Hulda O Swikelela Tshipikwa Tshawe
ARALI no vhuya na dalela tshiṱangadzime tshiṱuku tsha Sangir Besar tshi re ngei Indonesia miṅwahani yo fhiraho, ni nga kha ḓi vha no vhona vhahashu vhararu vha tshifumakadzini vhe khunzikhunzini. Vhenevha vhahashu vha ḓivhelwa u huwelela na u thusa vhathu u pfesesa Bivhili. Fhedzi nga tshenetsho tshifhinga, vho vha vha tshi khou ita muṅwe mushumo wo fhambanaho.
Tshiṱangadzime tsha Sangir Besar ngei devhula ha Indonesia
Musi vha tshi ita wonoyu mushumo, vha thoma nga u dzhena maḓini, vha ṱoḓa matombo mahulu, vha a hwala vha a isa khunzikhunzini. Maṅwe a eneo matombo a vha o hula lune a nga eḓana na bola ya milenzhe. Vhenevho vhahashu vha dzhia hamula vha kwasha eneo matombo u swika a tshi vha zwipiḓa zwiṱukuṱuku na kha makumba a khuhu. Nga murahu ha zwenezwo, vha shela eneo matombo kha mabakete, vha a hwala vha gonya nao zwiṱepisi vha tshi a isa hune vha dzula hone. Vha dzhenisa eneo matombo kha bege khulu dzine dza ḓo hwalwa dza iswa ṱirakani uri a shumiswe kha mushumo wa u ita bada.
Hulda a tshi khou kuvhanganya matombo khunzikhunzini
Muṅwe wa vhenevho vhahashu o vha a tshi pfi Hulda. Vhuimo hawe ho vha vhu tshi mu tendela uri a fhedze tshifhinga tshinzhi a tshi khou ita wonoyo mushumo u fhira vhaṅwe. Kanzhi o vha a tshi shumisa tshelede ine a i wana u itela u renga zwithu zwa ndeme zwine zwa ṱoḓea muṱani wa hawe. Fhedzi zwino o vha a tshi khou ita wonoyo mushumo e na tshiṅwe tshipikwa. O vha a tshi khou ṱoḓa u renga tablet ye a vha a tshi ḓo i shumisa u itela u dzhena kha app ya JW Library®. Hulda o vha a tshi zwi ḓivha uri dzividio na zwiṅwe zwine zwa wanala kha yeneyo app zwo vha zwi tshi ḓo mu thusa u khwinisa vhuḓinḓa hawe na u mu thusa uri a pfesese Bivhili khwiṋe.
Hulda o shuma awara mbili dzo engedzeaho matsheloni maṅwe na maṅwe lwa ṅwedzi na hafu nahone a kwasha matombo ane a nga ḓadza ṱiraka ḽiṱuku. Nga nṱhani ha zwenezwo, o kona u wana tshelede yo linganaho ya u renga tablet.
Hulda o fara tablet yawe
Hulda u ri: “Naho wonoyu mushumo wo vha u tshi mmbaisa na u ita uri ndi nete, ndo ṱavhanya nda hangwa vhuṱungu he nda vhu pfa musi ndi tshi khou shumisa tablet yanga ine ya nthusa vhuḓinḓani na uri ndi kone u lugiselela miṱangano nga ho leluwaho.” O dovha a amba uri yeneyi tablet yo mu thusa musi dziedzi ḽa corona ḽi tshi thoma, sa izwi miṱangano na mushumo wa u huwelela zwo vha zwi tshi vho itiwa nga founu. Ri takala na Hulda nge a kona u swikelela tshipikwa tshawe.
