1. Ndi ngani ri tshi nga amba uri Yehova ndi ene a no langa zwithu zwoṱhe? (Sedzani tshifanyiso tsha u thoma.)

ZWITHU zwoṱhe ndi zwa Yehova! “Ḽiṱaḓulu, na ḽa ngei ṱaḓulu-ṱaḓulu ndi ḽa Yehova, na shango ndi ḽawe, na zwoṱhe zwi re khaḽo.” (Doit. 10:14; Nzumb. 4:11) Ndi ngazwo ri tshi nga amba uri vhathu vhoṱhe ndi vha Yehova. (Ps. 100:3) Fhedzi kha vhathu vhoṱhe vhe vha vhuya vha tshila, Mudzimu o ṋanga vhaṅwe uri vha vhe vhathu vhawe vho khetheaho.

2. Ndi vhafhio vhathu vho khetheaho vhe Bivhili ya amba nga havho?

² Sa tsumbo, Psalme ya 135 i amba uri vhagwadameli vha Yehova vha fulufhedzeaho vha ngei Isiraele ḽa kale ndi “thakha yawe.” (Ps. 135:4) Zwiṅwe hafhu, bugu ya Hosea yo dzula yo amba uri na vhaṅwe vhathu vhane vha si vhe Vhaisiraele vha ḓo vha vhathu vha Yehova. (Hos. 2:23) Vhuporofita ha Hosea ho ḓadzea musi Yehova a tshi khetha na vhathu vhane vha si vhe Vhayuda uri vha vhe na tshilavhelelwa tsha u vhusa na Kristo. (Mish. 10:45; Vharoma 9:23-26) Lwonolwu “lushaka lukhethwa” ndi “vhathu vho khetheaho,” vho ḓodziwa nga muya mukhethwa nahone vho khethiwa uri vha tshile ṱaḓulu. (1 Pet. 2:9, 10) Hu pfi mini nga Vhakriste vhanzhi vha fulufhedzeaho ṋamusi vhane vha vha na fulufhelo ḽa u tshila kha ḽifhasi? Yehova u dovha  a vha vhidza uri ndi “vhathu” vhawe na “vhanangiwa” vhawe.—Yes. 65:22.

3. (a) Ndi vhafhio vhane vha vha na vhushaka ho khetheaho na Yehova ṋamusi? (b) Ri ḓo haseledza mini kha ino thero?

³ Ṋamusi, hu na “sambi ḽiṱuku” ḽa vhane vha vha na fulufhelo ḽa u tshila tshoṱhe ṱaḓulu na vha “dziṅwe nngu” vhane vha vha na fulufhelo ḽa u tshila tshoṱhe kha ḽifhasi. Vhenevho vhathu vha gwadamela Yehova vhoṱhe sa “sambi ḽithihi.” (Luka 12:32; Yoh. 10:16) Ndi ngoho uri ri ṱoḓa u sumbedza uri ri livhuwa vhukuma Yehova nge a ita uri ri kone u vha na vhushaka ho khetheaho nae. Kha ino thero, ri ḓo haseledza nḓila dzo fhamba-fhambanaho dzine ra nga sumbedza ngadzo uri ri livhuwa Yehova nge a ri ṋea yeneyo ndugelo yo khetheaho.

4. Ri nga sumbedza hani uri ri livhuwa Yehova nge a ita uri zwi konadzee u vha na vhushaka nae, nahone Yesu o ita hani zwi fanaho?

⁴ Ri sumbedza uri ri livhuwa Yehova nga u ḓiṋekedzela khae nga mbilu yoṱhe. Musi ri tshi lovhedzwa, ri vha ri khou sumbedza khagala uri vhathu vhoṱhe vha zwi vhone uri ri vha Yehova na uri ro ḓiimisela u mu thetshelesa. (Vhaheb. 12:9) Yesu o ita zwi fanaho musi a tshi lovhedzwa. O vhudza Yehova a ri: “Zwi ntakadzaho ndi u ita zwiné Iwe Mudzimu wanga wa zwi funa.” (Ps. 40:7, 8) Naho Yesu o bebelwa kha lushaka lwa vhathu vhe vha vha vho ḓiṋekedzela kha Mudzimu, o ḓiṋekedzela u ita zwine Mudzimu a zwi funa.

5, 6. (a) Yehova o ita mini musi Yesu a tshi lovhedzwa? (b) Ndi tsumbo ifhio ine ya nga ri thusa u pfesesa nḓila ine Yehova a ḓipfa ngayo nga u ḓiṋekedzela hashu?

⁵ Yehova o ita mini musi Yesu a tshi lovhedzwa? Bivhili i ri: “Musi Yesu o no lovhedzwa, a tshi tou bva maḓini; ḽiṱaḓulu ḽa vulea, a vhona muya wa Mudzimu u tshi tsa u tshi ḓa khae u tshi nga ḽiivha. Ha dovha ha pfala ipfi ḽi bvaho ṱaḓulu ḽi tshi ri: ‘Hoyu ndi Murwa wanga, ane nda mu funa, ane nda mu takalela.’” (Mat. 3:16, 17) Naho Yesu o no vha wa Yehova, Yehova o takala musi a tshi vhona Murwa wawe o ḓiimisela u ita zwine a zwi funa nga mbilu yoṱhe. Nga hu fanaho, Yehova u a takala musi ri tshi ḓiṋekedzela khae nahone u ḓo ri fhaṱutshedza.—Ps. 149:4.

⁶ Sa tsumbo, edzani u vhona nga maṱo a muhumbulo munna o ṱavha maluvha manzhi avhuḓi ngadeni yawe. Ḽiṅwe ḓuvha ṅwananyana wawe u ka ḽiṅwe ḽa eneo maluvha nahone a ḽi ṋea khotsi awe sa tshifhiwa. Naa ḽeneḽo luvha a si ḽa khotsi awe? A nga vha ṋea hani luvha ḽo no vhaho ḽavho? Khotsi a re na lufuno a nga si vhuye a ḓivhudzisa dzenedzi mbudziso. Nṱhani hazwo, vha ḓo ṱanganedza tshenetsho tshifhiwa tshe vha fhiwa nga ṅwana wavho sa nḓila ya u vha sumbedza uri u a vha funa. Vha ḓo takalela ḽeneḽo luvha u fhira maluvha oṱhe a re ngadeni. Yehova u a takala musi ri tshi ḓiṋekedzela khae nga mbilu yoṱhe.—Ek. 34:14.

7. Bugu ya Maleaxi yo sumbedza hani nḓila ine Yehova a ḓipfa ngayo nga vhathu vhane vha mu shumela nga mbilu yoṱhe?

⁷ Vhalani Maleaxi 3:16. Arali ni sa athu u ḓiṋekedzela na u lovhedzwa, humbulani nga ha nḓila ine u dzhia honoho vhukando zwa vha zwa ndeme ngayo. Ngoho ndi ya uri ḓuvha ḽine na bebwa ngaḽo ni vha no no vha wa Yehova. Nga zwenezwo, humbulani nga ha nḓila ine Yehova a takala ngayo musi ni tshi mu ṱanganedza sa muvhusi waṋu, u ḓiṋekedzela khae na u ita zwine a zwi funa. (Mir. 23:15) Yehova u a humbula vhane vha mu shumela nga mbilu yoṱhe nahone u ṅwala madzina avho kha “bugu ya u mu eletshedza.”

8, 9. Ndi mini zwine Yehova a zwi ṱoḓa kha vhe madzina avho a ṅwalwa kha “bugu [yawe] ya u mu eletshedza”?

 ⁸ U ṅwalwa kha “bugu ya [Yehova ya] u mu eletshedza” zwi ḓa na vhuḓifhinduleli. Maleaxi o amba uri ri fanela u ‘ofha Yehova na u sa hangwa dzina ḽawe.’ U gwadamela muṅwe muthu kana tshiṅwe tshithu zwi ḓo ita uri madzina ashu a thuthwe buguni ya Yehova.—Ek. 32:33; Ps. 69:28.

⁹ U ḓiṋekedzela hashu kha Yehova zwi fhira u sokou fulufhedzisa uri ri ḓo ita zwine a zwi funa na u lovhedzwa. Zwenezwo ndi zwithu zwine ra zwi ita luthihi fhedzi, fhedzi u gwadamela Yehova ndi zwithu zwine ra fanela u zwi ita tshifhinga tshoṱhe. U ima na Yehova sa vhathu vhawe zwi ṱoḓa uri ri dzule ri tshi mu thetshelesa tshifhinga tshoṱhe.—1 Pet. 4:1, 2.

10. Ndi phambano ifhio ine ya fanela u vha hone vhukati ha vhane vha shumela Yehova na vhane vha si mu shumele?

¹⁰ Kha thero yo fhiraho, ro haseledza nga ha mafhungo a re Bivhilini a ambaho nga ha Kaini, Salomo na Vhaisiraele. Vhenevho vhathu vhoṱhe vho vha vha tshi humbula uri vha khou gwadamela Yehova, fhedzi vho vha vha sa fulufhedzei khae. Dzenedzi tsumbo dzi sumbedza zwavhuḓi uri vhane vha ima na Yehova vha fanela u ita zwo lugaho na u nengwa vhuvhi. (Vharoma 12:9) Musi Maleaxi o no amba nga ha “bugu ya [Mudzimu ya] u mu eletshedza,” o dovha a amba uri Yehova u ‘ṱalukanya muvhuya na muvhi, we a shumela Yehova na we a si mu shumele.’—Mal. 3:18.

11. Ndi ngani vhaṅwe vhathu vha tshi fanela u zwi vhona uri ro ḓiṋekedzela kha Yehova tshoṱhe?

¹¹ Hu na iṅwe nḓila ine ra nga sumbedza ngayo uri ri livhuwa Yehova nge a ri nanga uri ri vhe vhathu vhawe. Vhushaka hashu na Mudzimu vhu fanela u “[vhonwa] zwavhuḓi nga vhathu vhoṱhe.” (1 Tim. 4:15; Mat. 5:16) Ḓivhudziseni uri: ‘Naa vhaṅwe vha a kona u vhona uri ndi a fulufhedzea kha Yehova tshoṱhe? Naa ndi a ḓiṱalula sa muṅwe wa Ṱhanzi dza Yehova?’ Zwi ḓo vhaisa vhukuma Yehova arali ri sa vhudzi vhaṅwe uri ri Ṱhanzi dza Yehova ngeno o ri nanga uri ri vhe vhathu vhawe.—Ps. 119:46; vhalani Marko 8:38.

12, 13. Ndi ngani vhaṅwe vha tshi kundelwa u ḓiamba uri vha Ṱhanzi dza Yehova?

 ¹² Zwi ṱungufhadzaho ndi uri dziṅwe Ṱhanzi dzi edzisa “muya wa shango” zwine zwa ita uri dzi si fhambane na vhathu vhane vha si shumele Mudzimu. (1 Vhakor. 2:12) Wonoyo “muya wa shango” u ita uri vhathu vha livhise ṱhogomelo kha nyemulo dza ṋama. (Vhaef. 2:3) Sa tsumbo, hu sa londwi nyeletshedzo dzoṱhe dze ra ṋewa malugana na kuambarele, vhaṅwe vha kha ḓi ambara na u ḓilugisa nga nḓila i si na tshirunzi. Vha ambara zwiambaro zwi no pata na zwine zwa vhonadza naho vho kuvhangana na Vhakriste ngavho. Kana vha ita zwitaela zwa mavhudzi zwine zwa itwa nga vhathu vha ḽino shango. (1 Tim. 2:9, 10) Zwenezwo zwi ita uri musi vhe vhukati ha vhathu, zwi konḓe u ḓivha phambano vhukati ha vhane vha konana na Yehova na vhane vha “konana na shango.”—Yak. 4:4.

¹³ Hu na zwiṅwe zwithu zwine zwa itwa nga vhathu vha shango zwine dziṅwe Ṱhanzi dza zwi ita. Nḓila ine vha tshina ngayo na zwine vha zwi ita musi vhe dziphathini a si zwine zwa fanela u itwa nga Vhakriste. Vhaṅwe vha ṅwala mafhungo na u dzhenisa zwinepe zwavho kha website dza vhudavhidzani zwine zwa dzumbulula mavhonele avho nga ha zwithu zwa shango. Vha nga kha ḓi vha vha sa athu u kaidzwa nga nṱhani ha u ita tshivhi tshihulwane. Fhedzi vhenevho vhathu vha nga vha ṱhuṱhuwedzo i si yavhuḓi tshivhidzoni kha vhahashu vhane vha khou lwela u dzula vha tshi ḓifara nga nḓila yavhuḓi.—Vhalani 1 Petro 2:11, 12.

14. Ndi mini zwine ra fanela u zwi ita u itela u tsireledza vhushaka hashu ho khetheaho na Yehova?

¹⁴ Zwithu zwoṱhe zwi re kha ḽino shango zwo itelwa uri ri livhise ṱhogomelo kha “nyemulo ya ṋama na nyemulo ya maṱo na u ṱongisa zwine muthu a vha nazwo.” (1 Yoh. 2:16) Fhedzi nga nṱhani ha uri ri vha Yehova, ri “[iledza] vhuḓifari ha u sa ofha Mudzimu na nyemulo dza shango, uri ri tshile ri na muhumbulo wo tshaho na u luga na u ḓikumedza kha Mudzimu kha ano maitele a zwithu.” (Tito 2:12) Nḓila ine ra amba ngayo, u ḽa, u nwa, u ḓilugisa na u ambara ngayo na mishumo ine ra i ita, zwi fanela u sumbedza khagala uri ri vha Yehova.—Vhalani 1 Vhakorinta 10:31, 32.

15. Ndi ngani ri tshi fanela u funa vhahashu na u vha sumbedza vhuthu?

¹⁵ Ri sumbedza uri ri livhuwa vhushaka ho khetheaho vhune ra vha naho na Yehova nga nḓila ine ra fara ngayo vhatendi nga riṋe. Na vhone ndi vha Yehova. Arali ra dzula ri tshi humbula zwenezwi, ri ḓo dzula ri tshi funa vhahashu na u vha sumbedza vhuthu. (1 Vhathes. 5:15) Yesu o vhudza vhatevheli vhawe uri: “Ndi zwine vhathu vhoṱhe vha ḓo ḓivha ngazwo uri ni vhafunziwa vhanga, arali ni tshi funana.”—Yoh. 13:35.

16. Ndi tsumbo ifhio i re kha Mulayo wa Mushe ine ya sumbedza nḓila ine Yehova a ḓipfa ngayo nga vhathu vhawe?

¹⁶ Tsumbo i re kha Mulayo wa Mushe i nga ri thusa u pfesesa nḓila ine ra fanela u farana ngayo na vhahashu tshivhidzoni. Thundu dzoṱhe dze dza vha dzi tshi shumiswa thembeleni ya Yehova, dzo vha dzo ṋekedzelwa kana dzo vhetshelwa uri dzi shumiswe kha vhurabeli ho kunaho fhedzi. Mulayo wa Mushe wo vha wo ṋea zwidodombedzwa zwa nḓila ye dzenedzo thundu dza vha dzi tshi fanela u ṱhogomelwa ngayo. Vhathu vhe vha vha vha sa tevhedzi zwenezwo zwidodombedzwa, vho vha vha tshi vhulawa. (Num. 1:50, 51) Arali Yehova o vha a tshi tsireledza dzenedzo thundu nga yeneyo nḓila, zwi tou vha khagala uri u ḓo tsireledza vhathu vhawe vhe a vha khetha vho ḓiṋekedzelaho khae nga u fulufhedzea! Yehova o vhuya a amba zwi tevhelaho nga ha vhathu vhawe a ri: “Ane a ni kwama u khou kwama ḽiṱo ḽanga.”—Sak. 2:8, NW.

17. Yehova u ‘sedza na u pfa’ mini?

¹⁷ Zwi takadzaho ndi uri Maleaxi o amba uri Yehova u ‘sedza na u pfa’ nḓila ine vhathu vhawe vha farana ngayo. (Mal. 3:16) Ndi ngoho uri Yehova u a “ḓivha vha re vhawe.” (2 Tim. 2:19) U a ḓivha zwoṱhe zwine ra zwi amba na zwine ra zwi ita. (Vhaheb. 4:13) Yehova u a ‘sedza na u pfa’ musi ri sa sumbedzi vhaṅwe vhuthu. Ri nga vha na vhungoho ha uri Yehova u a zwi vhona musi ri tshi ṱanganedza vhaṅwe, u vha na mafunda, u hangwela na u vha na vhuthu.—Vhaheb. 13:16; 1 Pet. 4:8, 9.

18. Ri nga sumbedza hani uri ri livhuwa ndugelo ya u vha vhathu vha Yehova?

¹⁸ A zwi timatimisi uri ri ṱoḓa u livhuwa Yehova nga nṱhani ha ndugelo ya u vha vhathu vhawe. Ri a zwi ḓivha uri ri vha ro dzhia phetho ya vhuṱali musi ri tshi ḓiṋekedzela khae. Naho ri tshi khou tshila “vhukati ha murafho u sa fulufhedzei na u sa ḓivhalekani,” ri ṱoḓa vhathu vha tshi vhona uri a ri ‘solei nahone a ri na mulandu, ri tshi vhonetshela sa maḓenzhe shangoni.’ (Vhafil. 2:15) Ro ḓiimisela u iledza zwine Yehova a zwi vhenga. (Yak. 4:7) Ri funa vhatendi nga riṋe nahone ri a vha ṱhonifha samusi na vhone vhe vhathu vha Yehova.—Vharoma 12:10.

19. Yehova u lambedza hani vhathu vhawe?

¹⁹ Bivhili yo ri: “Yehova ha laṱedzi vhathu vhawe.” (Ps. 94:14) Zwe a zwi amba a zwi nga shanduki hu sa londwi makhaulambilu naho e afhio ane ra nga sedzana nao. Na lufu lu nga si kone u ri fhandekanya na lufuno lwa Yehova. (Vharoma 8:38, 39) Bivhili i ri: “Musi ri tshi tshila, ri tshilela Yehova, na musi ri tshi fa, ri fela Yehova. Nga zwenezwo, musi ri tshi tshila na musi ri tshi fa, ri vha Yehova.” (Vharoma 14:8) Ro lavhelela nga maṱo matswuku ḓuvha ḽine Yehova a ḓo vusa ngaḽo khonani dzawe dzi fulufhedzeaho. (Mat. 22:32) Na zwino ri khou ḓiphina nga phaṱhutshedzo nnzhi. Samusi Bivhili yo zwi sumbedza, “vha mashudu ndi avho vhathu vhané Yehova a vha Mudzimu wavho, na lushaka ulwo lwe a lu khetha a ri: ndi lwone ifa ḽanga.”—Ps. 33:12.