VHAVHINGANI
1: U Ḓiimisela U Dzula Mbinganoni
ZWINE ZWA AMBA ZWONE
Vhavhingani vho ḓiimiselaho u dzula vhoṱhe, a vha humbuli nga ha ṱhalano nahone zwenezwi zwi ita uri vha ḓipfe vho tsireledzea. Muṅwe na muṅwe wavho u vha o ḓiimisela u dzula mbinganoni naho zwithu zwi tshi nga konḓa.
Vhaṅwe vhavhingani vha pfa vha tshi kombetshedzea u dzula vhoṱhe nga u ofha uri vhathu vha ḓo ri mini. Fhedzi tsha khwiṋe ndi musi vhavhingani vha tshi dzula vhoṱhe nga ṅwambo wa u funana na u ṱhonifhana.
ZWINE BIVHILI YA AMBA: “Munna a songo ṱutshela mufumakadzi wawe.”—1 Vhakorinta 7:11.
Micah o amba uri: “Arali no ḓiimisela u dzula noṱhe mbinganoni, a ni tendi u sokou sinyuswa nga tshiṅwe na tshiṅwe. Ni a ṱavhanya u humbela pfarelo na u hangwela. A ni dzhii thaidzo sa zwithu zwine zwa nga ita uri ni ṱalane.”
NDI NGANI ZWI ZWA NDEME
Musi vhavhingani vha songo ḓiimiselaho u dzula vhoṱhe vha tshi ṱangana na thaidzo vha mbo ḓi ri, ‘Ro vha ri songo tea u vhingana ro tou khakha’ nahone vha mbo ḓi ṱoḓa nḓila ya u ḓibvisa kha yeneyo mbingano.
Jean o amba uri: “Vhathu vhanzhi vha dzhenelela mbingano vha tshi humbula uri arali ha vhifha, vha ḓo ṱalana. Musi vhathu vha tshi dzhenelela mbingano vha tshi humbula uri vha ḓo ṱalana, zwenezwo zwi sumbedza uri vho vha vha songo ḓiimisela u dzula vhoṱhe na luthihi.”
ZWINE NA NGA ITA
ḒIVHUDZISENI ZWI TEVHELAHO
Musi hu na zwithu zwine a ni khou anḓana khazwo . . .
Naa ni a ḓiwana ni tshi khou ḓisola uri ndi ngani no vhinga mufarisi waṋu?
Naa ni a humbula uri no vha no tea no vhinga kana u vhingwa nga muṅwe muthu?
Naa ni amba zwithu zwi ngaho sa, “ndi khou ni litsha, ndi ḓo wana muṅwe wa khwiṋe”?
Arali no ri ee kha iṅwe ya dzenedzi mbudziso, ni khou tea u ita tshanduko hu tshee zwino.
HASELEDZANI ZWI TEVHELAHO NA MUFARISI WAṊU
Naa ri tshee ro ḓiimisela u dzula roṱhe? Arali zwi songo ralo ndi ngani?
Ri nga ita mini zwino u itela uri ri dzule ro ḓiimisela u dzula roṱhe?
ZWINE ZWA NGA THUSA
Itani ni tshi ṅwalela mufunwa waṋu mulaedza mupfufhi wa lufuno
Sumbedzani uri no ḓiimisela u dzula noṱhe nga u dzula ni na tshinepe tsha mufarisi waṋu khamusi kha ṱafula mushumoni
Founelani mufarisi waṋu kana u mu rumela mulaedza ḓuvha na ḓuvha musi ni mushumoni kana a siho tsini
ZWINE BIVHILI YA AMBA: “Zwo vhofhekanywaho nga Mudzimu muthu a songo zwi fhandekanya.”—Mateo 19:6.
