Dziphisalema 68:1-35
Kha mulangi. Phisalema ya Davida. Luimbo.
68 Ngavhe Mudzimu a tshi ima a balanganya maswina awe,Ngavhe vhane vha mu vhenga vha tshi shavha phanḓa hawe.+
2 Ngavhe a tshi vha pandela u fana na muya u tshi pandela vhutsi;U fana na phula* i tshi ṋoka muliloni,Ngavhe na vhavhi vha tshi fa nga yeneyo nḓila phanḓa ha Mudzimu.+
3 Ngavhe vhavhuya vha tshi pembela;+Ngavhe vha tshi takala nga maanḓa phanḓa ha Mudzimu;Ngavhe vha tshi takala vha tshi khou pembela.
4 Imbelani Mudzimu; imbelani dzina ḽawe thendo.+
Imbelani Ane a khou fhira midavhini ya sogani.*
Dzina ḽawe ndi Yehova!+ Takalani phanḓa hawe!
5 Khotsi a vhana vha si na khotsi na mutsireledzi wa tshilikadzi+Ndi Mudzimu o dzulaho fhethu hawe hukhethwa.+
6 Mudzimu u ṋea vha si na vhudzulo mahaya;+U vhofholola vhafariwa a ita uri zwithu zwi vha tshimbilele zwavhuḓi.+
Fhedzi vha swili* vha ḓo dzula shangoni ḽo omaho.+
7 Iwe Mudzimu, musi u tshi ranga phanḓa vhathu vhau,+Musi u tshi tshimbila sogani, (Selah)
8 Ḽifhasi ḽo dzinginyea;+Ḽiṱaḓulu ḽo nisa mvula nga nṱhani ha Mudzimu;Thavha heyi ya Sinai yo dzinginyea nga nṱhani ha Mudzimu wa Isiraele.+
9 Iwe Mudzimu, wo nisa mvula nnzhi;Wa homolosa vhathu vhau vho netaho.
10 Vho dzula madenndeni au;+Iwe Mudzimu, nga vhuḓi hau wo ṋea vhashai zwiḽiwa.
11 Yehova u ṋea ndaela;Vhafumakadzi vha ḓivhadzaho mafhungo maḓifha ndi mmbi khulu.+
12 Mahosi na mmbi dzavho vha a shavha,+ vha a shavha!
Mufumakadzi ane a sala hayani u a kovhelwa zwo thubiwaho.+
13 Naho inwi vhanna no vha no eḓela tsini na mililo,Hu ḓo vha na phapha dza ḽiivha dzo ḓodziwa siḽiva,Na phapha dza musuku vhukuma.
14 Musi Ramaanḓaoṱhe a tshi balanganya mahosi aḽo,+Ho wa mahaḓa ngei Tsalimoni.*
15 Thavha ya Bashani+ ndi thavha ya Mudzimu;*Thavha ya Bashani ndi thavha i re na ṱhodzi.
16 Inwi thavha dzi re na ṱhodzi ndi ngani ni tshi lavhelesa nga vivho,Thavha ye Mudzimu a nanga* u dzula khayo?+
Vhukuma, Yehova u ḓo dzula henefho lini na lini.+
17 Gariki dza nndwa dza Mudzimu ndi zwigidi zwi sa vhalei.+
Yehova o ḓa a tshi bva Sinai a dzhena fhethu hukhethwa.+
18 Wo gonya nṱha;+Wa vhofholola vho fariwaho;Wa vha ita zwifhiwa zwine zwa vha vhanna,+Iwe Yehova Mudzimu, wo dzhia na vha re na swili+ uri u dzule vhukati havho.
19 Ngavhe Yehova a tshi rendwa, ene ane a hwala mihwalo yashu ḓuvha ḽiṅwe na ḽiṅwe,+Mudzimu wa ngoho ane a ri tshidza. (Selah)
20 Mudzimu wa ngoho, ndi Mudzimu washu ane a tshidza;+Yehova Murena Muvhusahoṱhe u a ponyokisa lufuni.+
21 Mudzimu u ḓo kwasha ṱhoho dza maswina awe,Ṱhoho ya ane a bvela phanḓa na mulandu.+
22 Yehova u ri: “Ndi ḓo vha vhuisa vha tshi bva ngei Bashani;+Ndi ḓo vha vhuisa vha tshi bva ngei vhudzivhani ha lwanzhe,
23 Uri milenzhe yaṋu i ṋukadzwe nga malofha+Mmbwa dzaṋu dzi ḓo ṋanzwa malofha a maswina.”
24 Vha vhona magogo au, Iwe Mudzimu,Magogo a Mudzimu wanga, Khosi yanga, a tshi dzhena fhethu hukhethwa.+
25 Vho rangwa phanḓa nga vhaimbi, nga murahu havho ha tevhela vhalidzi vha tshi khou lidza zwilidzo zwi re na ṱhale;+Vhukati hu na vhasidzana vha tshi khou lidza mirumba.+
26 Rendani Mudzimu ni vhukati ha magogo;Rendani Yehova, inwi vhane na bva kha Tshisima tsha Isiraele.+
27 Ngoyu Benyamini,+ ene muṱuku kha vhoṱhe, u khou vha vhusa,U katela na vharangaphanḓa vha Yuda na gogo ḽavho ḽo takalaho,Vharangaphanḓa vha Sebuloni na vharangaphanḓa vha Nafutali.
28 Mudzimu wau o laedza uri u vhe na maanḓa.
Sumbedza nungo dzau, Iwe Mudzimu, iwe we wa ri lwela.+
29 Nga nṱhani ha thembele yau i re ngei Yerusalema,+Mahosi a ḓo u ḓisela zwifhiwa.+
30 Kaidza zwivhanda zwa dziṱhangani,Sambi ḽa mboho+ na ṋamana dzadzo,U swika vhathu vha tshi gwadama vho ḓisa shekele* dza siḽiva.
Fhedzi u balanganya vhathu vhane vha takalela nndwa.
31 Hu ḓo ḓiswa madzanga a buronze a tshi bva Egipita;+Vhakushi vha ḓo ṱavhanya vha isa zwifhiwa ha Mudzimu.
32 Inwi mivhuso ya ḽifhasi, imbelani Mudzimu,+Imbelani Yehova thendo, (Selah)
33 Ene a tshimbilaho ngei ḽiṱaḓulu-ṱaḓulu ḽa kale-kale.+
U vhomba nga ipfi ḽawe, ipfi ḽawe ḽi re na maanḓa.
34 Ṱhogomelani nungo dza Mudzimu.+
Vhuhulu hawe vhu kha ḽa Isiraele,Nungo dzawe dzi lutomboni.*
35 Mudzimu u a ofhisa e nḓuni yawe* khethwa.+
Ndi Mudzimu wa Isiraele,Ane a ṋea vhathu nungo na maanḓa.+
Rendani Mudzimu.
Ṱhaluso dzi re magumoni a siaṱari
^ Zwi vhonala uri phula yo vha i tshi itwa nga mazhana a ṋotshi ngauri a a ṱavhanya u ṋoka.
^ Kana khamusi, “kha makole.”
^ Kana “mashandukwa.”
^ Kana “Zwo nga ho wa mahaḓa ngei Tsalimoni.”
^ Kana “thavha khulu.”
^ Kana “tama.”
^ Shekele nthihi i lemela gramu dza 11,4. Sedzani Ṱhume. B14.
^ Thevhedz., “makoleni.”
^ Thevhedz., “yau.”
