Bebe o vha e na vhushaka ha tsini vhukuma na khotsi awe. Eneo maipfi o vha a tshi khou bva kha khonani ya tsini, fhedzi Bebe o vha a tshi mu pfisa vhuṱungu vhukuma nṱhani ha uri a mu khuthadze. O dzula a tshi ḓivhudza uri: “U fa havho ho vha hu si zwithu zwa khwine.” Zwo vha zwi tshi tou vha khagala uri musi Bebe a tshi ṅwala nga ha yeneyo khombo kha bugu yawe nga murahu ha miṅwaha, o vha a kha ḓi pfa vhuṱungu vhukuma.

Samusi Bebe o zwi vhona, zwi nga dzhia tshifhinga tshilapfu uri muthu a kunde honoho vhuṱungu, zwihuluhulu arali muthu o felwa nga muthu wa tsini vhukuma. Bivhilini, lufu lwo ṱaluswa zwavhuḓi sa “swina ḽa u fhedza.” (1 Vhakorinta 15:26) Lufu lu ḓa vhutshiloni hashu nahone a hu na zwine ra nga zwi ita u itela u lu thivhela, kanzhi lu ḓa ri songo lu lavhelela na luthihi nahone lu zhaka vhane ra vha funa. Lu kwama muṅwe na muṅwe. Nga zwenezwo, ndi zwa nzulele u sa ḓivha nḓila ya u sedzana na lufu na masiandoitwa alwo.

Khamusi no no vhuya na ḓivhudzisa uri: ‘Zwi dzhia tshifhinga tshingafhani u kunda vhuṱungu ha u felwa? Muthu a nga sedzana hani na u felwa? Ni nga khuthadza hani vho felwaho? Naa hu na fulufhelo ḽa vhafunwa vhashu vho faho?’