Украинадаги уруш ва об-ҳаво ўзгаргани дастидан бутун дунё бўйлаб озиқ-овқат маҳсулотларини етказиб бериш масаласи мураккаблашиб боряпти. Айниқса, ривожланиб бораётган мамлакатларда кўпчилик бу борада азият чекяпти.

•   «Можаролар бўлаётгани ҳамда об-ҳаво ўзгараётгани, электр қуввати ва бошқа кўп нарсаларнинг қимматлашиб кетаётгани дастидан озиқ-овқат маҳсулотларини ишлаб чиқариш ва уларга эга бўлиш кундан-кунга қийин бўлиб кетяпти». (БМТ Бош котиби Антониу Гутерриш, 2023 йил 17 июль)

•   «Мутахассисларнинг айтишича, Россиянинг дон экспорти битимидан чиқиб кетгани дунё бўйлаб камбағал мамлакатларда, айниқса, Шимолий Африкада ва Яқин Шарқда озиқ-овқат танқислиги авжига чиқишига ҳамда озиқ-овқат маҳсулотлари янада қимматлашиб кетишига сабаб бўляпти». («Atalayar.com», 2023 йил 23 июль)

 Бу борада ҳамда келажагимиз тўғрисида Муқаддас Китобда нима дейилганига диққат қаратайлик.

•   Исо Масиҳ шундай башорат қилган: «Халқ халққа қарши, подшоҳлик подшоҳликка қарши кўтарилади... Озиқ-овқат етишмовчилиги... бўлади». (Матто 24:7)

•   Каломда Ваҳий китобида тўртта мажозий чавандоз тилга олинган. Уларнинг бири урушни билдиради. Унинг ортидан чопиб келаётган чавандоз эса очарчиликни, яъни озиқ-овқат етишмовчилиги ва нарх-наво авжига чиқишини англатади. У ерда шундай ёзилган: «Қора отни кўрдим. Чавандозининг қўлида тарози бор эди. Шунда... бир овоз шундай деяётганини эшитдим: “Бир кило буғдой бир динорга a, уч кило арпа бир динорга”». (Ваҳий 6:5, 6)

 Озиқ-овқат етишмовчилиги ҳақида қилинган бу башорат Каломда «охирзамон» деб аталган ҳозирги пайтда амалга ошяпти. (2 Тимўтийга 3:1) «Охирзамон» ҳамда Ваҳий китобидаги тўртта чавандоз борасида кўпроқ билиш учун «Дунё 1914 йилдан бери ўзгаряпти» номли видеони томоша қилинг ва «Тўрт чавандоз. Улар ким?» номли мақолани ўқинг.

•   Муқаддас Китобдаги амалий маслаҳатлар ўзгариб бораётган вазиятларни, жумладан, озиқ-овқат маҳсулотларининг қимматлашаётгани ёки ҳатто егуликнинг етишмовчилигини енгишга ёрдам бериши мумкин. Баъзи маслаҳатлар «Камроқ пул билан қай йўсин яшаш мумкин?» номли мақолада ёзилган.

•   Каломдан ҳамма нарса яхши томонга ўзгаришига умид қилишимиз мумкинлиги ҳақида билиб оляпмиз. У ерда «ер юзида ғалла мўл» бўладиган пайт ваъда қилинган. Ўшанда ҳар бир инсонда ейиш учун мўл-кўл озуқа бўлади. (Забур 72:16) Бундай келажак ва нега бунга ишонишимиз мумкинлиги ҳақида кўпроқ билиб олиш учун «Эртага яхши кун келишига ишониш учун ҳақиқий умид» номли мақолани ўқинг.