Muṅwe Na Muṅwe U Ṱoḓa U Vha Na Vhumatshelo Havhuḓi

TAMBANI

Ni tama u vha na vhumatshelo ha mufuda-ḓe? Zwi tou pfala uri, u fana na vhathu vhanzhi, ni ṱoḓa uri inwi na muṱa waṋu, ni vhe na vhumatshelo vhu takadzaho vhu si na malwadze, vhu re na mulalo na vhu bvelelaho.

Naho zwo ralo, vhathu vhanzhi vha a timatima uri vha nga vha na vhumatshelo vhune vha vhu tama. Vho vhona zwithu zwi ngaho COVID-19 zwi tshi sokou bvelela nga tshihaḓu nahone zwa thithisa nḓila ine vhathu vha tshila ngayo, zwa bveledza vhushai na u vhulaya vhathu vhanzhi. Nga nṱhani ha zwenezwo, vha a vhilaela uri a vha nga vhi na vhumatshelo havhuḓi.

U vhilaela honoho hu ita uri vhathu vha ṱoḓe nga maṱo matswuku tshithu tshine tsha ḓo vha thusa uri vha vhe na vhumatshelo ha khwine. Vhaṅwe vhathu vha humbula uri hu na maanḓa a sa vhonali ane a langa vhumatshelo havho. Vhathu vhanzhi vha futelela kha pfunzo na u ṱoḓa lupfumo, vha tshi humbula uri zwenezwo zwi ḓo ita uri vha wane zwine vha zwi ṱoḓa. Vhaṅwe vha vhona u nga u vha muthu wavhuḓi ndi zwone fhedzi zwine zwa ṱoḓea uri muthu a vhe na vhutshilo havhuḓi.

Kha zwenezwo zwithu, naa hu na tshine tsha ḓo ni thusa uri ni vhe na vhumatshelo vhune na vhu ṱoḓa? Uri ni zwi ḓivhe, ni tea u humbula nga ha hedzi mbudziso:

Vhumatshelo haṋu vhu ḓitika nga mini?
Naa pfunzo na tshelede zwi ita uri ni vhe na vhutshilo ha khwine?
Naa u vha muthu wavhuḓi zwi ḓo ita uri ni vhe na vhumatshelo havhuḓi?
Ni nga wana ngafhi tshithu tshine na nga tshi fhulufhela tshine tsha ḓo ita uri ni vhe na vhumatshelo havhuḓi?

Tshenetshi Tshiingamo tshi ḓo ni thusa u wana dziphindulo.