EVANGELI ya Mateo i ri: “Yesu a dzhena thembeleni a pandela vhoṱhe vhe vha vha vha tshi khou renga na u rengisa henefho, nahone a thudzekanya maṱafula a vhatshintshi vha tshelede na bannga dza vhe vha vha vha tshi khou rengisa maivha. A amba navho a ri: ‘Ho ṅwalwa u pfi, “Nnḓu yanga i ḓo pfi nnḓu ya thabelo,” fhedzi inwi ni i ita bako ḽa mavemu.’”—Mat. 21:12, 13.

Ḓivhazwakale ya Yuda i sumbedza uri vhavhambadzi vha thembeleni vho vha vha tshi fhura vharengi vhavho nga u badelisa tshelede nnzhi. Sa tsumbo, Mishnah (Keritot 1:7) yo vhiga tshiitea tshe tsha itea ḓanani ḽa u thoma ḽa miṅwaha C.E. musi mutengo wa maivha-muronzhe u tshi gonya wa vha denar ya musuku. Yeneyo tshelede yo vha i tshi lingana na tshelede ine ya nga holwa nga muthu a si na tshenzhelo arali o shuma maḓuvha a 25. Zwo vha zwi tshi ṱanganedzea uri vhathu vha shayaho vha ite tshiṱhavhelo nga maivha-muronzhe kana maivha; mutengo wa zwenezwo zwiṋoni wo vha u tshi vho ḓura lwe zwa ita uri vha shayaho vha si tsha kona u u swikelela. (Lev. 1:14; 5:7; 12:6-8) Zwenezwi zwithu zwo sinyusa mufunzi Simeon ben Gamaliel lwe zwa ita uri a tsitse tshivhalo tsha zwiṱhavhelo tshe tsha vha tshi tshi fanela u itwa nga Vhayuda, zwenezwo zwo ita uri nga u ṱavhanya mutengo wa maivha-muronzhe mavhili u humele kha mutengo wawo wa mathomoni.

Samusi zwo sumbedzwa afho nṱha, Yesu o vha a tshi tea u vhidza vhavhambadzi vha thembeleni “mavemu” nga nṱhani ha uri vho vha vha tshi fhura vhathu nahone vhe na vhupangwa.