Arali ni tshi ṱoḓa u ḓivha muthu khwine, ni nga thuswa nga u guda nga ha zwithu zwe onoyo muthu a zwi swikelela na nga ha milingo ye a i kunda. Nga nḓila i fanaho, arali ni tshi ṱoḓa u ḓivha Mudzimu khwine, ni fanela u guda nga ha zwe a zwi ita. Musi ni tshi ita ngauralo, ni ḓo vhona uri o no ita zwithu zwinzhi u itela u ri thusa zwino na zwine zwa kwama vhumatshelo hashu.

Yehova mudzimu ndi musiki muhulwane, nahone “pfaneleo dzawe dzi sa vhonali, vhathu vha nga dzi vhona zwavhuḓi musi vha tshi sedza zwe a zwi sika u bva tshee shango ḽa sikwa.” (Vharoma 1:20) “U hone we a vhumba shango nga maanḓa awe, we a tika ḽinnḓa nga vhuṱali hawe, a anea lutombo nga ṱhalukanyo yawe.” (Yeremia 10:12) Zwithu zwavhuḓi zwe Mudzimu a zwi sika zwi sumbedza uri u na dzangalelo kha riṋe.

Ṱhogomelani nḓila ye Yehova a ita ngayo uri vhutshilo hashu vhu vhe ho khetheaho nge a ri sika a tshi “ḓifanyisa.” (Genesi 1:27) Nga yeneyo nḓila, o ita uri zwi konadzee uri ri sumbedze pfaneleo dzawe dzavhuḓi. O ri sika ri na vhukoni ha u guda nga hae na u pfesesa mavhonele awe na zwine zwa vha zwa ndeme khae. Musi ri tshi lingedza u tshila u tendelana na zwenezwo ri wana dakalo ḽo engedzeaho na u ḓivha zwine ra fanela u tshilela zwone. Zwiṅwe hafhu, o ita uri zwi konadzee u vha na vhushaka nae.

Musi ri tshi vhona zwithu zwe Yehova a zwi sika kha ḽifhasi, ri vhona nḓila ine a ḓipfa ngayo nga ha riṋe. Muapostola Paulo o zwi vhea nga heyi nḓila, Mudzimu ho ngo “litsha u ḓiṱanzielela nga zwivhuya zwine a zwi ita nga u [ri] nisela mvula i bvaho ṱaḓulu a [ri] ṋea na zwiliṅwa nga tshifhinga tshazwo a [ri] ṋea zwiḽiwa nahone a takadza mbilu [dzashu].” (Mishumo 14:17) Mudzimu o ri ṋea zwo engedzeaho u fhira zwine ra zwi ṱoḓa u itela u tshila. O ri fha zwithu zwinzhi nahone zwo fhamba fhambanaho u itela uri ri ḓifhelwe nga vhutshilo. Fhedzi hu na zwinzhi zwe Mudzimu a vha o lugiselela uri ṋea zwone zwi fhiraho hezwi.

Yehova o sika ḽifhasi uri vhathu vha tshile khaḽo  u swika nga hu sa fheli. Bivhili i amba uri: “Ḽifhasi ḽone o ḽi ṋea vhana vha vhathu” nahone “ha ngo sika mahandana, o ḽi vhumba uri ḽi dzulwe nga vhathu.” (Psalme ya 115:16; Yesaya 45:18) Ḽo vha ḽi tshi ḓo dzulwa nga vhathu vhafhio nahone lwa tshifhinga tshingafhani? “Vha u ḓo vha vhaṋe vha shango ndi vhavhuya, ndi vhone vha u ḓo dzula khaḽo lini na lini.”—Psalme ya 37:29.

U tendelana na zwenezwo, Yehova o sika munna na mufumakadzi vha u thoma, Adamu na Eva, nahone a vha vhea paradisoni kha ḽifhasi “uri [vha] i lime [vha] i linde.” (Genesi 2:8, 15) Mudzimu o vha ṋea mushumo u takadzaho wa u ita zwithu zwivhili, o ri: “Bebani ni ande ni ḓadze shango, ni ḽi kunde.” (Genesi 1:28) Nga zwenezwo, Adamu na Eva vho vha vhe na fhulufhelo ḽa u tshila nga hu sa fheli kha ḽifhasi. Zwi ṱungufhadzaho ndi uri vho khetha u sa thetshelesa Mudzimu nahone vha si tsha wela kha “vhavhuya” vhane vha “ḓo vha vhaṋe vha shango.” Naho zwo ralo, zwenezwo a zwo ngo shandukisa tshipikwa tsha Mudzimu nga ha vhathu kana ḽifhasi. Fhedzi kha ri thome ri haseledze nga ha tshiṅwe tshithu tshe Mudzimu a tshi ita.

Bivhili i ḓivhiwa sa Ipfi ḽa Mudzimu. Ndi ngani Yehova o ri ṋea Bivhili? U itela uri ri gude nga hae. (Mirero 2:1-5) Ndi ngoho uri Bivhili a i fhinduli mbudziso iṅwe na iṅwe ine ra nga vha nayo nga ha Mudzimu nahone a hu na bugu na nthihi ine ya nga kona u ita ngauralo. (Muhuweleli 3:11) Naho zwo ralo, zwoṱhe zwine zwa vha Bivhilini zwi ri thusa u ḓivha Mudzimu. Musi ri tshi sedza nḓila ine a shumisana ngayo na vhathu ri a kona u vhona zwine a vha zwone. Ri guda uri ndi vhathu vha mufudaḓe vhane a vha takalela na vhane a si vha takalele. (Psalme ya 15:1-5) Ri guda mavhonele awe nga ha vhurabeli, vhuḓifari na nga ha lupfumo. Nahone maipfi na zwe Yesu Kristo murwa wa Mudzimu a zwi ita zwo ṅwalwaho Bivhilini, zwi bvisela khagala zwine Yehova a vha zwone.—Yohane 14:9.

Tshiṅwe tshiitisi tsha uri Yehova a ri ṋee Ipfi ḽawe Bivhili ndi uri ri kone u tshila ro takala na u tshila ri tshi ḓivha uri ri khou tshilela mini. Bivhilini, Yehova u ri vhudza uri ri nga vha hani na muṱa wo takalaho, ri nga fushea hani na uri ri nga sedzana hani na mbilaelo dza vhutshilo. Musi ri tshi bvela phanḓa na u vhala wonoyu magazini ri ḓo vhona uri Bivhili i ṋea phindulo dza mbudziso dza ndeme, dzi ngaho: Ndi ngani ri tshi shengela? Vhumatshelo ho ri farela mini? I dovha ya ṱalusa zwe Mudzimu a zwi ita u itela uri hu ḓadzee zwe a vha a tshi zwi ṱoḓa u bva mathomoni.

Hu na zwithu zwinzhi zwine zwa sumbedza uri Bivhili ndi bugu yo khetheaho vhukuma yo ṅwalwaho nga Mudzimu, hu si muṅwe muthu. Yo ṅwalwa nga miṅwaha i ṱoḓaho u vha 1 600 nga vhanna vha 40, fhedzi naho zwo ralo, mulaedza wayo u kha ḓi vha muthihi ngauri Muṅwali wayo ndi Mudzimu. (2 Timotheo 3:16) U fhambana na dziṅwe bugu dza kale, yo vhulungwa zwavhuḓi u swika na ṋamusi samusi zwi tshi sumbedzwa nga maṅwalwa manzhi a kale a Bivhili. Zwiṅwe hafhu, Bivhili yo ḓi dzula i hone hu sa londwi zwe vhathu vha ita u itela uri i si wanale nga dziṅwe nyambo, i si phaḓaladzwe na u vhaliwa. Ṋamusi Bivhili ndi yone bugu yo phaḓaladzwaho na ine ya wanala nga nyambo nnzhi u fhira bugu naho i ifhio. U vha hone ha Bivhili u swika zwino zwi sumbedza uri “fhungo ḽa Yehova ḽo ima lini na lini.”—Yesaya 40:8.

Zwiṅwe zwe Mudzimu a zwi swikelela ndi u ita ndugiselelo u itela u khwaṱhisedza zwine a ṱoḓa zwi tshi itea kha vhathu. Samusi zwo no ḓi ambiwa, Mudzimu o sika vhathu uri vha tshile lwa tshoṱhe kha ḽifhasi. Naho zwo ralo, musi Adamu a tshi khetha u sa thetshelesa Mudzimu a ita tshivhi, o xelelwa nga tshibuli tsha uri ene na vhaḓuhulu vhawe vha tshile lwa tshoṱhe. “Tshivhi tsho dzhena shangoni nga muthu muthihi nahone tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.” (Vharoma 5:12) U sa thetshelesa ha Adamu ho vhonala hu tshi nga ho thithisa zwine Mudzimu a zwi ṱoḓela vhathu. Yehova o aravha hani?

Zwe Yehova a ita zwo vha zwi tshi tendelana na zwine a vha zwone. O ita uri Adamu na Eva vha  ḓifhindulele kha zwe vha ita, fhedzi a itela vhana vhavho ndugiselelo. Yehova o shumisa vhuṱali u itela u wana nḓila ye a vha a tshi ḓo sedzana ngayo na honovhu vhuimo, a mbo ḓi amba zwine zwa ḓo vhu tandulula. (Genesi 3:15) Tshivhi na lufu zwo vha zwi tshi ḓo fheliswa hu tshi shumiswa Yesu Kristo ane a vha Murwa wa Mudzimu. Zwenezwo zwo katela mini?

U itela u vhofholola vhathu kha masiandoitwa a u sa pfa ha Adamu, Yehova o rumela Yesu kha ḽifhasi u itela u gudisa vhathu nḓila ya u wana vhutshilo na u “ṋekedza vhutshilo hawe uri vhu vhe tshirengululi a tshi itela vhanzhi.” a (Mateo 20:28; Yohane 14:6) Yesu o vha a tshi ḓo kona u vha tshirengululi ngauri o vha e munna a si na tshivhi, a tshi nga Adamu zwiḽa a sa athu ita tshivhi. Fhedzi u fhambana na Adamu, Yesu o dzula a tshi thetshelesa u swika a tshi fa. Samusi Yesu o vha a songo fanela u fa, Yehova o mu vusa uri a dovhe a ye u tshila ṱaḓulu. Nga zwenezwo, Yesu o ita uri vhathu vha vhe na fulufhelo ḽa u tshila nga hu sa fheli, zwithu zwe Adamu a kundelwa u zwi ita. “Samusi u sa thetshelesa ha muthu muthihi ho ita uri vhanzhi vha vhe vhaitazwivhi, nga hu fanaho na u thetshelesa ha muthu muthihi ho ita uri vhanzhi vha pfi vho luga.” (Vharoma 5:19) A tshi shumisa tshiṱhavhelo tsha Yesu tshi rengululaho, Mudzimu u ḓo ita uri fhulufhedziso ḽawe ḽa uri vhathu vha tshile nga hu sa fheli kha ḽifhasi ḽi ḓadzee.

Ri guda zwinzhi nga ha Yehova nga u sedza nḓila ye a tandulula ngayo thaidzo dze dza ḓiswa nga u sa thetshelesa ha Adamu. Ri kona u vhona uri a hu na tshine tsha nga thivhela Yehova kha u fhedzisa zwe a thoma; ipfi ḽawe ḽi ḓo “vuledza.” (Yesaya 55:11) Ri dovha ra guda uri Yehova u a ri funa vhukuma. “Ro dzumbululelwa lufuno lwa Mudzimu nga yeneyi nḓila, ngauri Mudzimu o ruma Murwa wawe mubebwa e eṱhe shangoni uri ri kone u wana vhutshilo ngae. Lufuno lu nga heyi nḓila, a si riṋe vhe ra funa Mudzimu, fhedzi ndi ene we a ri funa, a rumela Murwa wawe uri a vhe tshiṱhavhelo tshi pfumelelaho zwivhi zwashu.”—1 Yohane 4:9, 10.

Mudzimu ho ngo “thivhela Murwa wawe uri a si tambule, ngeno o mu ṋekedza a tshi itela riṋe roṱhe,” nga zwenezwo ri nga vha na vhungoho ha uri Mudzimu u ḓo “ri ṋea zwiṅwe zwithu zwoṱhe nga vhuthu” zwe a fhulufhedzisa. (Vharoma 8:32) Ndi mini zwe Mudzimu a fhulufhedzisa u ri itela? Bvelani phanḓa na u vhala.