Mbudziso Dzi Bvaho Ha Vhavhali

Ri fanela u pfesesa hani mbalo dzi re kha muvhigo wa tshumelo wa ṅwaha?

Ṅwaha muṅwe na muṅwe ri lavhelela u vhona muvhigo wa tshumelo une wa gandiswa kha Yearbook. Zwi a nyanyula u vhona nḓila ine vhathu vha Yehova sa tshigwada vha khunyeledza ngayo mushumo wavho wa u huwelela nga ha Muvhuso na wa u funza shangoni ḽoṱhe. Fhedzi u itela u vhuyelwa vhukuma musi ri tshi sedza muvhigo wonoyo, ri fanela u pfesesa zwavhuḓi mbalo dzi re khawo nahone ri vhe na mavhonele o teaho nga hadzo. Kha ri ṱhogomele tsumbo dzo vhalaho.

Ṅwaha wa tshumelo. Ṅwaha wonoyo u thoma nga September u swika mafheloni a August ṅwaha u tevhelaho. Yearbook i vha i na muvhigo wa ṅwaha wo fhiraho wa tshumelo. Nga zwenezwo, 2011 Yearbook i na muvhigo wa ṅwaha wa tshumelo wa 2010, we wa thoma nga ḽa 1 September, 2009, u swika nga ḽa 31 August, 2010.

Vhahuweleli vhoṱhe, na mbalotshikati ya vhahuweleli. “Vhahuweleli” vha katela Ṱhanzi dza Yehova dzo lovhedzwaho na dzi songo lovhedzwaho dzine dza fanelea u vha vhahuweleli vha Muvhuso. “Vhahuweleli vhoṱhe” ndi tshivhalo tshoṱhe tsha vhahuweleli vhane vha vhiga nga ṅwedzi naho u ufhio nga ṅwaha wonoyo wa tshumelo nahone zwi nga katela na mivhigo ye ya swika nga murahu ha tshifhinga ye ya vha i songo katelwa kha muvhigo wa miṅwedzi yo fhiraho. Nga nṱhani ha zwenezwi, vhaṅwe vhahuweleli vha nga vhaliwa luvhili. Naho zwo ralo, tshivhalo tshoṱhe tsha vhahuweleli a tshi kateli vhahuweleli vhe vha ya vhuḓinḓani fhedzi vha hangwa u dzhenisa mivhigo yavho. Zwenezwi zwi ombedzela ndeme ya uri muhuweleli muṅwe na muṅwe a dzhenise muvhigo wawe nga u ṱavhanya ṅwedzi muṅwe na muṅwe. “Mbalotshikati ya vhahuweleli” ndi tshivhalo tsha vhahuweleli vho fhamba-fhambanaho vhane vha vhiga tshumelo yavho ṅwedzi muṅwe na muṅwe.

Awara dzoṱhe. U ya nga 2011 Yearbook, Ṱhanzi dza Yehova vho fhedza awara dzi fhiraho bilioni dza 1,6 vhuḓinḓani ha tsimu. Naho zwo ralo, mbalo yeneyi a i kateli awara dzoṱhe dzine ra dzi fhedza kha vhurabeli hashu, samusi i sa kateli tshifhinga tshine ra tshi fhedza kha nyendo dza vhulisa, tsha u vha hone miṱanganoni, na u fara pfunzo ya muthu nga eṱhe na tsha u elekanya.

Tshelede ine ya shumiswa. Nga ṅwaha wa tshumelo wa 2010, Ṱhanzi dza Yehova vho shumisa tshelede i fhiraho bilioni nthihi ya dzirannda vha tshi khou ṱhogomela vhavulanḓila vho khetheaho, vharumiwa, na vhalavhelesi vha dalelaho kha mishumo yavho ya tshumelo ya tsimu. Naho zwo ralo, mbalo yeneyi a i kateli tshelede ya u gandisa khandiso dzo thewaho Bivhilini, kana tshelede ine ya shumiswa u itela u ṱhogomela vhashumi vha u ḓifunela vha Bethele vha fhiraho 20 000 vha re zwifhaṱoni zwa madavhi shangoni ḽoṱhe.

Vhane vha ḽa zwiga Tshihumbudzoni. Tshivhalo tshenetshi tshi katela vhathu vho lovhedzwaho vhane vha ḽa zwiga Tshihumbudzoni shangoni ḽoṱhe. Naa tshivhalo tshenetshi tshi imela vhaḓodzwa vhoṱhe vhane vha kha ḓi vha hone kha ḽifhasi? A zwo ngo tou ralo. Hu na zwithu zwo vhalaho zwine zwa shela mulenzhe—u katela na zwe muthu a vha a tshi zwi tenda tshifhingani tsho fhiraho kana u thithisea muhumbuloni na kha maḓipfele—zwine zwa nga ita uri vhaṅwe vha humbule u nga vho vhidzelwa uri vha tshile ṱaḓulu. Nga zwenezwo, a ri na vhuṱanzi ho ḓalaho ha uri hu na vhaḓodzwa vhangana vha re kha ḽifhasi, nahone a zwi ṱoḓei uri ri zwi ḓivhe. Tshigwada tshi Langaho a tshi ṅwali fhasi mutevhe wa vhane vha ḽa zwiga, ngauri a tshi davhidzani na vhaḓodzwa vhoṱhe vha re shangoni ḽoṱhe. *

Zwine ra zwi ḓivha ndi zwa uri hu ḓo vha na vhaṅwe vhaḓodzwa vhane vha ḓo vha “vhalanda vha Mudzimu washu” kha ḽifhasi musi hu tshi ḓa maḓumbu a vhudzulaho a maṱungu mahulu. (Ndzumb. 7:1-3) U swikela nga tshenetsho tshifhinga, vhaḓodzwa vha ḓo ranga phanḓa kha mushumo wa tshumelo wo vhigwaho zwavhuḓi—mushumo muhulwane wa u huwelela na u funza kha ḓivhazwakale ya vhathu.

[Ṱhaluso i re magumoni a siaṱari]