NGA murahu ha maḓuvha a fumi Yesu o no gonya ṱaḓulu, vhafunziwa vhawe vha ṱoḓaho u vha 120 vho mbo ḓi kuvhangana nḓuni ngei Yerusalema nga tshifhinga tsha Vhuṱambo ha Vhayuda ha Pentekoste ya 33 C.E. Nga khathihi fhedzi, ha pfala ḓumbu ḽa maanḓa ḽi tshi vhudzula ḽa ḓadza henefho fhethu. Nga lwa vhuṱolo vhafunziwa vha thoma u amba nga ndimi dzine vha sa dzi ḓivhe. Ndi mini tshe tsha vha tshi tshi nga ṱalutshedza zwenezwi zwiitea zwi songo ḓoweleaho? Mudzimu o vha o ṋea vhafunziwa muya mukhethwa.

Nnḓa ho vha hu na magogo nga ṅwambo wa uri vhaeni vho vha vho ḓa vha tshi bva mashangoni manzhi u itela honovhu vhuṱambo. Vho vha vho mangala u pfa vhafunziwa vha Yesu vha tshi khou amba ndimi dzavho nga nḓila yavhuḓi! Musi a tshi ṱalutshedza zwe zwa itea, Petro o mbo ḓi redza vhuporofita ha muporofita Yoele uri Mudzimu u ḓo “shulula” muya wawe, une wa ḓo vha ṋea zwifhiwa zwa u ita vhuṱolo. (Yoele 2:28, 29) Honovhu vhuṱanzi ha muya mukhethwa ho zwi sumbedza zwavhuḓi uri ho itea tshanduko ya ndeme: Mudzimu ha tsha takalela Vhaisiraele, fhedzi u vho takalela tshivhidzo tshiswa vha Vhukriste. Vhane vha ṱoḓa u shumela Mudzimu zwino nga nḓila i ṱanganedzeaho vha fanela u vha vhatevheli vha Kristo.

Nga tshenetsho tshifhinga, u tovholwa ha ḓiṋea maanḓa, nahone maswina a isa vhafunziwa khothoni. Fhedzi vhusikuni honoho, muruṅwa wa Yehova a vula miṋango ya khothoni nahone a vhudza vhafunziwa uri vha bvele phanḓa vha tshi huwelela. Vha bvela phanḓa vha tshi huwelela u swika nga matsheloni. Vha dzhena thembeleni nahone vha thoma u funza mafhungo maḓifha nga ha Yesu. Vhahanedzi vha vhurereli vho vha vho sinyuwa nahone vha vha vhudza uri vha litshe u huwelela. Vha sa ofhi vhaapostola vha fhindula vha ri: “Kha vhathu na Mudzimu, a pfeswaho nga a vhe Mudzimu.”—Mishumo 5:28, 29.

U tovholwa ha bvela phanḓa. Muṅwe Muyuda a pomoka mufunziwa Stefano uri o semana nahone vha mu kanḓa nga matombo u swikela a tshi fa. Muṅwe muṱhannga—ane a pfi Saulo wa Tariso—o vha o sedza musi a tshi vhulahwa. Nga zwenezwo o mbo ḓi ya Damaseko u itela u fara muṅwe na muṅwe ane a vha mutevheli wa Kristo. Musi Saulo a tshi khou tshimbila nḓilani, o mbo ḓi penyelwa nga tshedza tshi bvaho ṱaḓulu nahone a pfa ipfi ḽi tshi ri: “Saulo, Saulo, U ntovholela’ni?” A si tsha kona u vhona nga ṅwambo wa tshedza, Saulo a vhudzisa a ri: “U nnyi?” Ipfi ḽa fhindula ḽa ri: “Ndi nṋe Yesu.”—Mishumo 9:3-5.

Nga murahu ha maḓuvha mararu, Yesu o mbo ḓi ruma mufunziwa Anania u itela u fhodza Saulo uri a dovhe a vhone. Saulo o mbo ḓi lovhedzwa nahone a thoma u huwelela nga tshivhindi nga ha Yesu. Saulo o mbo ḓi thoma u ḓivhiwa sa muapostola Paulo nahone a vha muraḓo u fhiseaho wa tshivhidzo tsha Vhukriste.

Vhafunziwa vha Yesu vho vha vha tshi khou ḓivhadza mafhungo maḓifha a Muvhuso wa Mudzimu kha Vhayuda na Vhasamaria fhedzi. Muruṅwa o mbo ḓi ḓa kha Koronelio, mulangammbi wa Muroma ane a ofha Mudzimu, a mu vhudza uri a ye u vhidza muapostola Petro. A tshi fhelekedzwa nga vhaṅwe, Petro o mbo ḓi huwelela kha Koronelio na vha muṱa wawe. Musi Petro a tshi khou amba, vhatendi vha Vhannḓa vho mbo ḓi dzhenwa nga muya mukhethwa, nahone muapostola a laedza uri vha lovhedzwe dzinani ḽa Yesu. Nḓila i yaho vhutshiloni vhu sa fheli yo vha yo vuletshela vhathu vha tshaka dzoṱhe. Tshivhidzo tsho vha tsho ḓilugisela u huwelela mafhungo maḓifha fhethu hoṱhe.

—Enea mafhungo a wanala kha Mishumo 1:1–11:21.