Naa Vhakriste Vhoṱhe Vha Re Hone Ndi Vhakriste Vha Vhukuma?

HU NA Vhakriste vhangana ḽifhasini ḽoṱhe? U ya nga bugu Atlas of Global Christianity, nga 2010 ho vha hu na Vhakriste vha ṱoḓaho u vha 2.3 biḽioni ḽifhasini ḽoṱhe. Yeneyo bugu yo dovha ya amba uri vhenevho Vhakriste vha kha kereke dzi fhiraho 41 000 dzine dza funza zwithu zwi sa fani na u vha na milayo i sa fani nga ha vhuḓifari. Samusi hu na kereke nnzhi nga u rali dza “Tshikriste,” zwi ita uri vhathu vha ḓaḓe uri Vhakriste vha ngoho ndi vhafhio. Vha nga ḓivhudzisa uri: ‘Naa vhathu vhoṱhe vhane vha amba uri vha Vhakriste, vha Vhakriste zwa vhukuma?’

Kha ri zwi sedze nga ḽiṅwe ḽiṱo. Muthu ane a khou ya u dalela ḽiṅwe shango, u tea u amba uri u dzula kha shango ḽifhio musi a tshi swika kha bodara ya ḽeneḽo shango. U tea u dovha a vha na vhuṱanzi vhu sumbedzaho uri ndi ene nnyi, khamusi nga u bvisa passport. Nga nḓila i fanaho, na Mukriste wa ngoho u tea u ita zwi fhiraho u sokou amba uri ene u tenda Kristo. Hu tea u vha na vhuṱanzi vhu sumbedzaho uri u tenda Kristo. Ndi vhufhio honoho vhuṱanzi?

Ipfi “Mukriste” ḽo thoma u shumiswa nga vho 44 C.E. Luka ane a vha muṅwali wa Bivhili o ri: “Ndi henefho Antiokia he Mudzimu a livhisa vhafunziwa uri vha vhidzwe Vhakriste.” (Mishumo 11:26) Vhathu vhe a vha vhidza Vhakriste vho vha vhe vhafunziwa vha Kristo. Ndi mini zwine muthu a tea u zwi ita uri a vhidzwe mufunziwa wa Yesu Kristo? The New International Dictionary of New Testament Theology i ri: “U vha mufunziwa wa Yesu zwi amba uri u ḓo ḓidzima zwiṅwe zwithu vhutshilo hau hoṱhe.” Muthu ane a vha Mukriste wa vhukuma, u tevhedza zwe Yesu ane a vha Muthomi wa Vhukriste a zwi funza na milayo yawe yoṱhe nga mbilu yawe yoṱhe.

Samusi ṋamusi hu na vhathu vhanzhi vhane vha amba uri vha Vhakriste, naa Vhakriste vha vhukuma vha a wanala? Yesu o ri vhatevheli vhawe vha vhukuma ri ḓo vha ḓivha nga mini? Ri humbela uri ni vhone nḓila ine Bivhili ya fhindula ngayo dzenedzo mbudziso. Ri ḓo amba nga ha zwithu zwiṱanu zwe Yesu a ri zwi ḓo ri thusa u ḓivha vhatevheli vhawe vha ngoho. Ri ḓo vhona uri Vhakriste vha u thoma vho ita hani zwenezwo zwithu zwiṱanu. Nahone ri ḓo dovha ra vhona uri ndi vhafhio vhane vha khou ita zwenezwo zwithu zwiṱanu ṋamusi, samusi hu na vhathu vhanzhi vhane vha amba uri vha Vhakriste.