1. Tshirengululi tshi ita uri hu vhe na phaṱhutshedzo dzifhio?

TSHIRENGULULI tsha Yesu Kristo tshi ita uri zwi konadzee u wana phaṱhutshedzo nnzhi. Ndugiselelo ya tshirengululi i ita uri vhana vhoṱhe vha Adamu vhane vha funa zwo lugaho vha vhe tshipiḓa tsha muṱa wa Mudzimu. Tshirengululi tshi dovha tsha ita uri vha vhe na tshibuli tsha u tshila tshoṱhe kha ḽifhasi vho takala. Zwiṅwe hafhu, tshirengululi tsha Kristo a tshi iti fhedzi uri vhathu vhane vha thetshelesa vha fhaṱutshedzwe tshifhingani tshi ḓaho. Nga u ḓifunela, Yesu o ri fela ngeno a tshi khou tikedza zwilinganyo zwa Yehova, zwenezwo zwi sumbedza uri tshirengululi tshi tshimbidzana na zwithu zwine zwa vha zwa ndeme kha vhathu vhane vha vha ṱaḓulu na kha ḽifhasi.—Vhaheb. 1:8, 9.

2. (a) Ndi mafhungo afhio a ndeme nga ha ḽiṱaḓulu na ḽifhasi e Yesu a a katela kha thabelo yawe? (Sedzani tshifanyiso tsha u thoma.) (b) Ri ḓo ṱolisisa mini kha ino thero?

² Miṅwahani mivhili Yesu a sa athu u fa na u ḓiṋekedzela sa tshirengululi, o gudisa vhafunziwa vhawe uri musi vha tshi rabela vha ri: “Khotsi ashu wa ṱaḓulu, dzina ḽau nga ḽi itwe ḽikhethwa.  Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.” (Mat. 6:9, 10) U itela u sumbedza uri ri dzhiela nṱha tshirengululi, kha ri ṱolisise nḓila ine tsha tshimbidzana ngayo na u ita uri dzina ḽa Mudzimu ḽi itwe ḽikhethwa, vhuvhusi ha Muvhuso wa Mudzimu na u ḓadzea ha ndivho ya Mudzimu.

3. Dzina Yehova ḽi imela mini, nahone Sathane o sema hani ḽeneḽi dzina ḽikhethwa?

³ Khumbelo ya Yesu ya u thoma kha thabelo yawe yo vha i ya uri dzina ḽa Mudzimu ḽi itwe ḽikhethwa. Dzina Yehova ḽi imela zwine a vha zwone, u na maanḓa nahone ndi mukhethwa. Kha iṅwe thabelo, Yesu o vhidza Yehova “Khotsi mukhethwa.” (Yoh. 17:11) Samusi Yehova e mukhethwa, zwithu zwoṱhe zwine a zwi ita na milayo yawe ndi zwikhethwa. Naho zwo ralo, tsimuni ya Edeni Sathane o amba uri Mudzimu ha na ndugelo ya u vhetshela vhathu zwilinganyo. Sathane o sema dzina ḽa Mudzimu ḽikhethwa nga u zwifhela Yehova.—Gen. 3:1-5.

4. Yesu o shela hani mulenzhe kha u ita uri dzina ḽa Mudzimu ḽi itwe ḽikhethwa?

⁴ U fhambana na zwenezwo, Yesu o vha a tshi funa dzina Yehova. (Yoh. 17:25, 26) Yesu o shela mulenzhe kha u ita uri dzina ḽa Mudzimu ḽi itwe ḽikhethwa. (Vhalani Psalme ya 40:8-10.) Samusi o vha e muthu o fhelelaho kha ḽifhasi, Yesu o sumbedza uri zwi a pfala nahone zwo tea uri Yehova a vhetshele zwivhumbwa zwawe zwilinganyo. Naho Sathane o ita uri Yesu a shengele na u vhulahwa, Yesu o dzula a tshi fulufhedzea nga ho fhelelaho kha Khotsi awe wa ṱaḓulu. Ngauri o vha a tshi fulufhedzea, Yesu o sumbedza uri muthu o fhelelaho a nga dzula a tshi thetshelesa zwilinganyo zwa Mudzimu.

5. Ri nga shela hani mulenzhe kha u ita uri dzina ḽa Mudzimu ḽi itwe ḽikhethwa?

⁵ Ri nga sumbedza hani uri ri funa dzina Yehova? Ri nga zwi sumbedza nga nḓila ine ra ḓifara ngayo. Yehova u lavhelela uri ri vhe vhakhethwa. (Vhalani 1 Petro 1:15, 16.) Zwenezwi zwi amba uri ri gwadamela Yehova fhedzi nahone ri mu thetshelesa zwi tshi bva mbiluni. Naho ri tshi tovholwa, ri ita zwoṱhe zwine ra nga kona u tshila u tendelana na zwilinganyo na milayo yawe. Musi ri tshi ita zwo lugaho, ri vha ri tshi khou ita uri tshedza tshashu tshi vhonetshele na uri dzina Yehova ḽi huliswe. (Mat. 5:14-16) Sa vhathu vhakhethwa, nḓila ine ra tshila ngayo i sumbedza uri milayo ya Yehova ndi yavhuḓi na uri zwe Sathane a zwi pomoka Mudzimu ndi mazwifhi. Samusi roṱhe ri tshi khakha, ri rembuluwa zwi tshi bva mbiluni na u iledza u ḓifara nga nḓila ine ya nyadzisa Yehova.—Ps. 79:9.

6. Ndi ngani Yehova a tshi ri dzhia sa vho lugaho naho ri songo fhelela?

⁶ Nga nṱhani ha tshirengululi tsha Kristo, Yehova u hangwela zwivhi zwa vhane vha vha na lutendo. U ṱanganedza vhane vha ḓiṋekedzela khae. Yehova u dzhia Vhakriste vho lugaho vha vhaḓodzwa sa vhana vhawe nahone u dzhia vha “dziṅwe nngu” vho lugaho sa khonani dzawe. (Yoh. 10:16; Vharoma 5:1, 2; Yak. 2:21-25) Naho zwo ralo, tshirengululi tshi ita uri ri vhe na vhushaka havhuḓi na Khotsi ashu wa ṱaḓulu na u shela mulenzhe kha u ita uri dzina ḽawe ḽi itwe ḽikhethwa.

7. Tshirengululi tshi ita uri hu vhe na phaṱhutshedzo dzifhio nga fhasi ha Muvhuso?

⁷ Kha thabelo yawe, Yesu o dovha a humbela Mudzimu a ri: “Muvhuso wau nga u ḓe.” Tshirengululi tshi tshimbidzana hani na Muvhuso wa Mudzimu? Tshirengululi  tshi ita uri zwi konadzee uri vha 144 000 vha vhuse na Kristo ngei ṱaḓulu sa mahosi na vhotshifhe. (Nzumb. 5:9, 10; 14:1) Tshirengululi tshi ita uri zwi konadzee uri vhaḓodzwa vha vuselwe ngei ṱaḓulu nahone Yesu na vhenevho vhaḓodzwa vha ḓo vhusa ḽifhasi lwa miṅwaha ya tshigidi. Ḽifhasi ḽi ḓo itwa paradiso nahone vhathu vhoṱhe vha fulufhedzeaho vha ḓo vha vho fhelelaho. Vhashumeli vha Yehova vha re ṱaḓulu na kha ḽifhasi vha ḓo vha muṱa muthihi wa Mudzimu. (Nzumb. 5:13; 20:6) Yesu u ḓo pwasha ṱhoho ya ṋowa nahone u ḓo fhelisa vhushandukwa hoṱhe ha Sathane fhethu hoṱhe.—Gen. 3:15.

8. (a) Yesu o thusa hani vhafunziwa vhawe u vhona uri Muvhuso wa Mudzimu ndi wa ndeme? (b) Ri sumbedza hani uri ri tikedza Muvhuso ṋamusi?

⁸ Musi Yesu a tshee kha ḽifhasi, o thusa vhafunziwa vhawe u vhona uri Muvhuso wa Mudzimu ndi wa ndeme. Musi Yesu o no lovhedzwa, o huwelela “mafhungo maḓifha a Muvhuso wa Mudzimu” fhethu hoṱhe he a vha e hone. (Luka 4:43) Maipfi awe a u fhedzisela e a a vhudza vhafunziwa vhawe musi a sa athu u humela ṱaḓulu, o ri vha ṱanziele nga hae “u swika tshipiḓani tsha kule vhukuma tsha ḽifhasi.” (Mish. 1:6-8) Mushumo washu wa u huwelela nga ha Muvhuso, u ḓo ita uri vhathu vhoṱhe vha vhe na tshibuli tsha u guda nga ha tshirengululi na u vha tshipiḓa tsha Muvhuso wa Mudzimu. Ṋamusi, ri tikedza Muvhuso nga u thusa vharathu vha Kristo vha re kha ḽifhasi u huwelela mafhungo maḓifha a Muvhuso ḽifhasini ḽoṱhe.—Mat. 24:14; 25:40.

9. Ndi ngani ri tshi nga vha na vhungoho ha uri Yehova u ḓo ita uri ndivho yawe nga ha vhathu i ḓadzee?

⁹ Yesu o vha a tshi khou amba mini musi a tshi ri: “Zwine wa funa nga zwi itwe”? Yehova ndi Musiki. A amba uri tshithu tshi ḓo itea, tshi a itea zwa vhukuma. (Yes. 55:11) A nga si tendele vhushandukwa ha Sathane vhu tshi tshinya ndivho yawe nga ha vhathu. U bva mathomoni, Yehova o vha a tshi ṱoḓa uri ḽifhasi ḽi ḓale nga vhana vho fhelelaho vha Adamu na Eva. (Gen. 1:28) Arali Adamu na Eva vha fe vhe si na vhana, ndivho ya Mudzimu ya uri ḽifhasi ḽi ḓale nga vhana vhavho yo vha i tshi ḓo vha i mahandana. Nga zwenezwo, musi Adamu na Eva vha tshi ita tshivhi, Yehova o vha tendela uri vha vhe na vhana. A tshi shumisa tshirengululi, Mudzimu o ṋea vhathu vhoṱhe vhane vha vha na lutendo tshibuli tsha u vha vho fhelelaho na u tshila tshoṱhe. Yehova u funa vhathu nahone ndi lutamo lwawe uri vhathu vhane vha thetshelesa vha tshile nga nḓila ine a ṱoḓa vha tshi tshila ngayo.

10. Tshirengululi tshi ḓo vhuyedza hani vhathu vho faho?

¹⁰ Hupfi mini nga vhathu vhanzhi vhe vha fa vha songo wana tshibuli tsha u ḓivha na u shumela Yehova? Tshirengululi tshi ita uri zwi konadzee uri vho faho vha vuswe. Khotsi ashu wa ṱaḓulu u ḓo vha vusa nahone a vha ṋea tshibuli tsha u guda nga ha ndivho yawe na u wana vhutshilo vhusa fheli. (Mish. 24:15) Yehova u ṱoḓa vhathu vha tshi tshila, hu si u fa. Sa Muṋei wa vhutshilo, u ḓo vha Khotsi a vhoṱhe vhe vha vuswa. (Ps. 36:9) Nga zwenezwo, Yesu o ri funza u rabela a ri: “Khotsi ashu wa ṱaḓulu.” (Mat. 6:9) Yehova o ṋea Yesu mushumo wa ndeme wa u vusa vho faho. (Yoh. 6:40, 44) Paradisoni, Yesu u ḓo ita mushumo wawe samusi e “mvuwo na vhutshilo.”—Yoh. 11:25.

11. Ndi mini zwine Mudzimu a zwi ṱoḓa kha vha “gogo ḽihulu”?

¹¹ Vhuthu ha Yehova a si ha vhathu vha si gathi fhedzi ngauri Yesu o ri: “Ane a ita zwine  Khotsi anga a zwi funa, ndi ene murathu wanga na khaladzi anga na mme anga.” (Marko 3:35) Zwine Mudzimu a zwi ṱoḓa kha vha “gogo ḽihulu” ḽi sa vhalei ḽi bvaho kha tshaka na ndimi dzoṱhe ndi uri vha vhe vhagwadameli vhawe. Vhane vha vha na lutendo kha tshirengululi tsha Kristo na vhane vha ita zwine Mudzimu a zwi funa vha nga vha kha vhane vha vhidzelela vha ri: “U tshidzwa hu bva ha Mudzimu washu, o dzulaho kha khuluṋoni, na kha Ngwana.”—Nzumb. 7:9, 10.

12. Kha thabelo ya Yesu, ndi mini zwe a zwi amba nga ndivho ya Yehova nga ha vhathu?

¹² Ndivho ya Yehova nga ha vhathu vha thetshelesaho i vhonala kha zwe Yesu a zwi humbela kha thabelo yawe. U tendelana na yeneyi thabelo, ri ṱoḓa u ita zwoṱhe zwine ra nga kona uri dzina Yehova ḽi itwe ḽikhethwa. (Yes. 8:13) Dzina Yesu ḽi amba uri “Yehova ndi Mutshidzi” nahone u tshidzwa hashu nga nṱhani ha tshirengululi zwi ita uri dzina Yehova ḽi rendwe na u huliswa. Muvhuso wa Mudzimu u ḓo ita uri vhathu vhane vha thetshelesa vha vhuyelwe nga tshirengululi. Vhukuma, thabelo ya Yesu i ri khwaṱhisedza uri a huna tshithu tshine tsha nga thivhela ndivho ya Mudzimu i tshi ḓadzea.—Ps. 135:6; Yes. 46:9, 10.

13. Musi ri tshi lovhedzwa, ri vha ri tshi khou sumbedza mini?

¹³ Iṅwe nḓila ya ndeme ine ra sumbedza ngayo u livhuha tshirengululi ndi nga u ḓiṋekedzela kha Yehova ngauri ri na lutendo kha tshirengululi na nga u lovhedzwa. U lovhedzwa hashu zwi sumbedza uri “ri vha Yehova.” (Vharoma 14:8) Musi ri tshi lovhedzwa ri vha ri tshi khou humbela Yehova uri a ri ṋee luvalo lwo kunaho. (1 Pet. 3:21) Yehova u fhindula yeneyo khumbelo  nga u ri ṱanzwa nga malofha a Kristo. Ri na vhungoho ho fhelelaho ha uri u ḓo ri ṋea zwe a ri fulufhedzisa.—Vharoma 8:32.

14. Ndi ngani Yehova o ri ṋea ndaela ya u funa vhaṅwe?

¹⁴ Ndi ifhio iṅwe nḓila ine ya sumbedza uri ri livhuha tshirengululi? Zwoṱhe zwine Yehova a zwi ita zwi ṱuṱuwedzwa nga lufuno nahone u ṱoḓa uri vhagwadameli vhawe vhoṱhe vha sumbedze yeneyo pfanelelo ya lufuno. (1 Yoh. 4:8-11) Ri sumbedza uri ri ṱoḓa u vha “vhana vha Khotsi [ashu] a re ṱaḓulu” musi ri tshi funa vhaṅwe. (Mat. 5:43-48) Ndaela ya u thoma ndi ya uri ri fune Yehova nahone ya vhuvhili ndi ya uri ri fune vhaṅwe. (Mat. 22:37-40) Iṅwe nḓila ya ndeme ine ra sumbedza ngayo uri ri funa vhaṅwe, ndi nga u thetshelesa ndaela ya u huwelela mafhungo maḓifha a Muvhuso wa Mudzimu. Samusi ri tshi funa vhahashu, ri vha ri tshi khou sumbedza vhugala ha Mudzimu. Arali ri tshi thetshelesa ndaela ya Yehova ya u funa vhaṅwe zwihuluhulu vhahashu, u funa hashu Yehova zwi ḓo itwa zwo “fhelelaho kha riṋe.”—1 Yoh. 4:12, 20.

15. (a) Ndi phaṱhutshedzo dzifhio dzine ra dzi wana zwino kha Yehova? (b) Ndi phaṱhutshedzo dzifhio dzine ra ḓo dzi wana tshifhingani tshi ḓaho?

¹⁵ Musi ri na lutendo kha tshirengululi zwi ita uri ri hangwelwe nga ho fhelelaho. Ipfi ḽa Mudzimu ḽi ri khwaṱhisedza uri ri nga ‘hangwelwa’ zwivhi zwashu. (Vhalani Mishumo 3:19-21.) Samusi zwo haseledzwa mathomoni, tshirengululi tshi ita uri zwi konadzee uri Yehova a dzhie vhashumeli vhawe vho ḓodzwaho sa vhana vhawe. (Vharoma 8:15-17) Yehova u ramba vha “dziṅwe nngu” uri vha vhe tshipiḓa tsha muṱa wawe wa kha ḽifhasi. Musi ro no vha vhathu vho fhelelaho nahone ro no lingwa lwa u fhedzisela, Yehova u ḓo takalela u ri dzhia sa vhana vhawe vha re kha ḽifhasi. (Vharoma 8:20, 21; Nzumb. 20:7-9) Yehova u dzula a tshi funa vhana vhawe. Mbuyelo dza tshirengululi dzi ḓo vha dza tshoṱhe. (Vhaheb. 9:12) Tshenetshi tshifhiwa tshi ḓo dzula tshi tsha ndeme. A huna muthu kana tshithu tshine tsha nga ri dzhiela tshenetshi tshifhiwa.

16. Tshirengululi tshi ita hani uri ri vhofhololwe?

¹⁶ Diabolo a nga si kone u thivhela vhane vha rembuluwa zwi tshi bva mbiluni uri mafheleloni vha si vhe tshipiḓa tsha muṱa wa Yehova. Yesu o ḓa kha ḽifhasi nahone a fa “luthihi fhedzi.” Nga zwenezwo, tshirengululi tsho lifhwa lwa tshoṱhe. (Vhaheb. 9:24-26) Tshenetshi tshirengululi tshi phumula tshoṱhe tshivhi tshe tsha itwa nga Adamu. Ri livhuha tshirengululi tsha Kristo ngauri ro vhofhololwa kha vhupuli ha ḽino shango ḽi langwaho nga Sathane nahone a ri tsha ofha lufu.—Vhaheb. 2:14, 15.

17. U funa Yehova zwi amba mini kha inwi?

¹⁷ Zwe Mudzimu a zwi fulufhedzisa zwi a itea. Samusi milayo ya tsiko yawe i sa shanduki, Yehova ha nga shanduli zwe a zwi fulufhedzisa. Yehova ha shanduki. (Mal. 3:6) Yehova ha ri ṋei tshenetshi tshifhiwa tsha vhutshilo fhedzi. U a ri funa. Bivhili i ri: “Ri a zwi ḓivha na u tenda uri Mudzimu u a ri funa. Mudzimu ndi lufuno.” (1 Yoh. 4:16) Ḽifhasi ḽoṱhe ḽi ḓo itwa paradiso yavhuḓi nahone muṅwe na muṅwe a re kha ḽifhasi u ḓo sumbedza lufuno lwa Mudzimu. U nga ri ri nga shela mulenzhe na zwivhumbwa zwa Mudzimu zwi re ṱaḓulu kha u amba uri: “Thendo na vhugala na vhuṱali na ndivhuho na khuliso na maanḓa na nungo nga zwi vhe zwa Mudzimu washu lini na lini. Amen.”—Nzumb. 7:12.