Genesi 7:1-24
7 Nga murahu Yehova a amba na Noaxe a ri: “Dzhena gungwani na muṱa wau woṱhe ngauri ndi iwe we nda wana u muvhuya phanḓa hanga kha uyu murafho.+
2 U dzhie zwipuka zwa sumbe* zwa mifuda yoṱhe zwi si na tshika,+ tsha tshiduna na tsha tshisadzi; kha zwipuka zwoṱhe zwi re na tshika u dzhie zwivhili fhedzi, tsha tshiduna na tsha tshisadzi;
3 u dovhe u dzhie na zwiṋoni zwa sumbe zwa zwiduna na zwa sumbe zwa zwisadzi, u itela uri zwi bvele phanḓa zwi tshi tshila ḽifhasini ḽoṱhe.+
4 Ngauri ho sala maḓuvha a sumbe uri ndi nise mvula+ kha ḽifhasi maḓuvha a 40 na vhusiku ha 40;+ ndi ḓo fhelisa zwoṱhe zwi tshilaho zwe nda zwi vhumba kha ḽifhasi.”+
5 Noaxe a ita zwoṱhe zwe Yehova a mu laedza.
6 Noaxe o vha e na miṅwaha ya 600 musi hu tshi vha na maḓi mahulu kha ḽifhasi.+
7 Noaxe na vharwa vhawe, mufumakadzi wawe na vhafumakadzi vha vharwa vhawe, vha dzhena gungwani musi maḓi mahulu a sa athu u swika.+
8 Ha ḓa zwipuka zwoṱhe zwi si na tshika na zwipuka zwoṱhe zwi re na tshika na zwiṋoni na zwoṱhe zwi kokovhaho kha ḽifhasi,+
9 zwa dzhena gungwani he ha vha hu na Noaxe nga zwivhili nga zwivhili, tshiduna na tshisadzi, u ya nga he Mudzimu a vha o laedza ngaho Noaxe.
10 Nga murahu ha maḓuvha a sumbe ha vha na maḓi mahulu kha ḽifhasi.
11 Musi Noaxe o no tshila miṅwaha ya 600, nga ṅwedzi wa vhuvhili, nga ḓuvha ḽa vhu 17 ḽa ṅwedzi, nga ḽeneḽo ḓuvha zwisima zwoṱhe zwa mativha mahulu zwa vulea na khoro dza ṱaḓulu dza vulea.+
12 Mvula ya na kha ḽifhasi maḓuvha a 40 na vhusiku ha 40.
13 Nga ḽeneḽo ḓuvha Noaxe a dzhena gungwani, khathihi na Semu, Hamu na Yafete+ vharwa vhawe na mufumakadzi wawe na vhafumakadzi vhararu vha vharwa vhawe.+
14 Vha dzhena gungwani na phukha dza mifuda yoṱhe: zwivhanda, zwifuwo, zwikokovhi na zwi fhufhaho.
15 Zwipuka zwi tshilaho zwa mifuda yoṱhe zwa dzhena gungwani nga zwivhili nga zwivhili, he ha vha hu na Noaxe.
16 Ha ḓa zwipuka zwa mifuda yoṱhe zwi tshilaho, tshiduna na tshisadzi, u ya nga he a laedzwa ngaho. Nga murahu ha zwenezwo, Yehova a vala muṋango.
17 Ha vha na maḓi mahulu lwa maḓuvha a 40 kha ḽifhasi, maḓi a bvela phanḓa a tshi engedzea a thoma u takula gungwa, ḽa papamala nṱha ha maḓi.
18 Maḓi a vha manzhi vhukuma kha ḽifhasi, fhedzi gungwa ḽa papamala nṱha hao.
19 Eneo maḓi a engedzea vhukuma lwe a tiba thavha dzoṱhe ndapfu dzi re kha ḽifhasi.+
20 A tibedza thavha nga khubithi* dza 15.
21 Zwivhumbiwa zwoṱhe* zwi tshilaho zwe zwa vha zwi tshi tshatshama kha ḽifhasi zwa fheliswa,+ ha fheliswa zwiṋoni, zwifuwo, dziphukha, zwivhumbiwa zwi tshatshamaho na vhathu vhoṱhe.+
22 Zwoṱhe zwi tshilaho shangoni zwi femaho zwa fa.+
23 A fhelisa zwoṱhe zwi tshilaho kha ḽifhasi, vhathu, zwipuka, zwikokovhi na zwiṋoni. Zwoṱhe zwi re kha ḽifhasi zwa fheliswa;+ ndi Noaxe fhedzi na vhe a vha e navho gungwani vhe vha ponyoka.+
24 Maḓi a ḓadza ḽifhasi maḓuvha a 150.+
Ṱhaluso dzi re magumoni a siaṱari
^ Kana khamusi, “U dzhie zwiduna zwa sumbe na zwisadzi zwa sumbe kha zwifuwo zwa mifuda yoṱhe ya zwi si na tshika.”
^ Khubithi nthihi i lingana na senthimithara dza 44,5. Sedzani Ṱhume. B14.
^ Thevhedz., “Ṋama yoṱhe.”
