Муқаддас Китобга кўра, Аллоҳ одамлар ўзларини «зинодан тийишларини» хоҳлайди. (1 Салоникаликларга 4:3) Муқаддас Китобда қўлланилган «зино» сўзи бевафолик, гомосексуализм ва никоҳда бўлмаган кишилар орасидаги жинсий алоқани ўз ичига олади.

•  Нега ишқий муносабатларни ривожлантириб, бирга яшамоқчи бўлган эркак ва аёлнинг турмуш қуриши Худо учун муҳим?

•  Эркак ва аёл бир-бирига мос келиш-келмаслигини текшириш учун турмуш қурмай бирга яшаши оқилонами?

•  Никоҳи мустаҳкам бўлиши учун жуфтликлар нималар қилиши мумкин?

•   Никоҳнинг асосчиси — Худодир. Худо илк эркак ва аёлни никоҳ ришталари билан боғлаганида никоҳ тузумига асос солган. (Ибтидо 2:22–24) Эркак ва аёл турмуш қурмасдан бирга яшаши Унинг ниятига кирмаган.

•   Худо одамлар учун нима яхши эканини билади. У эркак ва аёл ўртасидаги никоҳ ришталари бир умрлик бўлишини ва бундан оиланинг барча аъзолари фойда олиб, ўзини хавфсиз ҳис қилишини истаган. Қуйидаги мисолга диққат қаратинг: мебелни тўғри йиғиш учун уни ишлаб чиқарган корхонанинг йўл-йўриқлари зарур бўлганидек, бахтли никоҳ қуриш учун ҳам Худонинг йўл-йўриқлари керак. Худонинг меъёрлари уларга амал қилганларга доим фойда келтиради. (Ишаё 48:17, 18)

•   Турмуш қурмасдан жинсий алоқада бўлиш аянчли оқибатларга олиб келиши ҳеч гап эмас. Масалан, бундай оқибатларга исталмаган ҳомиладорлик, жинсий алоқа орқали юқадиган касалликлар ва ҳиссий жароҳат кириши мумкин.

•   Худо эркак ва аёлга жинсий алоқа йўли билан фарзанд кўриш қобилиятини берган. Худонинг назарида ҳаёт муқаддас ва фарзанд кўриш қобилияти Унинг қимматбаҳо ҳадясидир. У биздан бу ҳадяни қадрлашимизни ва никоҳ тузумига ҳурмат кўрсатишимизни кутади. (Ибронийларга 13:4)

 Бахтли никоҳнинг калити эркак ва аёл масъулиятни ҳис этмай, муайян вақт давомида бирга яшашида эмас, аксинча, бир-бирининг олдидаги бурчни ҳис этиб, муаммоларни бир жамоа бўлиб ҳал қилишидадир a. Расмий никоҳ турмуш ўртоқлар бир-бирининг олдидаги бурчни ҳис қилишига ёрдам беради. (Матто 19:6)

 Мукаммал никоҳнинг ўзи йўқ. Лекин шунга қарамай, жуфтликлар Муқаддас Китобдаги принципларни қўллаб, никоҳларини мустаҳкамлай олишади. Мана маслаҳатлардан баъзилари:

•   Турмуш ўртоғингизнинг манфаатларини ўзингизникидан устун қўйинг. (1 Коринфликларга 7:3–5; Филиппиликларга 2:3, 4)

•   Бир-бирингизга нисбатан севгини ривожлантиринг. Ҳурмат кўрсатишда давом этинг. (Эфесликларга 5:25, 33)

•   Тилингизни назорат қилишни ўрганинг. (Ҳикматлар 12:18)

•   Сабрли бўлинг ва кечиришга тайёр туринг. (Колосаликларга 3:13, 14)