Seth *o ri: “Nṋe na mufumakadzi wanga ro xelelwa nga mushumo nga tshifhinga tshithihi. Lwa miṅwaha mivhili, ro vha ri tshi thuswa nga miraḓo ya muṱa na mishumo ya tshifhinganyana. Nga zwenezwo, mufumakadzi wanga Priscilla o tsikeledzea nahone nda ḓipfa ndi si wa ndeme.

“Ro konḓelela hani? Tshifhinga tshoṱhe Priscilla o vha a tshi humbula maipfi a Yesu a re kha Mateo 6:34. O amba uri a ro ngo fanela u vhilaela nga ḽa matshelo ngauri ḽa matshelo ḽi ḓo vha na mbilaelo dzaḽo. Nahone thabelo yawe i bvaho mbiluni yo mu khwaṱhisa. Nṋe ndo khuthadzwa nga Psalme ya 55:22. U fana na Mupsalme, ndo kumedzela Yehova zwi nndemelaho nahone o ntikedza. Naho zwino ndi tshi vho shuma, ri leludza vhutshilo hashu nahone ri tshila u tendelana na nyeletshedzo ya Yesu i re kha Mateo 6:20-22. Zwa ndeme vhukuma, ri na vhushaka ha tsini nahone ro sendela tsini-tsini na Mudzimu.”

Jonathan o ri: “Ndo vha ndi tshi vhilaela vhukuma nga ha vhumatshelo musi bindu ḽa muṱa ḽi tshi mbwandamela zwikolodoni. Nga nṱhani ha vhuleme ha zwa ekonomi, u shuma hashu ro ḓifunga lwa miṅwaha ya 20 zwo vha mahandana. Nṋe na mufumakadzi wanga ro vha ri tshi semanela tshelede. Ro vha ri tshi ofha u renga nga garaṱa ya zwikolodo ngauri ro vha ri tshi humbula u nga a dzi tsha shuma.

“Fhedzi Bivhili na muya mukhethwa wa Mudzimu zwo ri thusa u dzhia phetho dzavhuḓi. Ndo guda u ṱanganedza mushumo muṅwe na muṅwe nahone ro litsha u renga zwithu zwi si zwa ndeme. Sa Ṱhanzi dza Yehova, ro dovha ra tikedzwa nga vhatendi nga riṋe. Vho ita uri ri ḓifulufhele nahone vho ri thusa zwifhingani zwi konḓaho.”

Raquel o ri: “Musi munna wanga a tshi nṱutshela, ndo pfa vhuṱungu nahone nda sinyuwa. Ndo vha ndo tsikeledzea vhukuma. Fhedzi ndo sendela tsini na Mudzimu nahone a nkhuthadza. U amba na Mudzimu nga thabelo tshifhinga tshoṱhe zwo ita uri ndi vhe na mulalo. Zwo vha zwi tshi tou nga o fhodza mbilu yanga.

“Ndi livhuha uri Bivhili yo nthusa u kunda u sinyuwa na u pfa vhuṱungu. Ndo dzhiela nṱha maipfi a muapostola Paulo ane a vha kha Vharoma 12:21 ane a ri: ‘Ni songo tenda u kundwa nga vhuvhi, fhedzi dzulani ni tshi kunda vhuvhi nga zwivhuya.’

“Khonani yanga ya tsini yo nthusa uri ndi kone u vhona ṱhoḓea ya u bvela phanḓa. O ntsumbedza Muhuweleli 3:6, NW nahone nga vhuthu a mmbudza uri hu na tshifhinga tshine ra fanela “u litsha u ṱoḓa.” Yo vha i nyeletshedzo i konḓaho, fhedzi ho vha hu zwine nda zwi ṱoḓa. Zwino ndi na zwipikwa zwiswa vhutshiloni.”

Elizabeth o ri: “Musi mbingano i tshi pwashea, ni ṱoḓa thikhedzo. Ndo vha ndi na khonani ye ya vha i tshi ntikedza ḓuvha ḽiṅwe na ḽiṅwe. O vha a tshi lila na nṋe, u nkhuthadza nahone a tshi ita uri ndi ḓipfe ndi tshi funwa nṱhani ha u ḓipfa sa mmbengwa. Ndi na vhungoho ha uri Yehova o mu shumisa uri a nkhuthadze.”

Luis we a bulwa mathomoni ha ino thero, u na vhulwadze ha mbilu nahone o ṱoḓa u raha bakete luvhili lwoṱhe. Zwino u fanela u vha e kha mutshini wa u fema awara dza 16 nga ḓuvha. U ri: “Ndi rabela Yehova tshifhinga tshoṱhe. Nahone musi ndo no amba nae nga thabelo, ndi pfa muya wawe u tshi nkhwaṱhisa. Thabelo i ita uri ndi vhe na tshivhindi tsha u bvela phanḓa ngauri ndi na lutendo khae nahone ndi a ḓivha uri u na ndavha na nṋe.”

Petra a re miṅwahani ya vhu-80 o ri: “Hu na zwinzhi zwine nda ṱoḓa u zwi ita, fhedzi ndi a kundelwa. U vhona ndi si tsha kona u ita zwiṅwe zwithu zwi a vhavha vhukuma. Ndi nga fhasi ha madokotela nahone a thi na nungo. Kanzhi ndi humbula nga ha nḓila ye Yesu a humbela ngayo Khotsi awe uri a pfukise tshinwelo arali zwo vha zwi tshi konadzea. Fhedzi Yehova o khwaṱhisa Yesu nahone u khwaṱhisa na nṋe. Thabelo ndi dzilafho ḽanga ḽa ḓuvha ḽiṅwe na ḽiṅwe. Ndi ḓipfa ndi khwine musi ndi tshi amba na Mudzimu.”—Mateo 26:39.

 Julian ane a vha na vhulwadze ha multiple sclerosis lwa miṅwaha i ṱoḓaho u vha 30 u ḓipfa nga nḓila i fanaho. O ri: “Zwino ndi vho dzula kha tshidulo tsha vhaholefhali. Fhedzi vhutshilo hanga ndi ha ndeme ngauri ndo ḓiṋekedzela kha u shumela vhaṅwe. U ṋea zwi nga fhungudza vhuṱungu nahone Yehova u ita zwe a zwi fulufhedzisa u itela u ri khwaṱhisa zwifhingani zwi konḓaho. U fana na muapostola Paulo, ndi nga amba uri: ‘Ngauri zwithu zwoṱhe ndi zwi koniswa nga ane a nṋea maanḓa.’”—Vhafilipi 4:13.

Antonio o ri: “Musi khotsi anga vha tshi fa nge vha thulwa nga goloi, mathomoni ndo vha ndi sa zwi tendi. Zwo vha zwi sa pfali ngauri vho vha vha tshi khou tou ḓitshimbilela nga milenzhe. Fhedzi ho vha hu si na zwine nda nga ita. Vho vha vho dzidzivhala lwa maḓuvha maṱanu nahone nga murahu vha fa. Ndo vha ndi sa ṱoḓi u sumbedza mme anga nḓila ye nda vha ndi tshi ḓipfa ngayo, fhedzi ndo vha ndi tshi ṱhukhula tshililo musi ndi ndoṱhe. Ndo vha ndi tshi dzula ndi tshi ḓivhudzisa uri, ‘Ndi ngani? Ndi ngani?’

“Nga zwenezwo zwifhinga zwi konḓaho, ndo vha ndi tshi humbela Yehova uri a nthuse u langa nḓila ye nda vha ndi tshi ḓipfa ngayo na uri ndi vhe na mulalo. Nga zwiṱuku nga zwiṱuku ndo ḓipfa ndi khwine. Ndo humbula uri Bivhili yo ṱalutshedza uri ‘zwoṱhe ri sokou ṱangana nazwo nga tshifhinga tshazwo’ nahone zwi nga wela muṅwe na muṅwe. Samusi Mudzimu a sa zwifhi, ndi na vhungoho ha uri ndi ḓo dovha nda vhona khotsi anga musi vha tshi vuswa.”—Muhuweleli 9:11; Yohane 11:25; Tito 1:2.

Robert we a bulwa mathomoni a ino thero, u humbula nga nḓila i fanaho. O ri: “Nṋe na mufumakadzi wanga ro vha na mulalo wa ngelelo we ha ambiwa nga hawo kha Vhafilipi 4:6, 7. Ro vha nawo nga nṱhani ha u rabela kha Yehova. U vha na mulalo zwo ri thusa uri ri kone u amba na muanḓadzi wa mafhungo nga ha fulufhelo ḽashu ḽa mvuwo. Naho bufho ḽo vhulaha murwa washu, ri kha ḓi humbula nga ha zwifhinga zwi takadzaho zwe ra zwi fhedza roṱhe. Ri lingedza u livhisa ṱhogomelo khazwo.

“Musi Ṱhanzi nga riṋe dzi tshi ri vhudza uri dzo ri vhona ri tshi khou ṱalutshedza nga ha lutendo lwashu kha thelevishini, ro vha vhudza uri ri livhuha vhathu vhe vha ri vhea dzithabeloni. Ndi na vhungoho ha uri Yehova o ri tikedza a tshi shumisa vhathu vhe vha ri rumela milaedza ya u ri khuthadza.”

Samusi dzenedzo tsumbo dzo sumbedza, Mudzimu a nga khuthadza vhathu vho sedzanaho na thaidzo. Hu pfi mini nga inwi? Hu sa londwi thaidzo dzine na sedzana nadzo vhutshiloni, hu na khuthadzo ine ya ḓo ni thusa u sedzana nadzo. * Nga zwenezwo, zwi nga vha zwavhuḓi arali na nga humbela Yehova thuso. Ndi “Mudzimu wa u khuthadza hoṱhe.”—2 Vhakorinta 1:3.