‘Ni Tevhedze Zwine Nda Amba’

“Arali na tevhedza zwine nda amba, ni vhafunziwa vhanga zwa vhukuma, ni ḓo ḓivha ngoho, hone ngoho i ḓo ni vhofholola.”​—YOHANE 8:31, 32.

Zwi Amba Mini?: Zwe Yesu a “amba” zwo vha zwi tshi bva kha Mudzimu. Yesu o ri: “Khotsi we a nthuma o mmbudza zwine nda fanela u zwi amba na u zwi funza.” (Yohane 12:49) Musi a tshi khou rabela Khotsi awe wa ṱaḓulu, ane a vha Yehova Mudzimu, o ri: “Mafhungo au ndi a ngoho.” Musi a tshi funza o vha a tshi dzulela u amba zwine zwa vha Ipfini ḽa Mudzimu. (Yohane 17:17; Mateo 4:4, 7, 10) Vhakriste vha vhukuma vha ‘tevhedza zwine Yesu a amba’ nga u tenda uri zwine Ipfi ḽa Mudzimu ḽa zwi amba ndi “ngoho.” Nahone zwine vha zwi tenda na nḓila ine vha tshila ngayo zwo thewa Bivhilini.

Vhakriste Vha U Thoma Vho Zwi Ita Hani?: Muapostola Paulo we a ṅwala bugu nnzhi dza Bivhili, o vha a tshi ṱhonifha Ipfi ḽa Mudzimu u fana na Yesu. O ri: “Maṅwalo oṱhe o hevhedzwa nga Mudzimu.” (2 Timotheo 3:16) Vhanna vhe vha vha vho vhewa uri vha funze Vhakriste ngavho, vho vha vha tshi fanela u ‘farelela nga ho khwaṱhaho ipfi ḽa Mudzimu ḽi fhulufhedzeaho.’ (Tito 1:7, 9) Vhakriste vha u thoma vho vhudzwa uri vha iledze “pfunzo dza vhaṱali na vhufhura ha sialala ḽa vhathu, u ya nga kuhumbulele kwa shango, hu si u ya nga Kristo.”​—Vhakolosa 2:8.

Ndi Vhafhio Vhane Vha Zwi Ita Ṋamusi?: Bugu ine ya pfi Vatican’s Dogmatic Constitution on Divine Revelation ya 1965 ye ya ambiwa nga Catechism of the Catholic Church i ri: “Zwithu zwine vha kereke ya Katolika vha zwi tenda a zwo ngo thewa kha Maṅwalo makhethwa fhedzi. Vha vhona u nga mikhuvha yavho na zwine Maṅwalo a zwi amba zwi tea u dzhielwa nṱha nga nḓila i fanaho.” Iṅwe thero ya magazini wa Maclean yo amba zwe muṅwe mufunzi wa ngei Canada a zwi amba a tshi ri: “Ndi ngani ri tshi tea u tevhedza zwithu zwo ambiwaho miṅwaha i ṱoḓaho u vha 2 000 yo fhiraho? Mihumbulo yashu a i tshi dzhielwa nṱha ngauri hu tea u tikedzwa zwe Yesu a zwi amba na zwi re Maṅwaloni.”

Bugu ine ya pfi New Catholic Encyclopedia yo amba zwi tevhelaho nga ha Ṱhanzi dza Yehova. Yo ri: “Zwithu zwoṱhe zwine vha zwi tenda na nḓila ine vha tshila ngayo, zwo thewa Bivhilini fhedzi.” Musi muṅwe mufumakadzi wa ngei Canada ane a vha Ṱhanzi a tshi khou ḓiḓivhadza e tsimuni, muṅwe munna o mu dzhena haṋwani. O sumba Bivhili yawe a ri: “Vhoiwe ndi tou ni ḓivha nda ni fhedza, ndi ni ḓivhela u shumisa Bivhili.”