“Ndo Ḓivhadza Dzina Ḽau”

“Ndo ḓivhadza dzina ḽau kha vhathu vhe wa nṋea vhone vha tshi bva shangoni. . . . Ndo vha ḓivhadza dzina ḽau, ndi ḓo dzula ndi tshi ḽi ḓivhadza.”​—YOHANE 17:6, 26.

Zwi Amba Mini?: Yesu o ḓivhadza vhathu dzina ḽa Mudzimu nga u ḽi shumisa musi a tshi khou funza. Yesu o vha a tshi anzela u vhala Maṅwalo nahone zwi tou pfala uri o vha a tshi bula dzina ḽa Mudzimu. (Luka 4:16-21) O funza vhatevheli vhawe uri musi vha tshi rabela vha ri: “Khotsi, dzina ḽau nga ḽi vhe ḽikhethwa.”​—Luka 11:2.

Vhakriste Vha U Thoma Vho Zwi Ita Hani?: Muapostola Petro o ṱalutshedza vhahulwane ngei Yerusalema uri Mudzimu o nanga “vhane vha ḓo vhidzwa nga dzina ḽawe” kha dzitshaka. (Mishumo 15:14) Musi vhaapostola na vhaṅwe vha tshi funza vho vha vha tshi ri: “Vhoṱhe vha vhidzelelaho dzina ḽa Yehova vha ḓo tshidzwa.” (Mishumo 2:21; Vharoma 10:13) Vho vha vha tshi shumisa dzina ḽa Mudzimu na musi vha tshi ṅwala. Bugu ine ya pfi The Tosefta ye ya vha i na milayo ya Tshiyuda yo fhedzwaho u ṅwalwa nga vho 300 C.E., i amba zwi tevhelaho malugana na u fhisiwa ha maṅwalwa a Tshikriste nga vhapikisi. I ri: “Vho vha vha tshi fhisa bugu dza Vhaevangeli na dza vha minim [vhe ha humbulwa uri ndi Vhakriste vha Vhayuda]. Vho tendelwa u fhisa dzenedzo bugu . . . dzi re na dzina ḽa Mudzimu.”

Ndi Vhafhio Vhane Vha Zwi Ita Ṋamusi? Iṅwe ṱhalutshedzelo ya Bivhili ine ya pfi Revised Standard Version yo tendelwaho nga Dzangano ḽa Dzikereke (NCC) ḽa ngei Amerika yo amba zwi tevhelaho kha marangaphanḓa ayo: “U vhidza Mudzimu wa ngoho nga dzina ḽawe zwa tou nga ri khou mu ṱalula kha miṅwe midzimu, zwo guma u shumiswa kha Tshiyuda na Vhukriste vhu sa athu u thoma nahone Vhakriste vhoṱhe a vho ngo tea u ḽi shumisa.” Nga zwenezwo, yeneyo Bivhili yo mbo ḓi shumisa dzina zwaḽo “MURENA” nṱhani ha dzina ḽa Mudzimu. A si kale kereke ya Roma yo vhudza vhabishopo vhayo uri: “Dzina ḽa Mudzimu YHWH * ḽi songo tsha buliwa kha dzinyimbo na kha dzithabelo.”

Ndi vhafhio vhane vha shumisa dzina ḽa Mudzimu na u ḽi ḓivhadza ṋamusi? Musi Sergey wa ngei Kyrgyzstan a tshi kha ḓi vha muswa, o vhuya a ṱalela fiḽimu ye ya amba uri dzina ḽa Mudzimu ndi Yehova. O fhedza miṅwaha ya fumi a si tsha pfa dzina ḽa Mudzimu ḽi tshi ambiwa. Nga murahu, musi Sergey o no pfulutshela Amerika, o dalelwa nga Ṱhanzi mbili, vhe vha mu sumbedza dzina ḽa Mudzimu Bivhilini. Sergey o takalela u wana vhathu vhe vha vha vha tshi shumisa dzina ḽa Yehova. Zwi takadzaho ndi uri kha Webster’s Third New International Dictionary, fhasi ha maipfi “Yehova Mudzimu,” ho ṋewa ṱhaluso i tevhelaho: “Ndi Mudzimu muhulwane a re hone nahone Ṱhanzi dza Yehova vha gwadamela ene fhedzi.”

[Ṱhaluso i re magumoni a siaṱari]