhogomela zwenezwi, nga zwenezwo ro vha na tshumelo yavhuḓi ya ḽeneḽo ḓuvha nahone ri nga si zwi hangwe. Ro takala lungafhani ngauri ro tevhela vhulivhisi ho ṅwalwaho kha Vhuḓinḓa Hashu ha Muvhuso na u ḓitika nga thikhedzo ya Yehova!” Naa no ḓiimisela u lingedza dziṅwe nḓila ntswa dza u ṱanziela dzo thomiwaho tsimuni ya haṋu?

10. Ndi dzifhio tshanduko dza zwenezwino dzo itwaho nga ndangulo?

¹⁰ Nga zwiṅwe zwifhinga, ndangulo i fanela u ita tshanduko. Miṅwahani ya zwenezwino, ofisi dza davhi dzo vhalaho dzo ṱanganywa na dziṅwe. Naho dzenedzo tshanduko dzi tshi amba uri vhahashu vha tshinnani na vha tshisadzini vhane vha shuma kha eneo madavhi vha ite tshanduko, nga u ṱavhanya vhenevho vhathu vha a kona u vhona mvelelo dzavhuḓi dza dzenedzo tshanduko. (Muh. 7:8) Vhenevho vhahashu vha shumaho nga u ḓifunela vha takala lungafhani nga u vha tshipiḓa tsha ḓivhazwakale ya vhathu vha Yehova!

11-13. Ndi khaedu dzifhio dze vhaṅwe vha sedzana nadzo nga nṱhani ha tshanduko dzo itwaho nga ndangulo?

¹¹ Ri nga guda ngudo dza ndeme vhukuma kha vhe vha shela mulenzhe nga ho livhaho kha u ṱanganyiswa ha madavhi. Vhaṅwe vho shuma sa vhashumeli vha tshifhinga tsho ḓalaho mahayani a Bethele lwa mahumi a miṅwaha. Vhavhingani vhe vha shuma muṱani muṱuku wa Bethele wa ngei America Kati, vho humbelwa uri vha pfulutshele muṱani wa Bethele muhulwane wa ngei Mexico. Rogelio o ri: “U ṱutshela muṱa na dzikhonani zwo vha zwi tshi konḓa vhukuma.” Muṅwe wahashu ane a pfi Juan we a humbelwa uri a pfulutshele ngei Mexico, o ri: “Zwo vha zwi tshi fana na u tou bebwa lwa vhuvhili; ni fanela u vhumba vhushaka vhuswa. Zwi ṱoḓa uri ni ḓowelane na maitele maswa na nḓila dza u humbula.”

¹² Miṅwe miraḓo ya Bethele ya ngei mashangoni a Yuropa ye ya humbelwa uri i pfulutshele ofisini ya davhi ya ngei Dzheremane, na yone yo sedzana na khaedu. Muṅwe na muṅwe ane a dzula fhethu hu re na thavha dzavhuḓi a nga kona u pfesesa uri zwo vha zwi tshi konḓa u pfuluwa Switzerland u tshi sia fhethu havhuḓi hune ha vha na Thavha khulwane dzo u tangaho. Vhane vha bva Austria, mathomoni vho vha vha tshi humbula kutshilele kwavho kwa u ḓigeḓa kwe vha vha vha tshi ḓiphina ngakwo.

¹³ Kha vhane vha pfulutshela kha ḽiṅwe shango, zwenezwi zwi amba uri vha fanela u ḓowela haya huswa, u shuma na vhahashu vha tshinnani na vha tshisadzini vhane vha si vha ḓivhe, khamusi na u guda miṅwe mishumo vha songo i ḓowelaho. Zwi amba uri vha fanela u ḓowelana na tshivhidzo tshiswa na u huwelela kha tsimu ntswa, khamusi na u guda luṅwe luambo. U ita dzenedzi tshanduko zwi nga konḓa. Naho zwo ralo, vhunzhi ha miraḓo ya Bethele yo ṱanganedza dzenedzo tshanduko. Ndi ngani vho ita nga u ralo?

14, 15. (a) Vhanzhi vho sumbedza hani uri vha takalela ndugelo ya u shumela Yehova hu sa londwi mushumo une vha u ita? (b) Vha tsumbo yavhuḓi kha riṋe nga nḓila-ḓe?

 ¹⁴ Grethel o ri: “Ndo ṱanganedza khumbelo ngauri ho vha hu nḓila ya u sumbedza Yehova uri nḓila ine nda mu funa ngayo i fhira nḓila ine nda funa ngayo shango ḽa hashu, nnḓu kana dziṅwe ndugelo.” Dayska o ri: “Musi ndi tshi humbula uri khumbelo i bva ha Yehova, ndo i ṱanganedza nga dakalo.” André na Gabriela vho tendelana nazwo, vha ri: “Nga zwenezwo ro kona u vhona zwibuli zwo engedzeaho zwa u shumela Yehova, nga u sa vhea madzangalelo oṱhe a ṋama u thoma. Ro ḓivhudza uri, ‘Musi Yehova a tshi ita tshanduko, ndi khwine u ṱanganedza wo takala u fhira u hanedzana nazwo.’”

¹⁵ Nga nṱhani ha u ṱanganyiswa ha madavhi, miṅwe miraḓo ya Bethele yo rumelwa u shuma tsimuni sa vhavulanḓila. Zwenezwi zwo itea kha miṅwe miraḓo ya Bethele musi madavhi a Denmark, Norway, na Sweden a tshi ṱanganyiswa a vha ofisi ya davhi ḽa Scandinavia. Vhukati havho ho vha hu na Florian na Anja vhe vha ri: “Ri dzhia mushumo washu muswa sa tshenzhelo i takadzaho. Kha riṋe ndi zwavhuḓi u shumiswa nga Yehova hu sa londwi hune ra shuma hone. Ri nga amba zwi tshi bva mbiluni uri ri pfa ro fhaṱutshedzwa vhukuma!” Naho vhunzhi hashu ri siho kha honoho vhuimo, u nga ri ri nga edzisa u ḓikumedza ha vhenevha vhahashu vha tshinnani na vha tshisadzini vhe vha vhea zwithu zwa Muvhuso u thoma. (Yes. 6:8) Yehova u dzula a tshi fhaṱutshedza vhane vha takalela ndugelo yavho ya u shuma nae, hu sa londwi uri vha mu shumela vhe ngafhi.

16. (a) Vhagalata 6:4 i ri vhudza uri ri ite mini? (b) Ndi ndugelo ifhio khulwane ine vhathu vha nga vha nayo?

¹⁶ Vhathu vha songo fhelelaho vha na nḓowelo ya u vhambedza, fhedzi Ipfi ḽa Mudzimu ḽi ri vhudza uri ri fanela u livhisa ṱhogomelo kha zwine ra kona u zwi ita. (Vhalani Vhagalata 6:4.) Vhunzhi hashu a ri na ndugelo ndanguloni. Zwiṅwe hafhu, a si roṱhe rine ra nga vha vhavulanḓila kana vharumiwa kana vhashumi vha Bethele. A zwi timatimisi uri dzenedzo ndi ndugelo dzavhuḓi lungafhani! Fhedzi a ro ngo fanela u  hangwa uri ndugelo khulwane ine muthu a nga vha nayo ndi ine roṱhe ra nga vha nayo. Zwo tou ralo kha u vha mushumisani na Yehova vhuḓinḓani ha Vhukriste. Yeneyo ndi ndugelo ine ya fanela u dzhielwa nṱha!

17. Ndi mini zwine zwa ḓo bvela phanḓa zwi tshi itea samusi shango ḽa Sathane ḽi tshi kha ḓi vha hone, fhedzi ndi ngani zwenezwo zwi songo fanela u ri kula nungo?

¹⁷ Samusi ri tshi kha ḓi tshila shangoni ḽa Sathane, ri nga si kone u shumela Yehova nga nḓila ine ra zwi ṱoḓa ngayo. Hu nga vha hu na vhuṅwe vhuimo vhune ra sa kone u sedzana naho, vhu ngaho vhuḓifhinduleli ha muṱa, mutakalo kana zwiimo. Fhedzi zwenezwi a zwo ngo fanela u vha tshiitisi tsha u ri kula nungo. Ni songo vhuya na dzhiela fhasi vhukoni ha u shuma na Mudzimu nga u ḓivhadza nga ha dzina ḽawe na u ita uri Muvhuso wawe u ḓivhiwe kha tshibuli tshiṅwe na tshiṅwe. Tsha ndeme vhukuma ndi uri ni khou shuma nae nga hune na nga kona ngaho nahone ni khou rabela uri a fhaṱutshedze vhahaṋu vhane vha khou ita zwinzhi u ni fhira. Humbulani uri muthu muṅwe na muṅwe ane a renda dzina Yehova ndi wa ndeme phanḓa hawe!

18. Ndi mini zwine ra fanela u ḓiimisela u zwi ita, nahone ndi ngani?

¹⁸ Hu sa londwi vhushayanungo na u sa fhelela hashu, Yehova u takalela u ri shumisa sa vha shumisani nae. U nga ri ri nga dzhiela nṱha ndugelo yashu ya u shuma na Mudzimu washu kha enea maḓuvha a vhufhelo! Nga zwenezwo, a ro ngo fanela u vhea madzangalelo ashu u thoma, ri tshi ḓivha uri shangoni ḽawe ḽiswa, Yehova u ḓo ita uri ri ḓiphine nga “vhutshilo ha vhukuma”—vhutshilo vhu sa fheli vhu takadzaho, fhethu hu re na mulalo.—1 Tim. 6:18, 19.

19. Yehova o ri fulufhedzisa mini tshifhingani tshi ḓaho?

¹⁹ Musi ri tsini na u dzhena shangoni ḽiswa, humbulani nga ha zwe Mushe a zwi vhudza Vhaisiraele musi vha sa athu u dzhena Shangoni ḽo Fulufhedziswaho: “Yehova Mudzimu wau u ḓo U shudufhadza kha mishumo yoṱhe ya zwanḓa zwau.” (Doit. 30:9) Nga murahu ha Haramagedo, vhe vha vha vho farekanea nga u shuma na Mudzimu vha ḓo dzula shangoni ḽe a vha fulufhedzisa ḽone. Nga zwenezwo, ri ḓo livhisa ṱhogomelo kha mushumo muswa—shango ḽa vha paradiso yavhuḓi!