Dzina Ḽa Mudzimu Ndi Nnyi? Mudzimu u ri: “Ndi nṋe Yehova. Ndi ḽone dzina ḽanga.” (Yesaya 42:8) Dzina Yehova ḽi bvelela lu ṱoḓaho u vha 7 000 Bivhilini. Fhedzi vhunzhi ha Bivhili dzi vhea dzina zwaḽo ḽi ngaho “Murena” vhudzuloni ha dzina ḽawe ḽa vhukuma. Ngauri Mudzimu u ṱoḓa ni tshi vha khonani yawe, u ni humbela uri ni “[vhidzelele] dzina ḽawe.”—Phisalema 105:1.

Zwiṅwe Zwine Yehova A Vhidzwa Zwone. Bivhilini Yehova u vhidzwa nga madzina zwao a ngaho sa “Mudzimu,” “Ramaanḓaoṱhe,” “Musiki,” “Khotsi,” “Murena” na “Muvhusahoṱhe.” Hu na thabelo nnzhi Bivhilini nahone kha dzenedzo  thabelo u vhidzwa nga dzina zwaḽo na nga dzina ḽawe ḽa vhukuma.—Daniele 9:4.

Tshivhumbeo Tsha Mudzimu. Mudzimu ndi muya. (Yohane 4:24) Bivhili i ri vhudza uri: “A hu na muthu we a vhuya a vhona Mudzimu.” (Yohane 1:18) I dovha ya ri vhudza nḓila ine a ḓipfa ngayo. Vhathu vha nga mu ṱungufhadza kana vha ita uri “a vha takalel[e].”—Mirero 11:20; Phisalema 78:40, 41.

Nḓila Yavhuḓi Ine Mudzimu A Vha Ngayo. Mudzimu ha ṱaluli muthu hu sa londwi vhubvo hawe. (Mishumo 10:34, 35) Zwiṅwe hafhu, Yehova ndi Mudzimu “wa u khathutshela na u pfela vhuṱungu, a sa ṱavhanyi u sinyuwa na a re na lufuno luhulu lu sa shanduki, u dzulela u amba ngoho.” (Ekisoda 34:6, 7) Hu na zwithu zwinzhi zwavhuḓi nga hae, fhedzi kha ri haseledza zwiṋa fhedzi.

U Na Maanḓa. Samusi e “Mudzimu Ramaanḓaoṱhe,” u na maanḓa a sa fheli a u ita zwoṱhe zwe a fhulufhedzisa.—Genesi 17:1.

U Na Vhuṱali. A hu na muthu o ṱalifhaho u fana na Yehova. Ndi ngazwo Bivhili i tshi ri ndi ene “wa vhuṱali e eṱhe.”—Vharoma 16:27.

U Haṱula Nga Nḓila Yo Teaho. Mudzimu u dzulela u ita zwo lugaho. Mishumo yawe yo “fhelela” nahone musi a tshi haṱula ha “khakhi.”—Dotoronomio 32:4.

Ndi Lufuno. Bivhili i ri: “Mudzimu ndi lufuno.” (1 Yohane 4:8) Ha sokou sumbedza lufuno, fhedzi lufuno ndi zwine a vha zwone. Zwithu zwoṱhe zwine a zwi ita zwi ṱuṱuwedzwa nga lufuno luhulu lune a vha nalwo nahone lu a ri vhuyedza.

Mudzimu Ndi Khonani Yashu. U dovha a vha Khotsi ashu wa ṱaḓulu. (Mateo 6:9) Ri tea u vha na lutendo khae u itela u vha khonani dzawe. (Phisalema 25:14) U ni humbela uri ni sendele tsini nae nga thabelo na uri ni mu “kumedzele mbilaelo dzaṋu dzoṱhe, ngauri u na ndavha na inwi.”—1 Petro 5:7; Yakobo 4:8.

Yehova Na Yesu A Si Muthu Muthihi. Yesu ha fani na tshithu naho tshi tshini ngauri ndi ene e eṱhe o sikwaho nga Mudzimu nga ho livhaho. Ndi ngazwo Bivhili i tshi amba uri ndi Murwa wa Mudzimu. (Yohane 1:14) Yehova o shumisa Yesu tanzhe ḽawe “sa mushumi a re na vhutsila” u itela u sika zwithu zwoṱhe na vhathu vhoṱhe.—Mirero 8:30, 31; Vhakolosa 1:15, 16.

 A hu na na ḓuvha na ḽithihi ḽe Yesu a amba uri u Mudzimu. Nṱhani hazwo o ri: “Ndi muimeleli [wa Mudzimu], onoyo ndi Ene o nthumaho.” (Yohane 7:29) Musi a tshi khou amba na muṅwe wa vhafunziwa vhawe o amba uri Yehova ndi “Khotsi anga ane a vha Khotsi aṋu” na “Mudzimu wanga ane a vha Mudzimu waṋu.” (Yohane 20:17) Musi Yehova o no vusela Yesu ṱaḓulu, o mu ṋea maanḓa a u vhusa e kha tshanḓa Tshawe tsha u ḽa.—Mateo 28:18; Mishumo 2:32, 33.

Yesu A Nga Ni Thusa U Vha Na Vhushaka Havhuḓi Na Mudzimu

Yesu o ḓa shangoni u itela u ri funza nga ha Khotsi awe. Yehova o amba zwi tevhelaho nga ha Yesu, o ri: “Hoyu ndi Murwa wanga a funwaho. Ni mu thetshelese.” (Marko 9:7) A hu na muthu ane a ḓivha Mudzimu u fana na Yesu. Yesu o ri: “A hu na ane a ḓivha Khotsi nga nnḓa ha Murwa, na onoyo ane Murwa a takalela u mu dzumbululela.”—Luka 10:22.

Yesu o sumbedza nḓila ine Khotsi awe a vha ngayo. Yesu o edzisa Khotsi awe nga nḓila yo fhelelaho lwe a ri: “A vhonaho nṋe o vhona Khotsi.” (Yohane 14:9) Zwe Yesu a amba na u ita zwo sumbedza lufuno lwa Yehova nahone zwa ita uri vhathu vha ṱoḓe u vha na vhushaka havhuḓi na Yehova. O ri: “Ndi nṋe nḓila na ngoho na vhutshilo. A hu na ane a ḓa kha Khotsi a songo fhira kha nṋe.” (Yohane 14:6) O dovha a ri: “Vhagwadameli vha ngoho vha ḓo rabela Khotsi u tendelana na muya na ngoho, ngauri Khotsi u ṱoḓa vha ngaho vhenevho uri vha mu rabele.” (Yohane 4:23) Humbulani uri Yehova u khou ṱoḓa vhathu vha ngaho sa inwi vhane vha ṱoḓa u guda ngoho nga hae.