Mishumo Ya Vhaapostola 20:1-38
20 Musi bonyongo ḽo no dzika, Paulo a vhidza vhafunziwa, a vha ṱuṱuwedza a kona u vha onesa, a ya Makedonia.
2 Musi o no tshimbila kha eneo madzingu a tshi ṱuṱuwedza zwihulu vhafunziwa vha henefho, a fhirela Gerika.
3 A fhedza miṅwedzi miraru e henefho, musi a tshi vho ṱoḓa u ya Siria a pfa uri Vhayuda+ vho langana u mu vhulaya. A vhuya nga Makedonia.
4 O vha a tshi khou tshimbila na Sopatere murwa wa Phirosi wa Berea, Aristariko+ na Sekundo vha Thesalonika, Gayo wa Derebe, Timotheo,+ Tixiko+ na Tirofimo+ vha bvaho vunduni ḽa Asia.
5 Vhenevho vhanna vho ṱuwa u thoma vha ri lindela ngei Tiroasi;
6 fhedzi ra ṱuwa Filipi nga tshikepe nga murahu ha maḓuvha a Vhuṱambo ha Vhurotho vhu si na Mbiliso,+ ra ṱangana navho hu sa athu u fhela maḓuvha maṱanu ngei Tiroasi, ra fhedza maḓuvha a sumbe henefho.
7 Nga ḓuvha ḽa u thoma ḽa vhege ra kuvhangana ra ḽa zwiḽiwa. Samusi Paulo o vha a tshi ḓo ṱuwa nga ḓuvha ḽi tevhelaho, a vha funza ha vhuya ha vha vhukati ha vhusiku.
8 Ho vha hu na mbone nnzhi kamarani ya nṱha ye ra vha ro kuvhangana khayo.
9 Muṅwe muṱhannga ane a pfi Oitixo o vha o dzula kha fasiṱere, a farwa nga khofhe khulu musi Paulo a tshi khou amba, a wela fhasi a tshi bva kha nnḓu ya nṱha ya vhuraru, vha tshi ya khae vha wana o fa.
10 Fhedzi Paulo a tsela fhasi, a kwatama a mu kuvhatedza+ a ri: “Ni songo vhilaela, u kha ḓi tshila.”*+
11 A gonya kamarani ya nṱha, a ṅwata vhurotho a ḽa. A bvela phanḓa a tshi amba lwa tshifhinga tshilapfu, u swika ḓuvha ḽi tshi tsha, a kona u ṱuwa.
12 Vha ṱuwa na onoyo muṱhannga a tshi khou tshila, vho khuthadzwa zwihulu.
13 Riṋe ro ṱuwa nga tshikepe ra ya Aso, he Paulo a vha o ri humbela uri ri mu dzhie hone, ngauri o vha a tshi khou ḓa nga milenzhe.
14 Musi ri tshi ṱangana nae ngei Aso, ra mu ṋamedza tshikepe ra ya Mitilene.
15 Nga ḓuvha ḽi tevhelaho ra ya fhethu ho livhanaho na tshiṱangadzime tsha Xio. Ḓuvha ḽi tevhelaho ra ya Samo, nga tsha matshelo ra ya Mileto.
16 Paulo o vha a sa ṱoḓi u dzhena Efesa,+ uri a si fhedze tshifhinga e vunduni ḽa Asia, ngauri o vha a tshi ṱoḓa u ṱavhanya u swika Yerusalema+ nga ḓuvha ḽa Vhuṱambo ha Pentekoste.
17 Musi e henefho Mileto, a ruma muthu Efesa uri a ye a vhidze vhahulwane vha tshivhidzo.
18 Musi vha tshi swika a amba navho a ri: “Ni a ḓivha nḓila ye nda ḓifara ngayo vhukati haṋu u bva tshee nda swika vunduni ḽa Asia,+
19 ndi tshi shumela Murena nga u ḓiṱukufhadza huhulu,+ ndi tshi lila na u tambula ngauri Vhayuda vho vha vha tshi ṱoḓa u mmbulaya,
20 ndo ni vhudza zwithu zwi vhuyedzaho na u ni funza phanḓa ha vhathu+ na nnḓu nga nnḓu.+
21 Fhedzi ndo ṱanziela nga vhuḓalo kha Vhayuda na Vhagerika uri vha fanela u rembuluwa,+ vha gwadamele Mudzimu na u tenda Murena washu Yesu.+
22 Ndi khou ya Yerusalema naho ndi sa ḓivhi zwine zwa ḓo itea kha nṋe, ngauri ndi khou livhiswa nga muya mukhethwa,
23 zwine nda zwi ḓivha ndi uri muya mukhethwa wo ntsevha lunzhi miḓini yoṱhe ye nda ya khayo uri ndi ḓo valelwa dzhele na u tambudzwa.+
24 Naho zwo ralo, a thi dzhii vhutshilo hanga vhu ha ndeme, tsha ndeme ndi uri ndi fhedze mbambe+ yanga na mushumo we nda ṋewa nga Murena Yesu, wa u ḓivhadza nga vhuḓalo mafhungo maḓifha a vhuthu vhuhulu ha Mudzimu.
25 “Ndi a zwi ḓivha uri a ni tsha ḓo mmbona inwi vhe nda ni ḓivhadza nga ha Muvhuso wa Mudzimu.
26 Ndi ngazwo ndo ni vhidza ṋamusi uri ni vhe ṱhanzi dza uri a thi na mulandu wa malofha a vhathu vhoṱhe,+
27 ngauri ndo ni vhudza zwoṱhe zwine Mudzimu a zwi funa.*+
28 Ḓiṱhogomeleni,+ ni ṱhogomele na sambi ḽoṱhe, ḽe muya mukhethwa wa ni vhea uri ni ḽi ṱhogomele,+ ni lise tshivhidzo tsha Mudzimu,+ tshe a tshi renga nga malofha a Murwa wawe.+
29 Ndi a zwi ḓivha uri musi ndo no ṱuwa hu ḓo ḓa maṱarelwa*+ a re na vhuhali ane a ḓo tambudza sambi,
30 vhukati haṋu hu ḓo vha na vhanna vhane vha ḓo shanda ngoho u itela u kunga vhafunziwa uri vha vha tevhele.+
31 “Dzulani no fhaṱuwa, ni humbule uri ndo fhedza miṅwaha miraru+ ndi tshi ṱuṱuwedza muṅwe na muṅwe waṋu nga zwililo vhusiku na masiari.
32 Zwino ndi ni kumedzela kha Mudzimu na kha ipfi ḽa vhuthu hawe vhuhulu, ipfi ḽine ḽa nga ni fhaṱa na u ni ṋea ifa vhukati ha vhoṱhe vho itwaho vhakhethwa.+
33 A hu na we nda lingedza u mu dzhiela siḽiva, musuku kana zwiambaro.+
34 Ni a zwi ḓivha uri ndo shuma nga zwanḓa zwanga uri ndi wane zwine nda shaya+ na zwa vhe nda vha ndi navho.
35 Ndo ni sumbedza kha zwithu zwoṱhe nḓila+ ine na nga thusa ngayo vha si na nungo. Ni songo hangwa zwe Murena Yesu a zwi amba musi a tshi ri: ‘U ṋea+ zwi a takadza u fhira u ṋewa.’”
36 Musi o no fhedza u amba zwenezwo, a gwadama navho vhoṱhe a rabela.
37 Ha vuwa tshililo tshihulu kha vhoṱhe, vha kuvhatedza Paulo vha mu khisa,
38 ngauri vho vha vho ṱungufhalela uri a vha tsha ḓo dovha vha mu vhona.+ Vha mu fhelekedza tshikepeni.
