Evangeli Ya Mateo 13:1-58
-
ZWIFANYISO ZWI AMBAHO NGA HA MUVHUSO (1-52)
-
Muzwali (1-9)
-
Zwo itaho uri Yesu a shumise zwifanyiso (10-17)
-
Zwine tshifanyiso tsha muzwali tsha amba zwone (18-23)
-
Goroi na tsheṋe (24-30)
-
Thoro ya luṋonya na mbiliso (31-33)
-
U shumiswa ha zwifanyiso zwi ita uri hu itee zwo ṅwaliwaho kha vhuporofita (34, 35)
-
Zwine tshifanyiso tsha goroi na tsheṋe tsha amba zwone (36-43)
-
Lupfumo lwo dzumbiwaho na vhulungu havhuḓi (44-46)
-
Mambule (47-50)
-
Lupfumo luswa na lwa kale (51, 52)
-
-
Yesu ha ṱanganedzwi muḓini wa hawe (53-58)
13 Nga ḽeneḽo ḓuvha, Yesu a bva nḓuni a ya a dzula tsini na lwanzhe.
2 Ngauri gogo ḽo vha ḽo mu kuvhanganela, a ṋamela tshikepe a dzula fhasi, ḽeneḽo gogo ḽa ima khunzi-khunzini.+
3 A vha vhudza mafhungo manzhi nga zwifanyiso,+ a ri: “Muzwali o bva a ya a zwala mbeu.+
4 Musi a tshi khou zwala, iṅwe mbeu ya wela thungo ha nḓila, zwiṋoni zwa ḓa zwa i ḽa.+
5 Iṅwe ya wela matomboni, ya mela nga u ṱavhanya ngauri mavu o vha e si manzhi.+
6 Musi ḓuvha ḽi tshi ṱavha, ya puta, ya oma ngauri midzi yo vha i songo tsesa.
7 Iṅwe ya wela mipfani, mipfa ya hula ya ita uri i si tsha hula zwavhuḓi.+
8 Iṅwe ya wela mavuni avhuḓi, ya aṋwa mitshelo, iṅwe ya aṋwa 100, iṅwe 60, iṅwe 30.+
9 A re na nḓevhe nga a pfe.”+
10 Vhafunziwa vhawe vha ḓa khae vha mu vhudzisa vha ri: “Ndi ngani u tshi amba navho nga zwifanyiso?”+
11 A vha fhindula a ri: “Inwi no tendelwa uri ni ḓivhe zwiphiri zwikhethwa+ zwa Muvhuso wa ṱaḓulu, fhedzi vhone a vho ngo tendelwa.
12 Ngauri ane a vha nazwo, u ḓo ṋewa zwinzhi; fhedzi ane a si vhe nazwo, u ḓo dzhielwa na zwine a vha nazwo.+
13 Ndi ngazwo ndi tshi amba navho nga zwifanyiso; uri naho vha tshi lavhelesa, vha si vhone, naho vha tshi pfa vha si pfesese kana vha si zwi ṱalukanye.+
14 Zwe Yesaya a zwi porofita zwi khou itea khavho, musi a tshi ri: ‘U pfa ni ḓo pfa, fhedzi a ni nga zwi pfesesi, ni ḓo lavhelesa, fhedzi ni si vhone tshithu.+
15 Ngauri mbilu dza havha vhathu dzo rindila, vho pfa nga nḓevhe dzavho vha si ite tshithu, vha bonya maṱo na u vala nḓevhe uri vha si vhone kana u pfa tshithu. Zwa ita uri vha si pfesese zwine vha fanela u zwi ita, ndi ngazwo vha sa vhuyeleli kha nṋe uri ndi vha fhodze.’+
16 “Hu takala inwi ngauri maṱo aṋu a a vhona na nḓevhe dzaṋu dzi a pfa.+
17 Ngoho ndi a ni vhudza uri, vhaporofita vhanzhi na vhathu vho lugaho vho tama u vhona zwithu zwine na zwi vhona,+ fhedzi vha si zwi vhone, vho ṱoḓa u pfa zwine na zwi pfa, fhedzi vha si zwi pfe.
18 “Zwino thetshelesani zwine tshifanyiso tsha muzwali tsha amba zwone.+
19 Mbeu yo zwaliwaho thungo ha nḓila, i fanyisela ane a pfa mulaedza wa Muvhuso a si u ṱalukanye, muvhi a ḓa+ a dzhavhula zwo zwaliwaho mbiluni yawe.+
20 Yo zwaliwaho matomboni, i fanyisela ane a pfa mulaedza wa Muvhuso, nga khathihi fhedzi a u ṱanganedza nga dakalo.+
21 Naho zwo ralo, mulaedza a u kwami mbilu yawe. U bvela phanḓa lwa tshifhinganyana, fhedzi a tshi ṱangana na maṱungu kana u tovholwa nga nṱhani ha mulaedza, lutendo lwawe lu a fhela.
22 Yo zwaliwaho mipfani i fanyisela ane a pfa mulaedza, fhedzi mbilaelo dza shango*+ na vhufhura ha lupfumo zwa kwanyeledza mulaedza, a si aṋwe mitshelo.+
23 Yo zwaliwaho mavuni avhuḓi, i fanyisela ane a pfa mulaedza a u ṱalukanya, a kona u aṋwa mitshelo, muṅwe ya 100, muṅwe ya 60, muṅwe ya 30.”+
24 A vha vhudza tshiṅwe tshifanyiso a ri: “Muvhuso wa ṱaḓulu u nga fanyiswa na muthu we a zwala mbeu yavhuḓi tsimuni yawe.
25 Musi vhathu vho eḓela, swina ḽawe ḽa ḓa ḽa zwala tsheṋe vhukati ha goroi, ḽa ṱuwa.
26 Musi goroi i tshi vho mela na u vha na thoro, tsheṋe na yone ya mela.
27 Vhalanda vha ya vha vhudzisa muṋe wa tsimu vha ri, ‘Muṋe washu, naa a wo ngo zwala mbeu yavhuḓi tsimuni yau? Ndi ngani hu na tsheṋe?’
28 A ri, ‘Yo zwaliwa nga swina.’+ Vha amba nae vha ri, ‘Naa u a ṱoḓa ri tshi ya ra i tupula?’
29 Ene a fhindula a ri, ‘Ni songo i tupula, ngauri musi ni tshi i tupula ni nga tupula na goroi.
30 Zwi litsheni zwi aluwe zwoṱhe u swika nga tshifhinga tsha khaṋo, ndi hone ndi tshi ḓo vhudza vhakaṋi nda ri: Thomani nga u tupula tsheṋe ni i vhofhe uri i fhiswe; nga murahu ni kuvhanganye goroi ni i vhee ḓuluni ḽanga.’”+
31 A vha vhudza tshiṅwe tshifanyiso, a ri: “Muvhuso wa ṱaḓulu u fana na thoro ya luṋonya ye muthu a i dzhia a i zwala tsimuni yawe.+
32 Ndi yone thoro ṱhukhusa kha mbeu dzoṱhe, fhedzi musi yo no mela, i fhira zwimela zwoṱhe, i vha muri une zwiṋoni zwa dzula matavhini awo.”
33 A vha vhudza tshiṅwe tshifanyiso a ri: “Muvhuso wa ṱaḓulu u fana na mbiliso, ine mufumakadzi a i suka na fuḽauru ya mielo miraru mihulu, u swika fuḽauru yoṱhe i tshi kukumuwa.”+
34 Yesu o vhudza gogo zwenezwi zwoṱhe a tshi shumisa zwifanyiso. O vha a tshi amba navho nga zwifanyiso fhedzi,+
35 uri hu itee zwo ambiwaho nga muporofita we a ri: “Ndi ḓo amba nga zwifanyiso; ndi ḓo dzumbulula zwe zwa vha zwo dzumbiwa u bva tshee shango ḽa sikwa.”+
36 Musi o no vhofholola gogo, a dzhena nḓuni. Vhafunziwa vhawe vha ḓa khae vha ri: “Ri ṱalutshedze zwine tshifanyiso tsha tsheṋe yo zwaliwaho tsimuni tsha amba zwone.”
37 A vha fhindula a ri: “Muzwali wa mbeu yavhuḓi ndi Murwa muthu;
38 tsimu ndi shango.+ Mbeu yavhuḓi ndi vhana vha Muvhuso, fhedzi tsheṋe ndi vhana vha muvhi,+
39 swina ḽe ḽa zwala tsheṋe ndi Diabolo. Khaṋo ndi vhufhelo ha shango,* vhakaṋi ndi vharuṅwa.
40 Ngauralo, vhunga tsheṋe i tshi tupulwa ya fhiswa nga mulilo, zwi ḓo ralo na vhufheloni ha shango.*+
41 Murwa muthu u ḓo ruma vharuṅwa vhawe, vha kuvhanganya vha bvisa zwikhukhulisi zwoṱhe na vhaitazwivhi Muvhusoni wawe,
42 vha vha posa ṋanḓoni ya mulilo.+ Henefho ndi hune vha ḓo lila na u shenganya maṋo.
43 Nga tshenetsho tshifhinga vho lugaho vha ḓo penya vhunga ḓuvha+ Muvhusoni wa Khotsi avho. A re na nḓevhe nga a pfe.
44 “Muvhuso wa ṱaḓulu u fana na lupfumo lwo dzumbiwaho tsimuni, lune muthu a lu wana a dovha a lu dzumba henefho; nga nṱhani ha u takala hawe a ṱuwa a ya a rengisa thundu yawe, a renga yeneyo tsimu.+
45 “Zwiṅwe hafhu, Muvhuso wa ṱaḓulu u fana na murengisi ane a tshimbila a tshi ṱoḓa vhulungu havhuḓi.
46 Musi o no wana vhulungu ha mutengo muhulu, nga u ṱavhanya a ṱuwa a ya a rengisa thundu yawe yoṱhe, a vhu renga.+
47 “Hafhu, Muvhuso wa ṱaḓulu u fana na mambule o poswaho lwanzheni u itela u fasha khovhe dza mifuda yoṱhe.
48 Musi o no ḓala vha a kokodzela khunzi-khunzini, vha dzula fhasi vha nanga dzavhuḓi+ vha dzi dzhenisa manngini, fhedzi dzi si dzavhuḓi+ vha dzi laṱa.
49 Ndi zwine zwa ḓo itiwa vhufheloni ha shango.* Vharuṅwa vha ḓo khethekanya vhavhi na vhavhuya,
50 vha posa vhavhi ṋanḓoni ya mulilo. Henefho ndi hune vha ḓo lila na u shenganya maṋo.
51 A vha vhudzisa a ri: “Naa izwi zwoṱhe no zwi pfesesa?” Vha ri: “Ee.”
52 A amba navho a ri: “Arali zwo ralo, mufunzi o funzwaho nga ha Muvhuso wa ṱaḓulu, u fana na muṋe wa nnḓu, ane a bvisa kha lupfumo lwawe zwiswa na zwa kale.”
53 Musi Yesu o no fhedza u vha vhudza zwenezwo zwifanyiso, a ṱuwa henefho.
54 A swika muḓini wa hawe,+ a vha funza sinagogoni dzavho, vhathu vha mangala vha ri: “Uyu munna o wana ngafhi uvhu vhuṱali na vhukoni ha u ita yeneyi mishumo ya maanḓa?+
55 Naa a si uḽa ṅwana wa muvhaḓi?+ Mme awe a si Maria, vharathu vhawe a si Yakobo na Yosefa na Simoni na Yuda?+
56 Khaladzi dzawe a ri nadzo henefha vhukati hashu? O zwi wana ngafhi izwi zwithu zwoṱhe?”+
57 Vha thoma u khukhulisea nga nṱhani hawe.+ Yesu a amba navho a ri: “Muporofita a nga huliswa hoṱhe, fhedzi ha huliswi muḓini wa hawe na hayani hawe.”+
58 Ho ngo ita mishumo minzhi ya maanḓa henefho, ngauri vho vha vhe si na lutendo.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
