NGUDO 2
Rebeka O Vha A Tshi Ṱoḓa U Takadza Yehova
Rebeka o vha e mufumakadzi a funaho Yehova. Dzina ḽa munna wawe ḽo vha ḽi Isaka. Na ene o vha a tshi funa Yehova. Rebeka o ṱangana hani na Isaka? O zwi sumbedza hani uri o vha a tshi ṱoḓa u takadza Yehova? Kha ri gude zwo engedzeaho nga hae.
Vhabebi vha Isaka ho vha hu Abrahamu na Sara. Vho vha vha tshi dzula shangoni ḽa Kanana, he vhathu vha vha vha sa gwadameli Yehova, fhedzi Abrahamu o vha a tshi ṱoḓa uri murwa wawe a vhinge mufumakadzi a gwadamelaho Yehova. Ngauralo, a ruma mulanda wawe Eliesere uri a yo ṱoḓela Isaka mufumakadzi shangoni ḽi no pfi Harani, fhethu he ha vha hu tshi dzula maṅwe mashaka a Abrahamu.
Rebeka o vha ḓiimisela u shuma nga maanḓa u itela u kela dzikamela maḓi
Eliesere o tshimbila na vhaṅwe vhalanda vha Abrahamu. Lwo vha lwendo lulapfu vhukuma. Vho ḓa na dzikamela dza fumi dzo hwalaho zwiḽiwa na zwifhiwa. Eliesere o vha a tshi ḓo ḓivha hani uri ndi ufhio mufumakadzi ane a fanela u mu khethela Isaka? Musi Eliesere na vhaṅwe vhalanda vha tshi swika ngei Harani, vho ima tshisimani ngauri Eliesere o ḓivha uri hu si kale vhathu vho vha vha tshi ḓo ḓa vha ka maḓi. O rabela kha Yehova a ri: ‘Arali nda humbela musadzi uri a mphe maḓi a nṋea, a dovha a ṋea na dzikamela dzanga maḓi, Ndi ḓo zwi ḓivha uri hoyu ndi ene mufumakadzi we iwe wa mu khetha.’
Nga zwenezwo Rebeka ane a kha ḓi vha muswa a ḓa tshisimani. Bivhili i amba uri o vha o naka vhukuma. Eliesere a mu humbela maḓi a u nwa nahone Rebeka a ri: ‘Zwo luga. Ndi ḓo u fha maḓi, nahone ndi ḓo ya nda kela na dzikamela dzau.’ Edzani u humbula! Musi dzikamela dzi na ḓora dzi nwa maḓi manzhi, ngauralo Rebeka o gidimela tshisimani lunzhi-lunzhi. Naa ni khou zwi vhona kha tshifanyiso uri u khou shuma nga maanḓa?— Eliesere o vha o mangala vhukuma nḓila ye Yehova a fhindula ngayo thabelo yawe.
Eliesere o ṋea Rebeka zwifhiwa zwinzhi zwavhuḓi. Rebeka o ramba Eliesere na vhaṅwe vhashumeli muṱani wa hawe. Eliesere o ṱalutshedza uri ndi ngani Abrahamu o mu ruma kha heḽo shango na nḓila ye Yehova a fhindula ngayo thabelo yawe. Muṱa wa ha Rebeka wo tenda uri Isaka a mu vhinge.
Rebeka o ya Kanana na Eliesere nahone a vhingwa nga Isaka
Fhedzi naa ni humbula uri Rebeka o vha a tshi ṱoḓa u vhingwa nga Isaka?— Rebeka o vha a tshi zwi ḓivha uri Eliesere o rumiwa nga Yehova. Ngauralo, musi muṱa wa ha Rebeka u tshi mu vhudzisa uri u a ṱoḓa u ya Kanana u vhingwa nga Isaka, ene o ri: ‘Ee, Ndi khou ṱoḓa u ya.’ Nga u ṱavhanya, a ṱuwa na Eliesere. Musi vha tshi swika Kanana, a vhingwa nga Isaka.
Ngauri Rebeka o ita zwe Yehova a vha a tshi khou ṱoḓa uri a zwi ite, Yehova o mu fhaṱutshedza. Nga murahu ha miṅwaha minzhi, Yesu o bebwa kha lushaka lwa ha Rebeka! Arali na fana na Rebeka nahone na takadza Yehova, na inwi u ḓo ni fhaṱutshedza.
