Mbudziso Dzi Bvaho Ha Vhavhali

Ndi ngani Mushe o sinyutshela Eleasara na Ithamara vharwa vha Aroni musi vhakomana vhavho Nadaba na Abihu vho no fa, nahone ndi mini zwe zwa ita uri a songo tsha sinyuwa?—Lev. 10:16-20.

Nga u ṱavhanya nga murahu ha u vhewa ha vhotshifhe u ri vha ite tshumelo nḓuni ya mulanga, Yehova o vhulaha Nadaba na Abihu vharwa vha Aroni, nga ṅwambo wa uri vho vha vho ḓisa mulilo u sili phanḓa Hawe. (Lev. 10:1, 2) Mushe o vhudza vharwa vha Aroni vhe vha vha tshi kha ḓi tshila uri vha songo lilela vhakomana vhavho vho faho. Nga u ṱavhanya nga murahu ha zwenezwo, Mushe o sinyutshela Eleasara na Ithamara nga ṅwambo wa uri a vho ngo ḽa mbokoṱo ya tshipfumelelo. (Lev. 9:3) Ndi ngani Mushe o sinyuwa nga nḓila yeneyo?

Milayo ye Yehova a i ṋea Mushe yo vha i tshi amba uri tshifhe ane a ṋekedza tshiṱhavhelo tsha tshipfumelelo o vha a tshi fanela u ḽa tshipiḓa tsha tshiṱhavhelo tshenetsho muṱani wa nnḓu ya mulanga. U ita zwenezwo zwo vha zwi tshi sumbedza u hangwelwa ha zwivhi zwa we a ṋekedza tshiṱhavhelo. Naho zwo ralo, arali maṅwe malofha a tshiṱhavhelo tshenetsho a iswa Fhethu Hukhethwa, kha tshipiḓa tsha u thoma tsha nḓuni khethwa, tshiṱhavhelo tshenetsho tsho vha tshi songo fanela u ḽiwa. Fhedzi tsho vha tshi tshi fanelwa u fhiswa.—Lev. 6:17-19, 23.

Zwi vhonala u nga nga murahu ha zwiitea zwenezwo zwi vhavhaho zwa ḽeneḽo ḓuvha, Mushe o vhona zwi tshi ṱoḓea uri a ite vhungoho ha uri milayo yoṱhe ya Yehova yo tevhedzwa. Musi a tshi wana uri mbokoṱo ya tshipfumelelo yo fhisiwa, o sinyuwa vhukuma nahone a vhudzisa Eleasara na Ithamara uri ndi ngani vha songo ḽa tshiṱhavhelo tshenetsho samusi vho vha vho fanela u ita nga u ralo, ngauri malofha a tshiṱhavhelo tshenetsho o vha a songo ṋekedzwa phanḓa ha Yehova Fhethu Hukhethwa.—Lev. 10:17, 18.

Aroni ndi ene we a fhindula mbudziso ya Mushe samusi zwo vha zwi tshi tou vha khagala uri vhotshifhe vhenevho vho salaho vho ita nyito yeneyo nge vha tendelwa ngae. Khamusi Aroni o ḓivhudzisa arali lutendo lwa vhaṅwe vhotshifhe vho salaho lwo vha lu tshi nga vha vhofholola uri vha ḽe tshiṱhavhelo tshenetsho nga ḓuvha ḽeneḽo samusi vharwa vhawe vhavhili vho vha vho vhulahwa. Khamusi o vha a tshi vhona u nga u ḽa havho tshiṱhavhelo tshenetsho, zwo vha zwi sa ḓo takadza Yehova naho vho vha vhe sa vhonwi mulandu nga ho livhaho wa tshivhi tsha Nadaba na Abihu.—Lev. 10:19.

Khamusi Aroni o humbula uri nga ḓuvha ḽe vha muṱa wawe vha thoma ngaḽo u ita mishumo yavho ya vhutshifhe, vho vha vho fanela u ṱhogomela nga vhuronwane u itela uri vha kone u tevhedza zwidodombedzwa zwoṱhe zwa mulayo nga nḓila ine ya ḓo takadza Mudzimu. Naho zwo ralo, Nadaba na Abihu vho nyadzisa dzina ḽa Yehova nahone vha welwa nga mbiti dzawe. Nga zwenezwo, Aroni a nga kha ḓi vha o humbula uri miraḓo ya muṱa wa vhotshifhe ye ya ita tshivhi tsho raloho yo vha i songo fanela u ḽa tshiṱhavhelo tshikhethwa.

Zwi vhonala u nga Mushe o ṱanganedza phindulo ya mukomana wawe nga ṅwambo wa uri ndima yeneyo i phetha nga uri: “Mushe a tshi zwi pfa, a wana ó ita zwone.” (Lev. 10:20) Zwi vhonala u nga Yehova na ene o ṱanganedza phindulo ya Aroni.