“Lufuno Lwanga Lwa Mushumo Wa Vhu-Colporteur Lu Khou Engedzea Ḓuvha Ḽiṅwe Na Ḽiṅwe”
Zwe Ra Zwi Vhulunga
“Lufuno Lwanga Lwa Mushumo Wa Vhu-Colporteur Lu Khou Engedzea Ḓuvha Ḽiṅwe Na Ḽiṅwe”
Nga 1886, kopi dza 100 dza bugu Millennial Dawn, Volumu I dzo rumelwa ngei Chicago, Illinois dzi tshi bva Bible House i re Allegheny, Pennsylvania, U.S.A. Charles Taze Russell o vha a tshi fulufhela uri u ḓo phaḓaladza dzenedzo volumu ntswa mavhengeleni ane a rengisa dzibugu. Iṅwe khamphani khulwane ya ngei United States ine ya rengisa bugu dza vhurereli yo tenda uri i nga rengisa bugu Millennial Dawn. Fhedzi nga murahu ha vhege mbili, dzenedzo bugu dzoṱhe dzo vhuyedzedzwa ngei Bible House.
Hu ambiwa uri mufunzi a ḓivheaho vhukuma o sinyuwa nga maanḓa musi a tshi vhona bugu Millennial Dawn dzo ṱaniwa na bugu dzawe. O vha o sinyuwa vhukuma nahone a amba uri arali dzenedzo bugu dza sa bviswa, ene na dziṅwe khonani dzawe dza vhafunzi vha ḓo bvisa bugu dzavho—zwine zwa amba uri vha ḓo isa bindu ḽavho huṅwe fhethu. Muṋe wa khamphani o humisela bugu dza Millennial Dawn naho o vha a sa funi u ita nga u ralo. Zwiṅwe hafhu ho vha ho itwa na khunguwedzo kha dzigurannḓa. Fhedzi vhapikisi vho ita vhungoho ha uri dzenedzo thendelano dza u kunguwedza dzi a thivhelwa. Zwino, yeneyi khandiso ntswa yo vha i tshi ḓo swikelela hani kha vhane vha ṱoḓa mafhungo-ngoho?
Vha-colporteur vho vha tshipiringululi tsha vhuleme honoho. * Nga 1881, Zion’s Watch Tower yo ramba vhahuweleli vha 1 000 vhane vha nga kona u phaḓaladza khandiso dza Bivhili lwa tshifhinga tsho ḓalaho. Naho ho vha hu na vha-colporteur vha si gathi fhedzi, vho hasha mbeu ya mafhungo-ngoho yo gandiswaho kule-kule. Nga 1897, ho vha ho no phaḓaladzwa kopi dza bugu Millennial Dawn dzi ṱoḓaho u vha milioni, nahone nnzhi dzadzo dzo phaḓaladzwa nga vha-colporteur. Vhunzhi havho vho vha vha tshi ḓitshidza nga tshelede ṱhukhu ya muṅwaliso wa Tshiingamo kana ine vha i wana musi vho tshimbidza bugu.
Vha-colporteur vhenevho vha re na tshivhindi vho vha vhe vhonnyi? Vhaṅwe vho thoma vhe miṅwahani ya vhufumi, ngeno vhaṅwe vho thoma vho no aluwa. Vhanzhi vho vha vhe siho mbinganoni kana vhe mbinganoni vha si na vhana, fhedzi miṱa minzhi yo ṱanganela kha u ita mushumo wonoyu. Vha-colporteur vha tshifhinga tshoṱhe vho vha vha tshi shuma awara nnzhi, nahone vha-colporteur vha u thusa vho vha vha tshi shuma awara nthihi kana mbili nga ḓuvha. A si vhathu vhoṱhe vhe mutakalo wavho kana zwiimo zwa vha zwi tshi vha tendela u ita mushumo wa vha-colporteur. Fhedzi buthanoni ḽa 1906, vha konaho u ita mushumo wonoyu vho vhudzwa uri a zwi ṱoḓei uri vha vhe vho “funzeaho nga maanḓa, kana vha re na vhutsila, kana vhane vha konesa u amba.”
Mashangoni oṱhe, vhathu-zwavho ndi vhone vhe vha kona u khunyeledza wonoyu mushumo u swayeaho vhukuma. Muṅwe wahashu wa tshinnani u humbula uri nga miṅwaha ya sumbe fhedzi, o kona u tshimbidza bugu dza 15000. Naho zwo ralo, o ri: “A tho ngo dzhenela mushumo wa vha-colporteur u itela u vha murengisi wa dzibugu, fhedzi ndi u ita nga nṱhani ha u ṱoḓa u ṋea vhuṱanzi nga ha Yehova na mafhungo-ngoho awe.” Huṅwe na huṅwe he vha-colporteur vha ya hone, mbeu dza mafhungo-ngoho dzo mela nahone zwigwada zwa Vhagudi vha Bivhili zwo mbo ḓi anda.
Vhafunzi vho vha vha tshi sasaladza vha-colporteur, vha tshi amba uri vha sokou vha vharengisi vha dzibugu fhedzi. Magazini wa Tshiingamo wa 1892 wo ri: “A si vhanzhi vhane vha ḓivha uri ndi vhaimeleli vha Murena vha vhukuma, kana vhane vha ṱhogomela uri Murena o vha ṋea tshirunzi nga nṱhani ha u ḓiṱukufhadza na u ḓikumedza havho.” Muṅwe mu-colporteur o amba uri vhutshilo havho ho vha vhu sa leluwi na luthihi. Zwiendedzi zwavho ho vha hu dzibaisigira na zwienda zwo khwaṱhaho. Musi vha si na tshelede, vha-colporteur vho vha vha tshi ṋea vhathu dzibugu, vhathu vhenevho vha vha ṋea zwiḽiwa. Nga madekwana musi vho fhedza ḓuvha ḽoṱhe tsimuni, vho neta fhedzi vho takala, vhahuweleli vhenevho vho vha vha tshi vhuyelela madenndeni kana rumuni dze vha tou hira. Nga u ya ha tshifhinga vho mbo ḓi ḓifhaṱela Goloi ya Vha-Colporteur, ine ya nga nnḓu nahone yo vha i tshi vha vhulungela tshifhinga na tshelede. *
U thoma nga 1893 buthanoni ḽa ngei Chicago ḽa Dzangano ḽa Vhagudi vha Bivhili vha Tshaka Dzoṱhe, mbekanyamushumo yo vha i tshi katela madzulo o khetheaho a vha-colporteur. Kha madzulo eneo ho vha hu tshi katelwa tshenzhelo dzavho, nḓila dza u huwelela dzine dza nga shumiswa, na nyeletshedzo dzi shumaho. Wahashu Russell o ṱuṱuwedza vhahuweleli vhenevho vhane vha shuma nga maanḓa uri vha ḽe zwiḽiwa zwo dziaho nga matsheloni, nga maṱavhelo vha nwe luvhisi, nahone musi hu tshi fhisa, vha nwe nyamunaithi i rotholaho.
Vha-colporteur vhane vha ṱoḓa mushumisani nae kana muthu ane vha ḓo huwelela nae, vho vha vha tshi ambara riboni ya ṱaḓa. Vha-colporteur vhaswa vho vha vha tshi shuma na vha re na tshenzhelo. Zwo vha zwi zwa ndeme uri vha gudiswe nga yeneyo nḓila nga nṱhani ha uri muṅwe mu-colporteur muswa o vhuya a ri musi a tshi ambelela bugu a ri: “Ndi fulufhela uri ni nga si ṱoḓe u vhona hedzi bugu?” Zwi takadzaho ndi uri onoyo ṋemuḓi o ṱoḓa u dzi vhona nahone a fheleledza e wahashu wa tshisadzini.
Muṅwe wahashu wa tshinnani o vha a tshi ḓivhudzisa uri, ‘Naa ndi fanela u bvela phanḓa na vhutshilo hanga ha u kapula mapfura nga lebula, nahone nda ṋeela nga dolara dza 1 000 nga ṅwaha, kana ndi fanela u vha mu-colporteur?’ O vhudzwa uri Murena o vha a tshi ḓo takalela zwiṅwe na zwiṅwe, fhedzi u ṋea Murena tshifhinga tshawe nga ho livhaho zwo vha zwi tshi ḓo mu ḓisela phaṱhutshedzo nnzhi. Mary Hinds o vhona mushumo wa vha-colporteur sa “yone nḓila ya khwine-khwine ya u itela vhathu vhanzhi nga maanḓa zwithu zwavhuḓi.” Alberta Crosby ene o ri, “lufuno lwanga lwa mushumo wa vhu-colporteur lu khou engedzea ḓuvha ḽiṅwe na ḽiṅwe.”
Ṋamusi, vhaḓuhulu vhanzhi vha lwa muya na vha ṋama vha vha-colporteur vha fhiseaho, na vhone vha tshee vho farelela kha ḽeneḽi ifa ḽavho ḽa lwa muya. Arali hu si na mu-colporteur kana muvulanḓila kha vha muṱa waṋu woṱhe, ndi ngani ni sa lingedzi u vha wa u thoma? Na inwi lufuno lwaṋu lwa mushumo wa u huwelela lu ḓo engedzea ḓuvha ḽiṅwe na ḽiṅwe.
[Ṱhaluso dzi re magumoni a siaṱari]
^ Nga murahu ha ṅwaha wa 1931, dzina “colporteur” ḽo shandulwa ha thoma u shumiswa ḽine ḽa ri “muvulanḓila.”
^ Zwidodombedzwa zwa malugana na goloi dzine dza nga nnḓu zwi ḓo haseledzwa kha khandiso dzi tevhelaho.
[Maipfi o ṱumbulwaho kha siaṱari 32]
Zwo vha zwi sa ṱoḓei uri vha vhe vho “funzeaho nga maanḓa, kana vha re na vhutsila, kana vhane vha konesa u amba”
[Tshifanyiso kha siaṱari 31]
Mu-Colporteur A. W. Osei ngei Ghana, hu ṱoḓaho u vha nga 1930
[Zwifanyiso kha siaṱari 32]
Tshifanyiso tsha nṱha: Vha-Colporteur Edith Keen na Gertrude Morris ngei England, hu ṱoḓaho u vha nga 1918; tsha nga fhasi: Stanley Cossaboom na Henry Nonkes ngei United States, vhe na mabogisi a si na tshithu e a vha o hwala bugu dze vha dzi tshimbidza
You May Also Like
TSHIINGAMO—TSHI GUDWAHO
Nḓila Ye Mbeu Ya Muvhuso Ya Zwaliwa Ngayo Ngei Portugal
Ndi khaedu dzifhio dze vhahuweleli vha ngei Portugal vha dzi kunda?
TSHIINGAMO—TSHI GUDWAHO
Nyambo Dza Khagala Dzo Phaḓaladza Mafhungo Maḓifha Ngei Ireland
Ndi mini zwe zwa ita uri C. T. Russell a vhe na vhungoho ha uri masimu o vha o “lugela u kaṋiwa”?
TSHIINGAMO—TSHI GUDWAHO
“Ḽiṅwe Guvhangano Ḽi Ḓo Vha Hone Lini?”
Ndi mini zwe zwa ita uri guvhangano ḽiṱuku ḽe ḽa vha hone Ḓoroboni ya ngei Mexico nga 1932, ḽi vhe ḽi swayeaho vhukuma?
TSHIINGAMO—TSHI GUDWAHO
“U Fhisea Nga Ho Engedzeaho Na U Vha Na Lufuno U Fhira Naho Hu Lini”
Nga murahu ha buthano nga 1922, Vhagudi vha Bivhili vho shumisa hani nyeletshedzo ine ya ri “ḓivhadzani Khosi na Muvhuso”?
TSHIINGAMO—TSHI GUDWAHO
“A Huna Nḓila I Sa Tshimbilei Kana Ndapfu Vhukuma”
Mafheloni a vho-1920 na mathomoni a vho-1930, vhavulanḓila vha fhiseaho vho sumbedza u ḓiimisela musi vha tshi ya u huwelela mafhungo maḓifha a Muvhuso wa Mudzimu fhethu hu re kule na ḓorobo ya ngei Australia.
TSHIINGAMO—TSHI GUDWAHO
“Vhahuweleli Vha Muvhuso Vha Ngei Britain—Fhaṱuwani!!”
A ho ngo vha na nyengedzeo kha tshivhalo tsha vhahuweleli vha Muvhuso vha ngei Britain lwa miṅwaha ya fumi! Ndi mini zwo itaho uri hu vhe na tshanduko?
