کیا آپ کے ذہن میں کبھی ایسے سوال پیدا ہوئے ہیں؟‏ پوری دُنیا میں بہت سے لوگ ایسے اہم سوالوں کے بارے میں سوچتے ہیں۔‏ لیکن کیا ہمیں اِن سوالوں کے جواب مل سکتے ہیں؟‏

لاکھوں لوگ کہتے ہیں کہ ایسا ممکن ہے کیونکہ اُنہوں نے بائبل سے اپنے سوالوں کے تسلی‌بخش جواب حاصل کر لیے ہیں۔‏ کیا آپ جاننا چاہتے ہیں کہ بائبل میں زندگی کے اہم سوالوں کے کیا جواب دیے گئے ہیں؟‏ یہوواہ کے گواہ اِس سلسلے میں آپ کی مدد کر سکتے ہیں کیونکہ وہ پوری دُنیا میں لوگوں کو پاک کلام کا مُفت کورس کراتے ہیں۔‏ *

کچھ لوگ پاک کلام کا کورس کرنے کے سلسلے میں شاید یہ کہیں کہ ”‏مَیں بہت مصروف ہوں،‏“‏ ”‏یہ بہت مشکل ہے“‏ یا پھر ”‏مَیں کوئی ایسا کورس کرنے کا وعدہ نہیں کرنا چاہتا جسے مَیں مکمل نہ کر پاؤں۔‏“‏ لیکن بہت سے لوگ پاک کلام کی تعلیمات کو جاننے کا موقع ہاتھ سے نہیں جانے دیتے۔‏ آئیں،‏ چند ایسے لوگوں کے تبصروں پر غور کریں۔‏

• ‏”‏مَیں کیتھولک اور پروٹسٹنٹ گِرجوں میں گئی۔‏ مَیں سکھوں کے گردوراے اور بدھ مت کی عبادت‌گاہ میں بھی گئی۔‏ اِس کے علاوہ مَیں نے یونیورسٹی میں مختلف مذاہب کا مطالعہ بھی کِیا۔‏ لیکن مجھے اپنے سوالوں کے جواب نہیں ملے۔‏ پھر ایک دن یہوواہ کی ایک گواہ میرے گھر آئی۔‏ مَیں اِس بات سے بہت متاثر ہوئی کہ اُس نے بائبل سے میرے کچھ سوالوں کے جواب دیے۔‏ اِس لیے جب اُس نے مجھے پاک کلام کا کورس کرنے کی پیشکش کی تو مَیں راضی ہو گئی۔‏“‏—‏اِنگلینڈ میں رہنے والی گیل۔‏

• ‏”‏زندگی کے بارے میں میرے بہت سے سوال تھے۔‏ لیکن میرے گِرجے کے پادری نے مجھے تسلی‌بخش جواب نہیں دیے۔‏ آخر یہوواہ کے ایک گواہ نے میرے سوالوں کے جواب بائبل کے ذریعے دیے۔‏ جب اُس گواہ نے مجھ سے پوچھا کہ آیا مَیں پاک کلام کی مزید تعلیم حاصل کرنا چاہتا ہوں تو مَیں نے خوشی خوشی اِس پیشکش کو قبول کر لیا۔‏“‏—‏بینن میں رہنے والے کوفی۔‏

• ‏”‏مجھے مُردوں کی حالت کے بارے میں جاننے کا بڑا تجسّس تھا۔‏ میرا ماننا تھا کہ مُردے زندہ لوگوں کو نقصان پہنچا سکتے ہیں۔‏ لیکن مَیں یہ جاننا چاہتا تھا کہ اِس سلسلے میں بائبل کی تعلیم کیا ہے۔‏ اِس لیے مَیں اپنے ایک دوست سے بائبل کی تعلیم حاصل کرنے لگا جو یہوواہ کا گواہ تھا۔‏“‏—‏برازیل میں رہنے والے خوزے۔‏

• ‏”‏مَیں پاک کلام کو پڑھنے کی کوشش کرتی تھی لیکن اِسے سمجھ نہیں پاتی تھی۔‏ پھر یہوواہ کے گواہ میرے گھر آئے اور اُنہوں نے اِس میں درج کچھ پیش‌گوئیوں کی وضاحت کی۔‏ مَیں جاننا چاہتی تھی کہ پاک کلام میں اَور کیا کچھ بتایا گیا ہے۔‏“‏—‏میکسیکو کی رہنے والی ڈنیز۔‏

• ‏”‏میں سوچتی تھی کہ کیا خدا کو میری فکر ہے۔‏ اِس لیے مَیں نے اُس خدا سے دُعا کرنے کا فیصلہ کِیا جس کے بارے میں بائبل میں بتایا گیا ہے۔‏ اگلے ہی دن یہوواہ کے گواہوں نے میرا دروازہ کھٹکھٹایا۔‏ اُنہوں نے مجھے بائبل کورس کی پیشکش کی جسے مَیں نے قبول کر لیا۔‏“‏—‏نیپال کی رہنے والی انجو۔‏

اِن تبصروں سے شاید آپ کو یسوع مسیح کی یہ بات یاد آئے:‏ ”‏وہ لوگ خوش رہتے ہیں جن کو احساس ہے کہ اُنہیں خدا کی رہنمائی کی ضرورت ہے۔‏“‏ (‏متی 5:‏3‏،‏ نیو ورلڈ ٹرانسلیشن‏)‏ بِلاشُبہ ہر اِنسان کو خدا کی رہنمائی کی ضرورت ہے اور خدا اپنے کلام کے ذریعے اِس ضرورت کو پورا کرتا ہے۔‏

یہوواہ کے گواہ پاک کلام کا کورس کیسے کراتے ہیں؟‏ اِس کورس سے آپ کو کون سے فائدے ہو سکتے ہیں؟‏ اگلے مضمون میں ہم اِن سوالوں پر بات کریں گے۔‏