Arali hu si Mudzimu ane a ita uri ri shengele, ndi ngani vhushai, dzinndwa, malwadze na khombo dza mupo zwi sa fheli? Ipfi ḽa Mudzimu ḽine ḽa vha Bivhili ḽi dzumbulula zwiitisi zwiraru zwine zwa ita uri vhathu vha shengele:

1. U Humbulela Iwe Muṋe Fhedzi, Vhupangwa Na Vengo. Bivhili i ri: “Muthu a tshi vhusa muthu muṅwe a mu tshinya.” (Muhuweleli 8:9) Kanzhi vhathu vha tambudzwa nga nṱhani ha uri vhathu a vho ngo fhelela, vha humbulela vhone vhaṋe fhedzi kana vha na mbilu mmbi.

2. U Sokou Ṱangana Nazwo Nga Tshifhinga Tshazwo. Kanzhi vhathu vha tambudzwa nga nṱhani ha uri zwithu “vha sokou ṱangana nazwo nga tshifhinga tshazwo.” (Muhuweleli 9:11) Musi hu tshi itea khombo, vhathu vha vha vhe fhethu hu so ngo teaho nga tshifhinga tshi so ngo teaho kana nga uri vhathu a vha na ndavha kana nga nṱhani ha uri vha ita vhukhakhi.

3. Muvhusi Wa Ḽino Shango Ndi Muvhi. Bivhili yo bvisela khagala tshiitisi tshihulwane tshi ne tsha ita uri vhathu vha shengele. Yo ri: “Shango ḽoṱhe ḽi zwanḓani zwa muvhi.” (1 Yohane 5:19) Onoyo muthu “muvhi” ndi Sathane Diabolo. Ndi tshivhumbiwa tsha muya tshine tsha vha na maanḓa ngauri tsho vha tshi muruṅwa wa Mudzimu, fhedzi “ho ngo ima o khwaṱha ngohoni.” (Yohane 8:44) Vhaṅwe vharuṅwa vho ṱanganela na Sathane kha u shandukela Mudzimu u itela uri vha kone u fusha nyemulo dzavho dza tseḓa nahone zwenezwo zwo vha ita uri vha vhe madimoni. (Genesi 6:1-5) U bva tshee Sathane na madimoni awe vha vha mashandukwa, vha khou shumisa maanḓa avho na ṱhuṱhuwedzo i si yavhuḓi kha ḽino shango. Zwihuluhulu kha tshino tshifhinga tshine ra khou tshila khatsho. Zwino Sathane o dinalea vhukuma nahone u “khou xedza ḽifhasi ḽoṱhe.” Zwenezwo zwo ita uri hu vhe na “khombo kha ḽifhasi.” (Nzumbululo 12:9, 12) Ndi ngoho uri Sathane ndi muvhusi wa tshiṱuhu. U a takala musi vhathu vha tshi shengela. A si Mudzimu ane a ita uri vhathu vha shengele. Fhedzi ndi Sathane.

ṰHOGOMELANI HEZWI: Muthu ane a vha na tshiṱuhu ndi ene e eṱhe ane a nga ita uri vhathu vhane vha si vhe na mulandu vha shengele. U fhambana na zwenezwo, Bivhili i ri: “Mudzimu ndi lufuno.” (1 Yohane 4:8) Nga nṱhani ha lufuno lune a vha nalwo, “Mudzimu u kule na zwivhi; Mu-kona-zwoṱhe ha khakhi.”—Yobo 34:10.

Naho zwo ralo, ni nga ḓivhudzisa uri, ‘Mudzimu ane a vha Ramaanḓaoṱhe u ḓo tendela Sathane a tshi vhusa u swika lini?’ Samusi ro zwi vhona, Mudzimu u vhenga vhuvhi nahone ha ṱoḓi ri tshi shengela. Zwiṅwe hafhu, Bivhili i ri khwaṱhisedza uri ri ‘mu hwese mbilaelo dzashu dzoṱhe, ngauri u a ri ṱhogomela.’ (1 Petro 5:7) Mudzimu u a ri funa nahone u na maanḓa a u fhelisa tshengelo yoṱhe na u haṱulwa nga nḓila i si yavhuḓi. Thero i tevhelaho i ḓo haseledza zwenezwi zwithu. *