اپنے بچوں کے ساتھ مل کر پڑھیں

یسوع مسیح نے فرمانبرداری سیکھی

کیاآپ کو فرمانبرداری کرنا یعنی بڑوں کا حکم ماننا مشکل لگتا ہے؟‏—‏ * اگر ایسا ہے تو اِس میں حیرانی کی کوئی بات نہیں کیونکہ کبھی‌کبھی ہم سب کے لئے فرمانبردار رہنا آسان نہیں ہوتا۔‏ کیا آپ کو معلوم ہے کہ یسوع مسیح کو بھی فرمانبرداری سیکھنی پڑی تھی؟‏—‏

آپ کے خیال میں بچوں کو کس کی فرمانبرداری کرنی چاہئے؟‏—‏بچوں کو اپنے ماں اور باپ کی فرمانبرداری کرنی چاہئے۔‏ بائبل کہتی ہے:‏ ”‏خداوند میں اپنے ماں باپ کے فرمانبردار رہو۔‏“‏ (‏افسیوں ۶:‏۱‏)‏ کیا آپ جانتے ہیں کہ یسوع مسیح کا باپ کون ہے؟‏—‏یسوع کا باپ یہوواہ خدا ہے جو ہم سب کا بھی باپ ہے۔‏ (‏متی ۶:‏۹،‏ ۱۰‏)‏ لیکن اگر آپ یوسف اور مریم کو یسوع مسیح کا باپ اور ماں کہتے ہیں تو یہ بھی غلط نہیں ہے۔‏ کیا آپ کو پتہ ہے کہ وہ کیسے یسوع مسیح کے ماں‌باپ بنے؟‏—‏

یہوواہ خدا کے ایک فرشتے جبرائیل نے مریم کو بتایا کہ اُس سے ایک بیٹا پیدا ہوگا۔‏ مگر یہ کیسے ہو سکتا تھا کیونکہ ابھی تو مریم کی شادی بھی نہیں ہوئی تھی۔‏ دراصل یہ سب کچھ یہوواہ کی طاقت سے ہونا تھا۔‏ جبرائیل فرشتے نے مریم کو بتایا کہ ”‏خداتعالےٰ کی قدرت تجھ پر سایہ ڈالے گی اور اِس سبب سے وہ مولودِمُقدس خدا کا بیٹا کہلائے گا۔‏“‏—‏لوقا ۱:‏۳۰-‏۳۵‏۔‏

یہوواہ خدا نے اپنے بیٹے کی زندگی مریم کے پیٹ میں ڈال دی۔‏ مریم کے پیٹ میں نو مہینے پلنے کے بعد یسوع مسیح پیدا ہوا۔‏ اِس عرصے میں یوسف نے مریم سے شادی کر لی۔‏ اِسی لئے لوگ یوسف کو یسوع مسیح کا باپ سمجھتے تھے۔‏ لیکن یوسف نے یسوع کو صرف پالا تھا۔‏ اِس سے ہم سمجھ جاتے ہیں کہ یہوواہ خدا یسوع کا آسمانی باپ ہے اور یوسف اُس کا زمینی باپ تھا۔‏

یسوع مسیح نے چھوٹی عمر میں ہی ظاہر کر دیا کہ وہ اپنے آسمانی باپ یہوواہ سے کتنا پیار کرتا تھا۔‏ یسوع مسیح ۱۲ سال کا تھا جب اُس کا خاندان ہر سال کی طرح فسح کی عید منانے کے لئے یروشلیم گیا۔‏ لیکن ناصرۃ میں اپنے گھر لوٹتے وقت یوسف اور مریم کو پتہ ہی نہ چلا کہ یسوع اُن کے ساتھ نہیں آیا۔‏ آپ شاید سوچ رہے ہوں کہ اُنہیں اِس بات کی خبر کیوں نہیں ہوئی؟‏—‏

دراصل اب یوسف اور مریم کے اَور بچے بھی تھے۔‏ (‏متی ۱۳:‏۵۵،‏ ۵۶‏)‏ اِس کے علاوہ،‏ کچھ رشتےدار بھی اُن کے ساتھ سفر کر رہے تھے جن میں سلومی (‏جو شاید مریم کی بہن تھی)‏،‏ اُس کا شوہر زبدی اور اُن کے بچے یعقوب اور یوحنا شامل تھے۔‏ اِس لئے مریم نے سوچا ہوگا کہ یسوع شاید دوسرے رشتہ‌داروں کے ساتھ ہے۔‏—‏متی ۲۷:‏۵۶؛‏ مرقس ۱۵:‏۴۰؛‏ یوحنا ۱۹:‏۲۵‏۔‏

جب یوسف اور مریم کو پتہ چلا کہ یسوع رشتےداروں کے ساتھ نہیں ہے تو وہ فوراً یروشلیم واپس گئے۔‏ بہت ڈھونڈنے کے بعد جب تیسرے دن وہ اُنہیں ہیکل میں مل گیا تو مریم نے اُس سے کہا:‏ ”‏بیٹا!‏ تُو نے کیوں ہم سے ایسا کِیا؟‏ دیکھ تیرا باپ اور مَیں کڑھتے ہوئے تجھے ڈھونڈتے تھے۔‏“‏ لیکن یسوع نے کہا:‏ ”‏تُم مجھے کیوں ڈھونڈتے تھے؟‏ کیا تُم کو معلوم نہ تھا کہ مجھے اپنے باپ کے ہاں ہونا ضرور ہے؟‏“‏—‏لوقا ۲:‏۴۵-‏۵۰‏۔‏

آپ کے خیال میں کیا یسوع کا اپنی ماں کو اِس طرح جواب دینا ٹھیک تھا؟‏—‏اُس کے ماں باپ یہ اچھی طرح جانتے تھے کہ یسوع کو  خدا کے گھر میں عبادت کرنا بہت پسند ہے۔‏ (‏زبور ۱۲۲:‏۱‏)‏ توپھر کیا یسوع کا یہ سوچنا ٹھیک نہیں تھا کہ اُنہیں سب سے پہلے اُسے خدا کی ہیکل میں ہی تلاش کرنا چاہئے تھا؟‏—‏مریم یسوع کی اِن باتوں پر غور کرتی رہی۔‏

کیا یسوع اپنے ماں باپ کی فرمانبرداری کرتا تھا؟‏—‏بائبل بتاتی ہے کہ یسوع ”‏اُن کے ساتھ روانہ ہو کر ناؔصرۃ میں آیا اور اُن کے تابع رہا۔‏“‏ (‏لوقا ۲:‏۵۱،‏ ۵۲‏)‏ ہم یسوع کی مثال سے کیا سیکھ سکتے ہیں؟‏—‏ہم یہ سیکھتے ہیں کہ ہمیں بھی اپنے ماں باپ کا کہنا ماننا چاہئے۔‏

لیکن یسوع مسیح کے لئے اپنے آسمانی باپ کی فرمانبرداری کرنا ہمیشہ آسان نہیں تھا۔‏

یسوع کو اِس بات کی فکر تھی کہ سولی پر مرنے سے اُس کے آسمانی باپ کی بدنامی ہوگی۔‏ اِس لئے موت سے پہلے کی رات یسوع نے یہوواہ سے درخواست کی کہ وہ اُسے مرنے نہ دے۔‏ (‏لوقا ۲۲:‏۴۲‏)‏ اگرچہ یسوع کے لئے خدا کا حکم ماننا مشکل تھا توبھی اُس نے اپنے باپ کی مرضی پوری کی۔‏ بائبل بتاتی ہے کہ ”‏اُس نے دُکھ اُٹھااُٹھا کر فرمانبرداری سیکھی۔‏“‏ (‏عبرانیوں ۵:‏۸‏)‏ کیا ہم بھی فرمانبرداری کرنا سیکھ سکتے ہیں؟‏—‏

‏[‏فٹ‌نوٹ]‏

سوالات:‏

▪ مریم یسوع کی ماں کیسے بنی؟‏ یسوع مسیح کا آسمانی باپ تو یہوواہ ہے لیکن یوسف کس لحاظ سے اُس کا باپ تھا؟‏

▪ یسوع کے ماں باپ کو کیوں پتہ نہ چلا کہ وہ اُن کے ساتھ نہیں ہے؟‏

▪ یسوع مسیح کے ماں باپ کو اُسے کہاں ڈھونڈنا چاہئے تھا؟‏

▪ آپ یسوع مسیح کی مثال سے کیا سیکھ سکتے ہیں؟‏

‏[‏صفحہ ۳۱ کی تصویر]‏

آپ کے خیال میں یسوع کے ماں باپ کو اُسے پہلے ہیکل میں کیوں ڈھونڈنا چاہئے تھا؟‏