Vhuthu Ha Yehova Ndi Vhuhulu
Vhuthu Ha Yehova Ndi Vhuhulu
‘Vhuthu ha Yehova ndi vhuhulu.’—PSALME YA 145:8.
1. Lufuno lwa Mudzimu ndi luhulwane lungafhani?
“MUDZIMU ndi Ene lufuno.” (1 Yohane 4:8) Eneo maipfi a kwamaho a sumbedza uri nḓila ya Yehova ya u vhusa yo thewa kha lufuno. Ee, na vhathu vhane vha sa mu thetshelese vha a vhuyelwa nga ḓuvha na mvula zwine a zwi ṋea nga lufuno! (Mateo 5:44, 45) Nga ṅwambo wa u funa ha Mudzimu vhathu, na maswina awe ane a rembuluwa, a ya khae, a nga wana vhutshilo vhu sa fheli. (Yohane 3:16) Naho zwo ralo, hu si kale Yehova u ḓo fhelisa vhaitazwivhi vha sa rembuluwi u itela uri vhathu vhane vha mu funa vha ḓiphine nga vhutshilo vhu sa fheli shangoni ḽiswa ḽo lugaho.—Psalme ya 37:9-11, 29; 2 Petro 3:13.
2. Ndi sia ḽifhio ḽa lufuno ḽo khetheaho ḽine Yehova a ḽi sumbedza vhe vha ḓiṋekedza khae?
2 Yehova u sumbedza lufuno vhagwadameli vhawe nga nḓila khulwane, na ya tshoṱhe. Lwonolo lufuno lu sumbedzwa nga ipfi ḽa Luheberu ḽo ṱalutshedzelwaho nga uri “vhuthu,” kana “lufuno lwa vhukuma.” Khosi Davida wa Isiraele ḽa kale o vha a tshi dzhiela nṱha vhukuma vhuthu ha Mudzimu. Nga ṅwambo wa zwe a ṱangana nazwo na u elekanya hawe nga nḓila ine Mudzimu a shumisana ngayo na vhaṅwe, Davida o imba e na fulufhelo: ‘Vhuthu [kana, “lufuno lwa vhukuma,” NW] ha Yehova ndi vhuhulu.’—Psalme ya 145:8.
U Ṱalula Vhavhuya Vha Mudzimu
3, 4. (a) Psalme ya 145 i ri thusa hani u ṱalula vhavhuya vha Yehova? (b) Vhavhuya vha Mudzimu vha mu “renda” hani?
3 Malugana na Yehova Mudzimu, Hanna mme a muporofita Samuele, o ri: “Milenzhe ya vhavhuya vhawe u a i londota.” (1 Samuele 2:9) Ndi vhafhio vhenevho “vhavhuya”? Khosi Davida u a fhindula. Nga murahu o no renda pfaneleo dza Yehova dzi mangadzaho, o ri: “Vhavhuya vhau vha a U renda.” (Psalme ya 145:10) Vhathu vha nga renda hani Mudzimu? Vha ita ngauralo zwihuluhulu nga u amba zwavhuḓi nga hae.
4 Vhavhuya vha Yehova vha nga ṱalulwa sa vhane vha shumisa milomo yavho u amba zwavhuḓi ngae. Ndi mafhungo afhio ane vha anzela u a haseledza maguvhangano a u ḓimvumvusa na miṱanganoni ya Vhukriste? Zwi khagala uri ndi a Muvhuso wa Yehova! Vhashumeli vha Mudzimu vha fulufhedzeaho vha na maḓipfele a fanaho na a Davida, we a imba a ri: “Vha amba vhurena ha vhuhosi hau [Yehova], vha bula maanḓa mahulu au.”—Psalme ya 145:11.
5. Ri zwi ḓivha hani uri Yehova u a thetshelesa musi vhavhuya vhawe vha tshi amba zwavhuḓi nga hae?
5 Naa Yehova u a thetshelesa musi vhavhuya vhawe vha tshi mu renda? Ee, u a thetshelesa zwine vha zwi amba. Kha vhuporofita vhu tshimbidzanaho na vhagwadameli vha ngoho vha misini yashu, Maleaxi o ṅwala a ri: “Vha ofhaho Mudzimu, vhone zwenezwo nga tshavho vha amba vha vhudzana vha ri: Yehova u a sedza, u a pfa, o ṅwala bugu ya u mu eletshedza vha ofhaho Yehova, na vha sá hangwi dzina ḽawe.” (Maleaxi 3:16) Zwi takadza nga maanḓa Yehova musi vhavhuya vhawe vha tshi amba zwavhuḓi ngae, nahone u a vha humbula.
6. Ndi mushumo ufhio une wa ri thusa u ṱalula vhavhuya vha Mudzimu?
6 Vhashumeli vha Yehova vha fulufhedzeaho vha nga dovha vha ṱalulwa nga u vha havho na tshivhindi na u shumisa zwibuli nga vhuḓalo u itela u amba na vhathu vhane vha si vhe vhagwadameli vha Mudzimu wa ngoho. I ngoho, vhavhuya vha Mudzimu, vha “ḓivhisa vhana vha vhathu maanḓa mahulu au na madzanga mahulu a vhuhosi hau.” (Psalme ya 145:12) Naa ni a ṱoḓa zwibuli nahone na zwi shumisa nga vhuḓalo u itela u amba na vha sa tendi nga ha vhuhosi ha Yehova? U fhambana na mivhuso ya vhathu, ine hu si kale ya ḓo fheliswa, vhuhosi hawe ndi ha lini na lini. (1 Timotheo 1:17) Zwo ṱavhanyiswa uri vhathu vha gude nga ha vhuhosi ha Yehova vhu sa fheli na u vha vhatikedzi vhaho. Davida o imba a ri: “Vhuhosi hau ndi ha kale na kale na lini na lini; muvhuso wau ndi wa mirafho na mirafho yoṱhe.”—Psalme ya 145:13.
7, 8. Ho itea mini nga 1914, nahone ndi vhuṱanzi vhufhio vhu re hone vhu sumbedzaho uri Mudzimu zwino u khou vhusa a tshi shumisa Muvhuso wa Murwa wawe?
7 U bva nga 1914, ho dovha ha vha na tshiṅwe tshiitisi tsha u amba nga ha vhuhosi ha Yehova. Nga wonoyo ṅwaha, Mudzimu o tika Muvhuso wa Vhumessia wa ṱaḓulu, hune Khosi ya vha Yesu Kristo, Murwa wa Davida. Nga zwenezwo Yehova o ḓadzisa fulufhedziso ḽawe ḽa uri u ḓo khwaṱhisa vhuhosi ha Davida ha vha ha lini na lini.—2 Samuele 7:12, 13; Luka 1:32, 33.
8 Vhuṱanzi ha uri Yehova zwino u khou vhusa a tshi shumisa Muvhuso wa Murwa wawe, Yesu Kristo, vhu vhonala nga u ḓadzea hu bvelaho phanḓa ha tshiga tsha u vha hone ha Yesu. Mbonalo i swayeaho vhukuma ya tshenetsho tshiga ndi mushumo we Yesu a dzula o amba ngawo uri u ḓo itwa nga vhavhuya vha Mudzimu vhoṱhe musi a tshi ri: “Huno mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe. Ndi hone hu tshi ḓo ḓa vhufhelo.” (Mateo 24:3-14) Nga ṅwambo wa uri vhavhuya vha Mudzimu vha khou ḓadzisa nga mafulufulu honoho vhuporofita, vhanna, vhafumakadzi, na vhana vha fhiraho milioni dza rathi zwino vha khou ita wonoyu mushumo muhulwane, une wa sa tsha ḓo dovhololwa. Hu si kale vhapikisi vhoṱhe vha Muvhuso wa Yehova vha ḓo fheliswa.—Ndzumbululo 11:15, 18.
U Vhuyelwa Nga Vhuvhusahoṱhe Ha Yehova
9, 10. Ndi phambano ifhio i re hone vhukati ha Yehova na vhavhusi vha vhathu?
9 Arali ri Vhakriste vho ḓiṋekedzaho, vhushaka hashu na Murena Muvhusahoṱhe Yehova vhu ri ḓisela mbuyelo nnzhi. (Psalme ya 71:5; 116:12) Sa tsumbo, nga ṅwambo wa uri ri ofha Mudzimu na u ita zwivhuya, ri a ḓiphina na u takalelwa ngae nahone ri vha tsini nae nga lwa muya. (Mishumo 10:34, 35; Yakobo 4:8) Zwo fhambanaho na zwenezwo, vhavhusi vha vhathu kanzhi vha vhoniwa vha tshi khou tshimbila na vhathu vha vhuimo ha nṱha, vha ngaho vharangaphanḓa vha mmbi, vhoramabindu vho pfumaho, kana vhathu vha re na bvumo kha zwa mitambo na zwa u ḓimvumvusa. U ya nga gurannḓa ya Afurika ine ya pfi Sowetan, mushumeli wa muvhuso a re na vhuimo ha nṱha o amba zwi tevhelaho nga ha vhupo ho tshinyadzwaho nga vhushai kha shango ḽa hawe: “Ndi a pfesesa uri ndi ngani vhunzhi hashu ri sa ṱoḓi u ya henefho fhethu. Ndi nga ṅwambo wa uri ri khou ṱoḓa u hangwa uri hu na zwiimo zwo raloho. Zwi a dina luvalo lwashu nahone ri pfa ri tshi shona nga ṅwambo wa [dzigoloi] dzi ḓuraho dzine ra dzi reila.”
10 Vhukuma, vhaṅwe vhavhusi vha vhathu vha a vhilaela zwa vhukuma nga ha matshilele a vhalanda vhavho. Fhedzi na vha re na vhuimo ha nṱha vhukati havho a vha ḓivhi vhalanda vhavho zwavhuḓi. I ngoho, ri nga vhudzisa: Naa hu na muvhusi ane a ṱhogomela nga maanḓa vhalanda vhawe vhoṱhe lune a thusa nga u ṱavhanya muṅwe na muṅwe wavho zwifhingani zwa khombo? Ee, u hone. Davida o ṅwala a ri: “Yehova u tika vhoṱhe vha waho; u vusa vhoṱhe vho tsikiwaho.”—Psalme ya 145:14.
11. Ndi milingo ifhio ine ya bvelela kha vhavhuya vha Mudzimu, nahone ndi thuso ifhio ine vha i wana?
11 Milingo na maṱhupho manzhi zwi a bvelela kha vhavhuya vha Yehova Mudzimu nga ṅwambo wa vhushayanungo havho na ngauri vha tshila shangoni ḽi re maanḓani a Sathane, “Muvhi.” (1 Yohane 5:19; Psalme ya 34:19) Vhakriste vha a tovholwa. Vhaṅwe vha shengela nga ṅwambo wa vhulwadze vhu sa fholi kana u felwa nga vhane vha vha funa. Nga zwiṅwe zwifhinga, vhukhakhi ha vhavhuya vha Yehova vhu nga vha ita uri vha ‘tsikeledzee’ nga u kulea nungo. Naho zwo ralo, mulingo muṅwe na muṅwe une wa vha wela, Yehova u dzula o ḓiimisela tshifhinga tshoṱhe u ṋea khuthadzo na u khwaṱhisa muyani muṅwe na muṅwe wavho. Khosi Yesu Kristo u na dzangalelo ḽi fanaho ḽa u funa vhashumeli vhawe.—Psalme ya 72:12-14.
Zwiḽiwa Zwi Fushaho Nga Tshifhinga Tshazwo
12, 13. Yehova u ṱhogomela hani zwavhuḓi ṱhoḓea dza “zwoṱhe zwi tshilaho”?
12 Nga ṅwambo wa vhuthu hawe vhuhulu, Yehova u ṱhogomela ṱhoḓea dzoṱhe dza vhashumeli vhawe. Hezwi zwi katela u vha kanzwa nga zwiḽiwa zwi fushaho. Khosi Davida o ṅwala a ri: “Maṱo a vhoṱhe o lavhelesa Iwe [Yehova]; ndi Iwe U vha ṋeaho zwiḽiwa nga tshifhinga tshazwo. U putulula tshanḓa tshau, huno zwoṱhe zwi tshilaho U zwi fusha dakalo.” (Psalme ya 145:15, 16) Na zwifhingani zwa khombo, Yehova a nga dzudzanya mafhungo u itela uri vhavhuya vhawe vha wane ‘vhuswa ho linganaho.’—Luka 11:3; 12:29, 30.
13 Davida o amba uri “zwoṱhe zwi tshilaho” zwi a fushwa. Hu katelwa na zwipuka. Arali hu vhe hu songo ḓala zwimela kha ḽifhasi na lwanzheni, zwivhumbwa zwa maḓini, zwiṋoni, na zwipuka zwi tshilaho shangoni zwo vha zwi sa ḓo wana okosidzheni u itela u fema kana zwiḽiwa zwa u ḽa. (Psalme ya 104:14) Naho zwo ralo, Yehova u ita vhungoho ha uri zwi a fushwa kha ṱhoḓea dzazwo dzoṱhe.
14, 15. Zwiḽiwa zwa muya zwi khou ṋekedzwa hani ṋamusi?
14 U fhambana na zwipuka, vhathu vha na ṱhoḓea ya muya. (Mateo 5:3) Yehova u fusha ṱhoḓea dza vhavhuya vhawe nga nḓila i mangadzaho! Nga phanḓa ha lufu lwawe, Yesu o fulufhedzisa uri “mukoma a fulufhedzeaho na wa vhuṱali” u ḓo ṋekedza vhatevheli vha Yesu ‘zwiḽiwa zwa muya nga tshikhathi tshazwo.’ (Mateo 24:45) Vha masalela a vho ḓodzwaho vha 144000 vha vhumba tshenetsho tshigwada tsha mukoma ṋamusi. A tshi shumisa tshenetsho tshigwada, Yehova o ṋekedza zwiḽiwa zwa muya nga vhuḓalo.
15 Sa tsumbo, vhunzhi ha vhathu vha Yehova zwino vha vhuyelwa nga ṱhalutshedzelo ntswa na yo teaho ya Bivhili nga luambo lwavho. New World Translation of the Holy Scriptures ndi phaṱhutshedzo i mangadzaho lungafhani! Zwiṅwe hafhu, zwithusi zwa u guda Bivhili zwa dzimilioni zwi bvela phanḓa zwi tshi gandiswa nga nyambo dzi fhiraho 300. Zwenezwi zwiḽiwa zwoṱhe zwa muya ndi phaṱhutshedzo kha vhagwadameli vha ngoho ḽifhasini ḽoṱhe. Ndi nnyi ane a fanela u khoḓwa kha zwenezwi zwithu zwoṱhe? Ndi Yehova Mudzimu. Nga vhuthu hawe vhuhulu, o ita uri zwi konadzee uri tshigwada tsha mukoma tshi ṋekedze “zwiḽiwa nga tshifhinga tshazwo.” Nga ṅwambo wa dzenedzo ndugiselelo, ‘u fusha zwoṱhe zwi tshilaho’ kha ino paradiso ya muya. Nahone vhashumeli vha Yehova vha takalela lungafhani fulufhelo ḽa u vhona ḽifhasi ḽi tshi shandulwa hu si kale ḽa vha paradiso ya vhukuma!—Luka 23:42, 43.
16, 17. (a) Ndi tsumbo dzifhio dzi re hone dza zwiḽiwa zwa muya zwine zwa vha hone nga tshifhinga tshazwo? (b) Psalme ya 145 i sumbedza hani maḓipfele a vhavhuya vha Mudzimu malugana na khani yo vuswaho nga Sathane?
16 Ṱhogomelani tsumbo i swayeaho vhukuma ya zwiḽiwa zwa muya zwi waniwaho nga tshifhinga tshazwo. Nga ṅwaha wa 1939, ho thoma Nndwa ya Shango ya Vhuvhili ngei Yuropa. Nga wonoyo ṅwaha, khandiso ya Tshiingamo tsha ḽa 1 November yo vha i na thero ine ya ri “U Sa Dzhia Sia.” Nga ṅwambo wa mafhungo a pfalaho o ṅwaliwaho khayo, Ṱhanzi dza Yehova shangoni ḽoṱhe dzo vhona ṱhoḓea ya u sa dzhia sia kha mishumo ya dzitshaka dze dza vha dzi khou lwa. Zwenezwi zwo ita uri mivhuso i vha sinyutshele kha yeneyo miṅwaha ya rathi ya nndwa. Naho zwo ralo, hu sa londwi u thivhelwa na u tovholwa, vhavhuya vha Mudzimu vho bvela phanḓa u huwelela mafhungo maḓifha a Muvhuso. U bva nga 1939 u swika nga 1946, vho fhaṱutshedzwa nga nyengedzeo i mangadzaho ya phesenthe dza 157. Zwiṅwe hafhu, rekhodo yavho i swayeaho ya u fulufhedzea tshifhingani tsha nndwa yo bvela phanḓa u thusa vhathu u ṱalula vhurereli ha ngoho.—Yesaya 2:2-4.
17 Zwiḽiwa zwa muya zwine Yehova a zwi ṋekedza a zwiho tshifhingani fhedzi, fhedzi zwi dovha zwa fusha vhukuma. Musi dzitshaka dzi tshi khou lwa tshifhingani tsha Nndwa ya Vhuvhili ya Shango, vhathu vha Yehova vho thuswa u livhisa ṱhogomelo kha tshiṅwe tshithu tsha ndeme vhukuma u fhira u tshidzwa havho. Yehova o vha thusa u pfesesa khani khulwane, ine ya katela fhethu hoṱhe, i tshimbidzanaho na vhuvhusahoṱhe ha Yehova ho lugaho. Zwi a fusha vhukuma u ḓivha uri nga u fulufhedzea havho, Ṱhanzi ya Yehova iṅwe na iṅwe i na mukovhe muṱuku kha u lwelwa ha vhuvhusahoṱhe ha Yehova na u sumbedza uri Diabolo ndi muzwifhi! (Mirero 27:11) U fhambana na Sathane, we a sola Yehova na nḓila yawe ya u vhusa, vhavhuya vha Yehova vha bvela phanḓa vha tshi ḓivhadza khagala uri: “Yehova kha nḓila dzawe dzoṱhe u a lulamisa.”—Psalme ya 145:17.
18. Ndi ifhio tsumbo i re hone ya zwenezwino ya zwiḽiwa zwa muya nga tshifhinga tshazwo na zwi fushaho?
18 Iṅwe tsumbo ya zwiḽiwa zwa muya zwi re tshifhingani na zwi fushaho, ndi bugu ine ya pfi Sendelani Tsini Na Yehova, ye ya bviswa kha Mabuthano a Tshiṱiriki a maḓana a “Vhahuweleli Vha Fhiseaho Vha Muvhuso” o farwaho shangoni ḽoṱhe nga 2002/03. Yeneyi bugu, yo bveledzwaho nga “mukoma a fulufhedzeaho na wa vhuṱali” na u gandiswa nga Ṱhanzi dza Yehova, i livhisa ṱhogomelo kha pfaneleo dzavhuḓi dza Yehova Mudzimu, u katela na dzo bulwaho kha Psalme ya 145. Yeneyi bugu yavhuḓi vhukuma i ḓo ita mushumo wa ndeme kha u thusa vhavhuya vha Mudzimu u sendela tsini-tsini nae.
Ndi Tshifhinga Tsha U Sendela Tsini-tsini Na Yehova
19. Ndi tshifhinga tshifhio tsha ndeme tshi re tsini, nahone ri nga sedzana hani natsho?
19 Tshifhinga tsha ndeme tsha u dzudzanya khani ya vhuvhusahoṱhe ha Yehova tshi khou sendela. Samusi zwo dzula zwo ambiwa kha Hesekiele ndima ya 38, hu si kale Sathane u ḓo khunyeledza mushumo wawe sa “Gogo kha ḽa Magogo.” Hezwi zwi ḓo katela u vutshelwa ha vhathu vha Yehova shangoni ḽoṱhe. I ḓo vha ndingedzo khulwane ya Sathane ya u fhelisa u fulufhedzea ha vhavhuya vha Mudzimu. U fhira naho hu lini, vhagwadameli vha Yehova vha fanela u mu vhidzelela nga mafulufulu, na u humbela u thuswa. Naa u ofha havho Mudzimu ho raloho na u mu funa zwi ḓo vha mahandana? Na khathihi, ngauri Psalme ya 145 i ri: “Yehova u tsini na vhoṱhe vhané vha mu vhidza, vhoṱhe vhané vha mu vhidza nga ngoho. Zwiné a ita ndi u tonda vhané vha mu ofha; zwililo zwavho u a zwi pfa a vha tshidza. Yehova u linda vhoṱhe vhané vha mu funa; hone, vhavhi vhoṱhe u a vha lozwa.”—Psalme ya 145:18-20.
20. Maipfi a Psalme ya 145:18-20 a ḓo ḓadzea hani tshifhingani tshi ḓaho?
20 Zwi ḓo nyanyula lungafhani u vha tsini na Yehova na maanḓa awe a tshidzaho musi a tshi fhelisa vhavhi vhoṱhe! Nga tshenetsho tshifhinga tsha ndeme, hune zwino tsha vha tsini, Yehova u ḓo thetshelesa fhedzi vhane “vha mu vhidza nga ngoho.” A nga si thetshelese vhadziamuhoyo. Ipfi ḽa Mudzimu ḽi sumbedza zwavhuḓi uri phetho ya muitazwivhi nga tshifhinga tsha u fhedzisa i ḓo vha mahandana.—Mirero 1:28, 29; Mixa 3:4; Luka 13:24, 25.
21. Vhavhuya vha Yehova vha sumbedza hani uri vha ḓiphina nga u shumisa dzina ḽa Mudzimu?
21 Zwo ṱavhanyiswa vhukuma kha havho vhane vha ofha Yehova u “mu vhidza nga ngoho.” Vhavhuya vhawe vha ḓiphina nga u shumisa dzina ḽawe thabeloni dzavho na musi vha tshi fhindula miṱanganoni yavho. Vha shumisa dzina ḽa Mudzimu kha vhudavhidzano havho. Nahone vha ḓivhadza dzina ḽa Yehova nga tshivhindi vhuḓinḓani havho ha khagala.—Vha-Roma 10:10, 13-15.
22. Ndi ngani zwi zwa ndeme u dzula ri tshi lwisana na mavhonele na nyemulo zwa shango?
22 U itela u bvela phanḓa ri tshi vhuyelwa nga vhushaka hashu ha u vha tsini na Yehova Mudzimu, zwi dovha zwa vha zwa ndeme u bvela phanḓa ri tshi lwisana na zwithu zwi tshinyaho vhumuya zwi ngaho zwithu zwi vhonalaho, u ḓimvumvusa hu songo kunaho, u kundelwa u hangwela vhaṅwe, kana u sa pfela vhuṱungu vha shayaho. (1 Yohane 2:15-17; 3:15-17) Arali zwa sa lugiswa, eneo madzangalelo na nḓowelo zwi nga ita uri ri ite tshivhi tshihulwane nahone mafheleloni ri si tsha takalelwa nga Yehova. (1 Yohane 2:1, 2; 3:6) Ndi buḓo ḽa vhuṱali u humbula uri Yehova u ḓo bvela phanḓa a tshi ri sumbedza vhuthu, kana lufuno lwa vhukuma, arali fhedzi ra dzula ri tshi fulufhedzea khae.—2 Samuele 22:26.
23. Ndi vhumatshelo vhufhio havhuḓi ho lindelaho vhavhuya vhoṱhe vha Mudzimu?
23 Nga zwenezwo kha ri dzule ri tshi humbula nga vhumatshelo havhuḓi ho lindelaho vhavhuya vhoṱhe vha Yehova. Nga u ita ngauralo, ri ḓo vha na tshilavhelelwa tshavhuḓi tsha u katelwa vhukati ha vhane vha hulisa, u khoḓa, na u renda Yehova “misi yoṱhe” nahone “lini na lini lu sa gumi.” (Psalme ya 145:1, 2) U nga ri ri nga ‘dzula ri lufunoni lwa Mudzimu ri na mavhonele a vhutshilo vhu sa fheli.’ (Yuda 20, 21) Musi ri tshi khou bvela phanḓa u vhuyelwa nga pfaneleo dzavhuḓi dza Khotsi ashu wa ṱaḓulu, u katela na vhuthu vhuhulu vhune a vhu sumbedza vhane vha mu funa, u nga ri misi yoṱhe ri nga sumbedza maḓipfele a fanaho na o sumbedzwaho nga Davida kha maipfi a u fhedza a Psalme ya 145: “Mulomo wanga nga u ambe thendo dza Yehova; vhathu vhoṱhe nga vha khoḓe dzina ḽawe ḽikhethwa, zwino na lini na lini.”
Ni Ḓo Fhindula Hani?
• Psalme ya 145 i ri thusa hani u ṱalula vhavhuya vha Mudzimu?
• Yehova u ‘fusha zwoṱhe zwi tshilaho’ nga nḓila-ḓe?
• Ndi ngani ri tshi fanela u sendela tsini-tsini na Yehova?
[Mbudziso Dza Pfunzo]
[Tshifanyiso kha siaṱari 16]
Vhavhuya vha Mudzimu vha ḓiphina nga u haseledza nga mishumo yawe mihulwane
[Tshifanyiso kha siaṱari 17]
Vhashumeli vha Yehova vha thusa nga tshivhindi vhane vha si vhe vha tendi u guda nga ha vhuhulu ha vhuhosi hawe
[Zwifanyiso kha siaṱari 18]
Yehova u ṋea zwiḽiwa “zwoṱhe zwi tshilaho”
[Ṱhaluso ya Vhubvo ha Tshifanyiso]
Animals: Parque de la Naturaleza de Cabárceno
[Tshifanyiso kha siaṱari 19]
Yehova u ṋea maanḓa na vhulivhisi vhavhuya vhawe, vhane vha ṱoḓa thuso yawe nga thabelo