U Ḓivhadza Khandiso Ya Tshiingamo tsha Luisimane Lu sa Konḓi

RI TAKALELA u ni ḓivhadza uri lwa ṅwaha muthihi fhedzi hu ḓo vha na khandiso ya Tshiingamo tsha Luisimane lu sa konḓi, u thoma kha khandiso yeneyi ya magazini u gudwaho, nahone i ḓo gandiswa ṅwedzi muṅwe na muṅwe. I ḓo vha na thero dzi gudwaho, nahone arali zwi tshi konadzea, hu ḓo vha na dziṅwe thero. Ri fulufhela uri khandiso yeneyi i ḓo vhuyedza vhukuma nga lwa muya Ṱhanzi nnzhi dza Yehova. Ndi ngani ri tshi ralo?

Luisimane ndi luambo lwo ḓoweleaho kha vhathu vhanzhi vha mashangoni a ngaho Fiji, Ghana, Kenya, Liberia, Nigeria, Papua New Guinea na Solomon Islands. Naho vhahashu vha mashangoni enea vha tshi amba nyambo dza hune vha dzula hone, vha anzela u shumisa Luisimane musi vha tshi davhidzana na vhaṅwe ḓuvha ḽiṅwe na ḽiṅwe na musi vhe miṱanganoni ya tshivhidzo na vhuḓinḓani ha tsimu. Naho zwo ralo, vha amba Luisimane lu sa konḓi lwo fhambanaho vhukuma na lune lwa shumuswa khandisoni dzashu. Zwiṅwe hafhu, hu na vhaṅwe vhathu vha Yehova vhe vha pfulutshela mashangoni ane a shumisa Luisimane sa luambo lune ha davhidzanwa ngalwo nahone vha a kombetshedzea u shumisa Luisimane naho vha sa lu ḓivhi zwavhuḓi. Zwiṅwe hafhu, a vha koni u ya miṱanganoni ine ya farwa nga luambo lwavho lwa ḓamuni.

Thero dzine dza ḓo haseledzwa vhege iṅwe na iṅwe kha Pfunzo ya Tshiingamo ndi dza ndeme vhukuma u itela u ri fusha nga lwa muya nga tshikhathi tsho teaho. Nga zwenezwo, u itela uri vhoṱhe vha re hone kha pfunzo yeneyo vha vhuyelwe, ho dzudzanywa khandiso ya Luisimane lu sa konḓi i shumisaho maipfi na luambo lu sa konḓi. Yeneyi khandiso ntswa i ḓo vha na gwati ḽi sa fani ḽa yo ḓoweleaho. Zwiṱohwana, dziphara na mbudziso dza u vusulusa na zwifanyiso zwi re kha thero dzi gudwaho zwi ḓo tshimbidzana na zwa khandiso yo ḓoweleaho. Nga zwenezwo, vhathu vhoṱhe vha nga kona u tshimbidzana kha Pfunzo ya Tshiingamo hu sa londwi uri vho fara kopi ifhio. U itela u vhona phambano i re hone kha khandiso dzenedzi mbili, sedzani tsumbo i re afho fhasi i bvaho kha phara 2 ya thero i gudwaho ya u thoma kha khandiso yeneyi.

Ri fulufhela uri yeneyi ndugiselelo ntswa i ḓo fhindula thabelo dza vhanzhi vhe vha vhudza Yehova vha ri: “Mpfunze-ha ndi ḓivhe zwiné wa zwi funa.” (Ps. 119:73) Ri na vhungoho ha uri yeneyi khandiso ya Luisimane lu sa konḓi i ḓo vhuyedza vhukuma vhane vha sa ḓivhe zwavhuḓi Luisimane na vhane Luisimane lwa si vhe luambo lwavho lwa ḓamuni, u katela na vhana vhaṱuku vhane vha amba Luisimane uri vhoṱhe vha kone u lugiselela zwavhuḓi Pfunzo ya Tshiingamo ya vhege iṅwe na iṅwe. Ri livhuha Yehova nga nṱhani ha u ‘funa hawe vhahashu vha shangoni ḽoṱhe,’ nahone u khou shumisa “mukoma a fulufhedzeaho na wa vhuṱali” u itela u ri ṋea zwiḽiwa zwinzhi zwa lwa muya.—1 Pet. 2:17; Mat. 24:45.

Tshigwada tshi Langaho tsha Ṱhanzi dza Yehova