Yehova U Dzumbulula “Zwiné Zwa Pfi Zwi Ḓo Ṱavhanya U vha Hone”
Yehova U Dzumbulula “Zwiné Zwa Pfi Zwi Ḓo Ṱavhanya U vha Hone”
“Ndzumbululo ye Yesu Kristo a ṋewa nga Mudzimu asiyi, a tshi pfi a sumbedze ngayo’ vhalanda vhawe zwiné zwa pfi zwi ḓo ṱavhanya u vha hone.”—NDZUMB. 1:1.
NI ḒO ARAVHA HANI?
Ndi zwifhio zwipiḓa zwa tshifanyiso tshihulu-hulu zwine zwa fanyisela Muvhuso Wa Shango Wa Vhaisimane Na Vhaamerika?
Yohane u sumbedza hani vhushaka vhu re hone vhukati ha Muvhuso Wa Shango Wa Vhaisimane Na Vhaamerika na Yuno (United Nations)?
Daniele na Yohane vha sumbedza uri vhuvhusi ha vhathu vhu ḓo fhela hani?
1, 2. (a) Vhuporofita ha Daniele na ha Yohane vhu ri ṋea tshibuli tsha u ita mini? (b) Ṱhoho dza rathi dza u thoma dza ḽivhanda dzi imela mini?
VHUPOROFITA ha Daniele na ha Yohane vhu tshimbidzana nga nḓila dzine dza ita uri ri pfesese zwiitea zwinzhi zwa shango zwa zwino na zwa tshifhingani tshi ḓaho. Ri guda mini musi ri tshi vhambedza bono ḽa Yohane ḽa ḽivhanda, mafhungo a Daniele a ḽivhanda ḽi ofhisaho ḽi re na ṋanga dza fumi, na nḓila ye Daniele a ṱalutshedza ngayo zwine tshifanyiso tshihulu-hulu tsha imela zwone? Nahone u pfesesa zwavhuḓi vhuporofita honoho zwi fanela u ri ṱuṱuwedza u ita mini?
2 Kha ri haseledze nga ha bono ḽa Yohane ḽa ḽivhanda. (Ndzumb., ndim. 13) Samusi ro guda theroni yo fhiraho, ṱhoho dza rathi dza u thoma dzi imela muvhuso wa Egipita, Asuri, Babele, Meda na Peresia, Gerika na wa Roma. Mivhuso yeneyo yoṱhe yo vha i tshi vhenga mbeu ya musadzi. (Gen. 3:15) Ṱhoho ya vhurathi i imela Muvhuso wa Roma we wa bvela phanḓa u muvhuso u re na maanḓa na nga murahu ha musi Yohane o no ṅwala bono ḽawe. Mafheleloni, muvhuso une wa imelwa nga ṱhoho ya vhusumbe wo vha u tshi ḓo dzhiela vhudzulo muvhuso wa Roma. Ndi ufhio muvhuso wa shango we wa ita zwenezwo, nahone wo fara hani mbeu ya musadzi?
MUVHUSO WA BRITAIN NA WA UNITED STATES I VHA NA MAANḒA
3. Ḽivhanda ḽi ofhisaho ḽi re na ṋanga dza fumi ḽi imela mini, nahone ṋanga dza fumi dzi fanyisela mini?
3 Ri nga ḓivha ṱhoho ya vhusumbe ya ḽivhanda ḽo bulwaho kha Ndzumbululo ndima ya 13 nga u vhambedza bono ḽa Yohane na bono ḽa Daniele ḽa ḽivhanda ḽi ofhisaho ḽi re na ṋanga dza fumi. * (Vhalani Daniele 7:7, 8, 23, 24.) Ḽivhanda ḽe ḽa vhonwa nga Daniele ḽo vha ḽi tshi imela Muvhuso Wa Shango Wa Roma. (Sedzani tshifanyiso tshi re kha masiaṱari 12-13.) Ḓanani ḽa miṅwaha ḽa vhuṱanu C.E., Muvhuso wa Roma wo thoma u fhelelwa nga maanḓa. Ṋanga dza fumi dze dza mela kha ṱhoho ya ḽeneḽo ḽivhanda ḽi ofhisaho dzi imela mivhuso ye ya bva kha wonoyu muvhuso.
4, 5. (a) Luṋanga luṱuku lwo ita mini? (b) Ṱhoho ya vhusumbe ya ḽivhanda i imela muvhuso ufhio?
4 Ṋanga nṋa, kana mivhuso ye ya mela kha ṱhoho ya ḽivhanda ḽi ofhisaho yo bulwa nga ho livhaho. Ṋanga tharu dzo kulwa nga luṅwe luṋanga, lune lwa vha “luṱuku.” Zwenezwi zwo ḓadzea musi shango ḽa Britain, ḽe ḽa vha ḽi na gammba ya maswole a Muvhuso wa Roma ḽi tshi vha muvhuso u re na maanḓa. U swika ḓanaṋi ḽa vhu-17 ḽa miṅwaha, muvhuso wa Britain wo vha u muṱuku. Maṅwe mashango e a vha e nga fhasi ha Muvhuso wa Roma wa kale—Spain, Netherlands, na Fura—one o vha e na ṱhuṱhuwedzo khulwane. Muvhuso wa Britain wo kula mivhuso yeneyo nga muthihi nga muthihi, wa i bvisa kha vhuimo ha nṱha. Ḓanani ḽa vhu-18 ḽa miṅwaha, muvhuso wa Britain wo vha u nḓilani ya u vha muvhuso u re na maanḓa shangoni u fhira yoṱhe. Fhedzi ṱhoho ya vhusumbe ya ḽivhanda yo vha i sa athu imela muvhuso wonoyo.
5 Naho muvhuso wa Britain wo no vha na maanḓa, mashango a Devhula Amerika e a vha e nga fhasi hawo, o mbo ḓi ḓiimela nga oṱhe. Naho zwo ralo, muvhuso wa United States, wo tendelwa uri u bvele phanḓa u tshi aluwa wa vha na maanḓa nge wa vha u tshi tsireledzwa nga maswole a maḓini a ngei Britain. Musi ḓuvha ḽa Murena ḽi tshi thoma nga 1914, muvhuso wa Britain wo vha wo no vha muhulwane u fhira yoṱhe kha ḓivhazwakale, nahone muvhuso wa United States wo vha wo no vha muhulwanesa ḽifhasini ḽoṱhe siani ḽa zwa dzifeme. * Misini ya Nndwa ya Shango ya U Thoma, muvhuso wa United States wo vhumba vhushaka ho khetheaho na muvhuso wa Britain. Nga tshenetsho tshifhinga ṱhoho ya vhusumbe ya ḽivhanda yo mbo ḓi thoma u vhonala nahone ya ḓivhiwa sa Muvhuso wa Shango wa Vhaisimane na Vhaamerika. Ṱhoho yeneyi yo fara hani mbeu ya musadzi?
6. Ṱhoho ya vhusumbe yo fara hani vhathu vha Mudzimu?
6 Nga u ṱavhanya nga murahu ha u thoma ha ḓuvha ḽa Murena, ṱhoho ya vhusumbe yo vutshela vhathu vha Mudzimu—masalela a vharathu vha Kristo vha re kha ḽifhasi. (Mat. 25:40) Yesu o amba uri nga tshifhinga tsha u vha hone hawe, masalela a mbeu a ḓo vha a tshi khou shuma kha ḽifhasi. (Mat. 24:45-47; Vha-Gal. 3:26-29) Muvhuso wa Shango wa Vhaisimane na Vhaamerika wo lwa na vhenevho vhakhethwa. (Ndzumb. 13:3, 7) Misini ya Nndwa ya Shango ya U Thoma, wo tsikeledza vhathu vha Mudzimu, wa thivhela dziṅwe khandiso dzavho, nahone wa valela dzhele vhaṅwe vhaimeleli vha tshigwada tsha mukoma a fulufhedzeaho. Ṱhoho ya vhusumbe ya ḽivhanda yo thivhela mushumo wa u huwelela lwa tshifhinganyana. Yehova o vha o dzula a tshi ḓivha nga ha tshiitea tshenetshi nahone o vha o tshi dzumbululela Yohane. Mudzimu o dovha a vhudza Yohane uri tshiṅwe tshigwada tsha mbeu tshi ḓo vusuluswa tsha ita mushumo wa u huwelela nga ho engedzeaho. (Ndzumb. 11:3, 7-11) Ḓivhazwakale ya vhashumeli vha Yehova vha musalauno i khwaṱhisedza uri zwithu zwenezwo zwo itea zwa vhukuma.
MUVHUSO WA SHANGO WA VHAISIMANE NA VHAAMERIKA NA ṊAYO DZA TSIMBI NA VUMBA
7. Hu na vhushaka vhufhio vhukati ha ṱhoho ya vhusumbe ya ḽivhanda na tshifanyiso tshihulu-hulu?
7 Hu na vhushaka vhufhio vhukati ha ṱhoho ya vhusumbe ya ḽivhanda na tshifanyiso tshihulu-hulu? Muvhuso wa Britain, nahone hu nga ambiwa uri na wa United States—i bva kha Muvhuso wa Roma. Naho zwo ralo, hu pfi mini nga ṋayo dza tshifanyiso tshihulu-hulu? Dzi ṱaluswa sa dzo vanganyaho tsimbi na vumba. (Vhalani Daniele 2:41-43.) Ṱhaluso yeneyi i tshimbidzana na tshifhinga tshee ṱhoho ya vhusumbe ine ya imela Muvhuso Wa Shango Wa Vhaisimane Na Vhaamerika ya thoma ngatsho u vhusa. Samusi tsimbi yo vanganywaho na vumba i sa ḓo khwaṱha u fana na tsimbi nga yoṱhe, Muvhuso Wa Shango Wa Vhaisimane Na Vhaamerika na wone a wo ngo khwaṱha u fana na muvhuso wa tsimbi wa Roma une wa bva khawo. Nga nḓila-ḓe?
8, 9. (a) Muvhuso wa vhusumbe wa shango wo sumbedza hani uri u na maanḓa a ngaho a tsimbi? (b) Vumba ḽi re kha ṋayo dza tshifanyiso tshihulu-hulu ḽi imela mini?
8 Nga zwiṅwe zwifhinga ṱhoho ya vhusumbe ya ḽivhanda yo sumbedza u vha na pfaneleo dzi ngaho dza tsimbi. Sa tsumbo, yo sumbedza maanḓa ayo musi i tshi kunda kha Nndwa ya Shango ya U Thoma. Misini ya Nndwa ya Shango ya Vhuvhili, maanḓa ane a nga a tsimbi a ṱhoho ya vhusumbe o dovha a vhonala. * Nga murahu ha nndwa yeneyo, nga zwiṅwe zwifhinga yeneyo ṱhoho ya vhusumbe yo vha i tshi sumbedza pfaneleo dzi ngaho dza tsimbi. Naho zwo ralo, u bva mathomoni, yeneyo tsimbi yo vha yo vanganywa na vumba.
9 Ho no fhela tshifhinga tshilapfu vhashumeli vha Yehova vha tshi ṱoḓa u pfesesa zwine ṋayo dza tshifanyiso tshihulu-hulu dza imela zwone. Daniele 2:41 i ṱalusa tsimbi na vumba zwo vanganaho sa “muvhuso” muthihi hu si minzhi-minzhi. Nga zwenezwo, vumba ḽi imela madzangano a re na ṱhuṱhuwedzo kha Muvhuso Wa Shango Wa Vhaisimane Na Vhaamerika, zwine zwa ita uri u si vhe wo khwaṱhaho sa tsimbi u fana na Muvhuso wa Roma. Vumba ḽi ambelwa sa “dzitshakha” kana vhathu-zwavho. (Dan. 2:43) Kha Muvhuso Wa Shango Wa Vhaisimane Na Vhaamerika, vhathu-zwavho vha lwela ndugelo dzavho nga u gwalaba, madzangano a dziyuniyoni ane a lwela ndugelo dza vhashumi, na madzangano ane a lwela vhuḓilangi. Vhenevha vhathu-zwavho vha ita uri Muvhuso Wa Shango Wa Vhaisimane Na Vhaamerika u si tsha vha na maanḓa zwine zwa ita uri u si kone u sumbedza maanḓa a ngaho a tsimbi une wa vha nawo. Zwiṅwe hafhu, mavhonele a sa tendelani na mvelelo dza khetho dzi ṱoḓaho u fana zwi ita uri madzangano o kundaho a vhuse a tshi pikiswa, zwa dovha zwa ita uri vharangaphanḓa vha ḓivheaho vha eneo madzangano vha si vhe na maanḓa a u ita zwine vha funa zwi tshi itwa. Daniele o dzula o amba a ri: “Muvhuso uyo nga thungo u ḓo vha wo khwaṱhaho, nga thungo a u nga konḓi.”—Dan. 2:42; 2 Tim. 3:1-3.
10, 11. (a) Ndi mini zwine zwa ḓo itea kha “ṋayo”? (b) Ri nga phetha nga uri mini nga ha tshivhalo tsha zwikunwane?
10 Ḓanani ḽa vhu-21 ḽa miṅwaha, muvhuso wa Britain na wa United States yo bvela phanḓa i na vhushaka ho khetheaho, nahone i anzela u shumisana kha mafhungo oṱhe a shango. Vhuporofita vhu ambaho nga ha tshifanyiso tshihulu-hulu na vhune ha amba nga ha ḽivhanda ho amba uri Muvhuso Wa Shango Wa Vhaisimane Na Vhaamerika, u nga si dzhielwe vhudzulo nga muṅwe muvhuso wa shango une wa ḓo ḓa nga murahu hawo. Naho wonoyu muvhuso wa shango wa u fhedza u si na maanḓa a fanaho na a Muvhuso wa Roma une wa imelwa nga milenzhe ya tsimbi kha tshifanyiso tshihulu-hulu, a u nga ḓo wa nga wone uṋe.
11 Naa tshivhalo tsha zwikunwane zwi re kha tshenetsho tshifanyiso hu na zwine tsha amba zwone? Ṱhogomelani hezwi: Kha maṅwe mabono, Daniele o bula zwivhalo nga ho livhaho—sa tsumbo, tshivhalo tsha ṋanga dzi re kha ṱhoho dzo fhamba-fhambanaho dza mavhanda. Zwivhalo zwenezwo ndi zwa ndeme. Naho zwo ralo, musi a tshi ṱalusa tshenetsho tshifanyiso, Daniele ho ngo bula tshivhalo tsha zwikunwane. Nga zwenezwo, zwi vhonala u nga tshivhalo tsha zwikunwane a si tsha ndeme u fhira uri tshifanyiso tsho vha tshi na zwanḓa, minwe, milenzhe na ṋayo. Daniele o amba nga ho livhaho uri zwikunwane zwo itwa nga tsimbi na vumba. U ya nga ṱhaluso yawe, ri nga phetha nga uri Muvhuso Wa Shango Wa Vhaisimane Na Vhaamerika ndi wone une wa ḓo vha u tshi khou vhusa musi “tombo” ḽine ḽa imela Muvhuso wa Mudzimu ḽi tshi rwa ṋayo dza tshifanyiso.—Dan. 2:45.
MUVHUSO WA VHAISIMANE NA VHAAMERIKA NA ḼIVHANDA ḼA ṊANGA MBILI
12, 13. Ḽivhanda ḽi re na ṋanga mbili ḽi imela mini, nahone ḽi ita mini?
12 Naho Muvhuso Wa Shango Wa Vhaisimane Na Vhaamerika wo vanganya tsimbi na vumba, mabono e Yesu a ṋea Yohane o sumbedza uri muvhuso wonoyu wo vha u tshi ḓo bvela phanḓa u na tshipiḓa tsha ndeme kha ano maḓuvha a vhufhelo. Nga nḓila-ḓe? Yohane o vhona bono ḽa ḽivhanda ḽi re na ṋanga mbili ḽine ḽa amba sa ḽigwena. Ḽeneḽi ḽivhanda ḽi ofhisaho ḽo vha ḽi tshi imela mini? Ḽi na ṋanga mbili, zwine zwa amba uri ḽi na maanḓa a re kavhili. Yohane o dovha a vhona Muvhuso Wa Shango Wa Vhaisimane Na Vhaamerika, fhedzi u kha vhuimo ho khetheaho.—Vhalani Ndzumbululo 13:11-15.
13 Ḽeneḽi ḽivhanda ḽi ṱuṱuwedza uri hu itwe tshifanyiso tsha ḽivhanda. Yohane o ṅwala uri tshifanyiso tsha ḽivhanda tshi ḓo vha hone, tsha si tsha vha hone, tsha dovha tsha vha hone. Zwenezwi zwo itea kha dzangano ḽine ḽa tikedzwa nga muvhuso wa Britain na wa United States, nahone dzangano ḽeneḽi ḽo vha ḽo itelwa u imela miṅwe mivhuso yoṱhe ya shango, na u ita uri i vhe na vhuthihi. * Ḽeneḽi dzangano ḽo bvelela nga murahu ha Nndwa ya Shango ya U Thoma nahone ḽo vha ḽi tshi ḓivhiwa sa Ndangano ya Dzitshaka (League of Nations). A ḽo ngo tsha vha hone musi hu tshi thoma Nndwa ya Shango ya Vhuvhili. Tshifhingani tsha yeneyo nndwa, vhathu vha Mudzimu vho amba uri u ya nga vhuporofita vhu re kha Ndzumbululo, tshifanyiso tsha ḽivhanda tshi ḓo dovha tsha vha hone. Nahone tsho dovha tsha vhonala tshi tshi vho ḓivhiwa sa Yuno (United Nations).—Ndzumb. 17:8.
14. Tshifanyiso tsha ḽivhanda ndi “khosi ya vhuṱanu-na-vhuraru” nga muhumbulo ufhio?
14 Yohane o ṱalusa uri tshifanyiso tsha ḽivhanda ndi “khosi ya vhuṱanu-na-vhuraru.” Nga muhumbulo ufhio? Yeneyi khosi ya vhuṱanu na vhuraru a si ṱhoho ya vhumalo ya ḽivhanda ḽe ḽa bvelela lwa u thoma. I sokou vha tshifanyiso tsha ḽeneḽo ḽivhanda. Maanḓa naho e afhio ane khosi yeneyi ya vha nao, i a wana kha tshaka dzi re miraḓo yayo, zwihulu-hulu kha Muvhuso Wa Shango Wa Vhaisimane Na Vhaamerika une wa vha mutikedzi wayo muhulwane. (Ndzumb. 17:10, 11) Fhedzi yo ṋewa maanḓa a u shuma sa khosi u itela mushumo wo tou livhaho une wa kwama zwiitea zwine zwa ḓo shandula ḓivhazwakale yoṱhe.
TSHIFANYISO TSHA ḼIVHANDA TSHI ḼA PHOMBWE
15, 16. Phombwe i imela mini, nahone ho itea mini kha vhatikedzi vhayo?
15 U ya nga Yohane, nṱha ha ḽivhanda ḽikhunwana—ḽine ḽa vha tshifanyiso tsha ḽivhanda—ho dzula phombwe ya lwa pfanyisedzo ine ya khou ḽi langa. Yeneyo phombwe i na dzina ḽine ḽa ri, “Babele Ḽihulu.” (Ndzumb. 17:1-6) Nga ho teaho, phombwe yeneyi i imela vhurereli hoṱhe ha mazwifhi, zwihulu-hulu kereke dza ḽa Vhudzhagane. Madzangano a vhurereli o fhaṱutshedza tshifanyiso tsha ḽivhanda a lingedza na u tshi langa.
16 Naho zwo ralo, nga tshifhinga tsha ḓuvha ḽa Murena, Babele Ḽihulu ḽo vhona maḓi manzhi a tshi xa, nahone maḓi eneo a imela vhathu vhane vha ḽi tikedza. (Ndzumb. 16:12; 17:15) Sa tsumbo, musi tshifanyiso tsha ḽivhanda tshi tshi vhonala lwa u thoma, kereke dza ḽa Vhudzhagane—dzine dza vha tshipiḓa tshi re na ṱhuṱhuwedzo khulwane kha Babele Ḽihulu—dzo vha dzi tshi langa kana dzi na ṱhuṱhuwedzo khulwane mashangoni a Vhukovhela. Ṋamusi, vhathu a vha tsha ṱhonifha dzikereke u katela na vhafunzi. Zwi re zwone ndi uri vhathu vhanzhi vha humbula uri vhurereli ndi hone hune ha shela mulenzhe kha khuḓano dzi re hone shangoni. Tshigwada tsha vhathu vha fhiseaho na vho funzeaho nga maanḓa ngei Vhukovhela tshi khou ita mafulo a uri hu fheliswe ṱhuṱhuwedzo ine vhurereli ha vha nayo tshitshavhani.
17. Ndi mini zwine zwa ḓo itea hu si kale kha vhurereli ha mazwifhi, nahone ndi ngani?
17 Naho zwo ralo, vhurereli ha mazwifhi vhu nga si sokou ngalangala nga hoṱhe. Phombwe yeneyi i ḓo dzula i na ṱhuṱhuwedzo khulwane nahone i tshi lingedza na u langa mahosi u swika musi Mudzimu a tshi funzedza maano mbilu dza mahosi eneo. (Vhalani Ndzumbululo 17:16, 17.) Hu si kale Yehova u ḓo ita uri madzangano a zwa politiki a maitele ano a Sathane ane a imelwa nga Yuno a vutshele vhurereli ha mazwifhi. Madzangano eneo a zwa politiki a ḓo fhelisa ṱhuṱhuwedzo yoṱhe ya vhurereli ha mazwifhi a lozwa na lupfumo lune ha vha nalwo. Tshiitea tshenetshi khamusi tsho vha tshi tshi vhonala tshi sa ḓo itea mahumini a miṅwaha o fhiraho. Ṋamusi, phombwe yo dzula nṱha ha ḽivhanda ḽikhunwana. Naho zwo ralo, i nga si we he ya dzula hone nga zwiṱuku nga zwiṱuku. Fhedzi musi i tshi wa, zwi ḓo itea nga u ṱavhanya na nga nḓila i ofhisaho vhukuma.—Ndzumb. 18:7, 8, 15-19.
MAVHANDA A A FHELISWA
18. (a) Ndi mini ḽivhanda ḽa ḓo zwi ita, nahone hu ḓo vha na mvelelo dzifhio? (b) Daniele 2:44 i ambela kha uri Muvhuso wa Mudzimu u ḓo fhelisa mivhuso ifhio? (Sedzani bogisi ḽi re kha siaṱari 17.)
18 Musi vhurereli ha mazwifhi ho no fheliswa, ḽivhanda, maitele a Sathane a zwa politiki, a ḓo ṱuṱuwedzwa uri a vutshele Muvhuso wa Mudzimu. Samusi ḽi sa ḓo kona u swikelela Muvhuso wa Mudzimu u re ngei ṱaḓulu, mahosi a shango a ḓo sinyutshela vha re kha ḽifhasi vhane vha u tikedza. Zwi nga si konadzee u ponyoka mvelelo dza hone. (Ndzumb. 16:13-16; 17:12-14) Daniele u dovha a ṱalusa ḽiṅwe sia ḽa nndwa ya u fhedza. (Vhalani Daniele 2:44.) Ḽivhanda ḽo bulwaho kha Ndzumbululo 13:1, tshifanyiso tshaḽo, na ḽivhanda ḽi re na ṋanga mbili, zwi ḓo fheliswa.
19. Ndi khwaṱhisedzo ifhio ine ra vha nayo, nahone zwino ndi tshifhinga tsha u ita mini?
19 Ri khou tshila tshifhingani tshine ha khou vhusa ṱhoho ya vhusumbe. A hu tsheena ṱhoho ine ya ḓo dovha ya mela kha ḽivhanda ḽeneḽi ḽi sa athu fheliswa. Muvhuso Wa Shango Wa Vhaisimane Na Vhaamerika ndi wone une wa ḓo vha u tshi khou vhusa musi vhurereli ha mazwifhi vhu tshi fheliswa. Vhuporofita ha Daniele na ha Yohane ho ḓadzea kokotolo. Ri nga vha na vhungoho ha uri zwo no vha tsini uri hu fheliswe vhurereli ha mazwifhi na uri nndwa ya Haramagedoni i ḓo thoma hu si kale. Mudzimu o dzumbulula zwidodombedzwa zwoṱhe hu tshee nga phanḓa. Naa ri ḓo thetshelesa tsevho dza vhuporofita? (2 Pet. 1:19) Zwino ndi tshifhinga tsha u tikedza Yehova na Muvhuso wawe.—Ndzumb. 14:6, 7.
[Ṱhaluso dzi re magumoni a siaṱari]
^ Bivhilini, nomboro ya fumi i anzela u fanyisela tshigwada tsho fhelelaho—nahone malugana na enea mafhungo, i khou fanyisela mivhuso yoṱhe ye ya bva kha Muvhuso wa Roma.
^ Naho vhushaka ha Muvhuso Wa Vhaisimane Na Vhaamerika ho thoma u vha hone ḓanani ḽa vhu-18 ḽa miṅwaha, Yohane o zwi ṱalusa sa unga ho vha hu tshi ḓo thoma nga ḓuvha ḽa Murena. Zwi re zwone ndi uri u ḓadzea ha mabono o ṅwalwaho kha Ndzumbululo ho itea “nga ḓuvha ḽa Murena.” (Ndzumb. 1:10) Ṱhoho ya vhusumbe yo thoma u imela Muvhuso Wa Vhaisimane Na Vhaamerika nga murahu ha Nndwa ya Shango ya U Thoma.
^ Daniele o vhona hu tshee nga phanḓa nḓila ine wonoyu muvhuso wa ḓo tshinyadza ngayo tshifhingani tsha yeneyo nndwa, nahone o ṅwala uri: “I ḓo tshinya lwa u mangadza.” (Dan. 8:24) Sa tsumbo, muvhuso wa United States wo tshinya vhukuma musi u tshi posa bomo mbili kha shango ḽi re swina ḽa Muvhuso Wa Shango Wa Vhaisimane Na Vhaamerika.
^ Sedzani bugu Revelation—Its Grand Climax at Hand!, masiaṱari 240, 241, 253.
[Mbudziso Dza Pfunzo]
[Bogisi kha siaṱari 17]
“MIVHUSO YOṰHE” I KATELA IFHIO?
Vhuporofita vhu re kha Daniele 2:44 vhu amba uri Muvhuso wa Mudzimu “u ḓo pwashakanya mivhuso yoṱhe wa i lozwa.” Vhuporofita honovhu vhu ambela fhedzi kha mivhuso ine ya imelwa nga zwipiḓa zwo fhamba-fhambanaho zwa tshifanyiso tshihulu-hulu.
Hu pfi mini nga ha miṅwe mivhuso yoṱhe ya vhathu? Vhuporofita vhu tshimbidzanaho na honovhu vhu re kha bugu ya Ndzumbululo vhu ri ṋea mafhungo o engedzeaho. Vhu sumbedza uri “mahosi a shango” a ḓo kuvhanganywa u itela u lwa na Yehova nga “ḓuvha ḽihulu ḽa Mudzimu, Mu-vhusa-hoṱhe.” (Nzumb. 16:14; 19:19-21) Nga zwenezwo, a si mivhuso i re kha tshifanyiso tshihulu-hulu fhedzi ine ya ḓo fheliswa, fhedzi nga nndwa ya Haramagedo hu ḓo fheliswa mivhuso yoṱhe.
