Vhahashu Vha Funwaho:

Nga nṱhani ha uri ri funa Mudzimu na vhathu, ri tevhela ndaela ine ya ri: “Iyani ni ite vhathu vha tshaka dzoṱhe vhafunziwa, ni vha lovhedze.” (Mat. 28:19, 20; Marko 12:28-31) Musi ri tshi funa vhathu, zwi ri ṱuṱuwedza uri ri thuse “vho ḓiimiselaho u wana vhutshilo vhu sa fheli.”​—Mish. 13:48.

Tshifhingani tsho fhiraho, ro vha ri tshi livhisesa ṱhogomelo kha u rwela ngomani zwine ra ḓo zwi amba tsimuni na u tshimbidza dzikhandiso. Fhedzi zwino tsha ndeme ndi u khwinisa nḓila ine ra ambedzana ngayo na vhathu. Ri ṱoḓa u vha sumbedza uri ri na ndavha navho nga u amba nga ha zwithu zwine vhone vha zwi takalela. Uri ri ite zwenezwo, hu ṱoḓea uri ri tendelane na zwiimo nahone ri humbule nga ha muthu muṅwe na muṅwe na zwine a zwi takalela. Itshi tshibugwana tshi ḓo ri thusa hani uri ri ite zwenezwo?

Tshenetshi tshibugwana tshi na ngudo dza 12 dzine dza ri funza zwine ra nga zwi ita u itela u ita vhafunziwa na u sumbedza vhathu uri ri a vha funa. Ngudo iṅwe na iṅwe i amba nga ha Yesu kana Vhakriste vha tshifhingani tsho fhiraho na zwine ra nga zwi ita tsimuni u itela u vha edzisa. Tshipikwa tshashu tshihulwane a si u lingedza u humbula zwine ra ḓo zwi amba, fhedzi ndi u sumbedza vhathu uri ri a vha funa. Naho zwiṅwe na zwiṅwe zwine ra ḓo zwi guda kha dzenedzi ngudo zwi zwa ndeme musi ri tsimuni, ri ḓo guda nga ha uri ndi ngani zwiṅwe zwazwo zwi zwa ndeme na u fhirisa musi ri tshi thoma nyambedzano, ri tshi ita nyendo dza u vhuyelela kana u fara ngudo dza Bivhili.

Musi ni tshi guda ngudo iṅwe na iṅwe, humbulani nga ha uri zwine na khou zwi guda ni nga zwi shumisa hani musi ni tshi khou huwelela kha vhathu vha hune na dzula hone. Lingedzani u ita uri ni fune Yehova na vhathu nga ho engedzeaho. Samusi lufuno lu lwone lwa ndemesa, ndi lwone lune lwa ḓo ni thusa uri ni swikelele tshipikwa tshaṋu tsha u ita vhafunziwa.

Ri zwi dzhia zwi ndugelo khulwane u shuma na vhoiwe nga vhuthihi. (Tsef. 3:9) U nga ri Yehova a nga ni fhaṱutshedza zwihulu musi ni tshi bvela phanḓa ni tshi funa vhathu na u ita vhafunziwa!