NGUDO 19
Mukoma A Fulufhedzeaho Na Wa Vhuṱali Ndi Nnyi?
Roṱhe ri a vhuyelwa nga zwiḽiwa zwashu zwa muya
Nga phanḓanyana Yesu a sa athu fa, o amba tshiphirini na vhafunziwa vhawe vhaṋa—Petro, Yakobo, Yohane na Andrea. Musi Yesu a tshi khou porofita nga ha tshiga tsha u vha hone hawe maḓuvhani a vhufhelo, o vhudzisa mbudziso ya ndeme: “Zwino, mukoma a fulufhedzeaho na wa vhuṱali ndi nnyi, we muṋe wawe a mu kumedza vhalanda vhawe uri a vha fhe zwiḽiwa nga tshikhathi tshazwo.” (Mateo 24:3, 45; Marko 13:3, 4) Yesu o vha a tshi khou khwaṱhisedza vhafunziwa vhawe uri samusi e “muṋe” wavho, o vha a tshi ḓo vhea vhathu vhe vha vha vha tshi ḓo bvela phanḓa u kanzwa vhatevheli vhawe nga zwiḽiwa zwa muya tshifhingani tsha vhufhelo. Ndi vhafhio vhe vha vha vha tshi ḓo vhumba onoyo mukoma?
Ndi tshigwada tshiṱuku tsha vhatevheli vha Yesu vho ḓodzwaho nga muya. Hu na vhuṱumani ho khwaṱhaho vhukati ha onoyo “mukoma” na Tshigwada tshi Langaho tsha Ṱhanzi dza Yehova. Mukoma u phaḓaladza zwiḽiwa zwa muya nga tshifhinga tshazwo u itela vhagwadameli vha Yehova. Ri ḓisendeka nga onoyo mukoma a fulufhedzeaho uri a bvele phanḓa a tshi ri ṋea ‘mikovhe yashu nga tshifhinga tshayo.’—Luka 12:42.
Vha ṱhogomela vha nnḓu ya Mudzimu. (1 Timotheo 3:15) Yesu o hwesa mukoma vhuḓifhinduleli vhu lemelaho ha u ṱhogomela mushumo wa tshipiḓa tsha kha ḽifhasi tsha ndangulo ya Yehova—u ṱhogomela thundu dzayo, u livhisa mushumo wa u huwelela na u ri funza nga zwivhidzo zwashu. Nga zwenezwo, u itela u ri ṋea zwine ra zwi shaya nga tshifhinga tshazwo, “mukoma a fulufhedzeaho na wa vhuṱali” u phaḓaladza zwiḽiwa zwa muya nga khandiso dzine ra dzi shumisa vhuḓinḓani hashu, kathihi na nyambo dzine ra dzi wana miṱanganoni na maguvhanganoni ashu.
Mukoma u a fulufhedzea kha mafhungo-ngoho a Bivhili na kha ndaela yawe ya u huwelela mafhungo maḓifha nahone ndi wa vhuṱali kha nḓila ine a ṱhogomela ngayo thundu dza Kristo kha ḽifhasi. (Mishumo 10:42) Yehova u khou fhaṱutshedza mushumo wa mukoma nga u ita uri hu vhe na nyengedzeo na ndugiselelo nnzhi dza zwiḽiwa zwa muya.—Yesaya 60:22; 65:13.
-
Yesu o vhea nnyi uri a kanzwe vhafunziwa vhawe nga lwa muya?
-
Mukoma u a fulufhedzea nahone ndi wa vhuṱali nga nḓila-ḓe?
You May Also Like
TSHIINGAMO—TSHI GUDWAHO
“Ndi Nnyi Ane Zwa Vhukuma A Vha Mulanda A Fulufhedzeaho Na Wa Vhuṱali?”
Heyi thero i ḓo ri thusa u pfesesa nga ha mulanda a fulufhedzeaho na wa vhuṱali. Ṱhogomelani nḓila ine mutakalo washu wa muya wa ḓitika ngayo nga vhenevha vhane vha khou shumiswa.
