Ni a ḓivha uri avha vhanna ndi vhonnyi na uri vha khou ita mini? Vha khou ya nndwani, nahone vhanna vha re afho phanḓa vha khou imba. Fhedzi ni nga vhudzisa: ‘Ndi ngani vhaimbi vha si na mabanga na mapfumo a u lwa?’ Kha ri vhone.

Yosafati o vha e khosi ya muvhuso wa tshaka mbili dza Isiraele. O vha a tshi tshila nga tshifhinga tsha Khosi Ahaba na Isebele vha muvhuso wa devhula wa tshaka dza 10. Fhedzi Yosafati o vha e khosi yavhuḓi, na khotsi awe Asa o vha e khosi yavhuḓi. Nga miṅwaha minzhi vhathu vha muvhuso wa tshaka mbili dza tshipembe vho vha vha tshi ḓiphina nga vhutshilo havhuḓi.

Fhedzi zwenezwo ha itea tshiṅwe tshithu tshe tsha ofhisa vhathu. Vharumiwa vha vhikela Yosafati: ‘Mmbi khulu i bvaho shangoni ḽa Moaba, ḽa Amoni na ḽa Thavhani ya Seiri i khou ḓa u u lwisa.’ Vhaisiraele vha kuvhangana Yerusalema u ṱoḓa thuso ya Yehova. Vha ya thembeleni, henengei Yosafati a rabela: ‘Yehova Mudzimu washu, a ri ḓivhi zwine ra nga ita. Ri ṱoḓa thuso kha iwe.’

Yehova a thetshelesa, a ita uri muṅwe wa vhaḓinḓa vhawe a vhudze vhathu: ‘Nndwa a si ya vhoinwi, ndi ya Yehova. A ni nga lwi. Ni sokou sedza uri Yehova u ḓo ni tshidza hani.’

Nga matsheloni a tevhelaho Yosafati a vhudza vhathu: ‘Fulufhedzani Yehova!’ Zwenezwo a vhea vhaimbi phanḓa ha maswole, nahone vha tshi tshimbila vha imbela Yehova dzithendo. Ni a ḓivha uri ha itea mini musi vha tshi sendela tsini ha nndwa? Yehova a ita uri maswole a maswina a lwe nga tshao. Musi Vhaisiraele vha tshi swika, maswole oṱhe a maswina o vha o fa!

Naa Yosafati o vha a songo thanya nga u fulufhedza Yehova? Na rine ri ḓo vha ro thanya arali ra Mu fulufhedza.

1 Dzikhosi 22:41-53; 2 Koronika 20:1-30.