Zwo vha zwi sa ḓo konadzea u tshila kha ḽifhasi arali hu vhe hu si na ḓuvha. Ḓuvha ḽi ita uri zwimela zwi kone u ita maṱari, maluvha, mitshelo, thebvu na mbeu. Ḽi dovha ḽa ita uri miri i tzwonzwe maḓi a re mavuni nga midzi u vhuya u swika a tshi swika kha maṱari. Eneo maḓi a dovha a ya tshikhalani.

Mudzimu u ita uri mvula i ne, zwine zwa ita uri ḽifhasi ḽi kone u vha na zwiḽiwa. Mudzimu u ri nisela mvula, a ita uri ri kaṋe zwinzhi nga tshifhinga tsha hone, a takadza na mbilu dzashu.

Vhokhotsi vhanzhi vha a vhilaedziswa nga u wanela miṱa yavho zwiḽiwa na zwiambaro. Maṅwalo a ri: “Lavhelesani zwiṋoni nga vhuronwane; a zwi zwali mbeu, a zwi kaṋi kana u kuvhanganyela maḓuluni. Naho zwo ralo, Khotsi aṋu wa ṱaḓulu u a zwi ṋea zwiḽiwa. Naa a ni vha ndeme u zwi fhira?”—Mateo 6:25, 26.

“Gudani kha maluvha a masimuni, nḓila ine a aluwa ngayo . . . ; fhedzi ndi a ni vhudza ndi ri, naho [Khosi] Salomo o vha o pfuma vhukuma, o vha a sa ambari u fana na ḽiṅwe ḽa eneo maluvha. Arali Mudzimu a tshi ambadza zwimela zwa ḓaka . . . , naa inwi ha nga ni ambadzi u fhira zwenezwo zwimela?”—Mateo 6:28-30.

Samusi Mudzimu a tshi ri thusa u wana zwiḽiwa na zwiambaro, zwi tou pfala uri u ḓo ri thusa u wana zwiṅwe zwine zwa ṱoḓea u itela u tshila. Arali ri tshi ita zwine Mudzimu a ṱoḓa, a nga ri thusa u wana zwiḽiwa kana u wana mushumo uri ri kone u renga zwine zwa ṱoḓea.—Mateo 6:32, 33.

U humbula nga ha ḓuvha, mvula, zwiṋoni na maluvha zwi ita uri ri fune Mudzimu nga ho engedzeaho. Tshipiḓa tshi tevhelaho tshi ḓo ri thusa u vhona nḓila ye Musiki washu a amba ngayo na vhathu.