بس ایک پیگ اَور

ایلن نے گیارہ سال کی عمر میں ہی شراب پینی شروع کر دی تھی۔‏ * وہ اپنے دوستوں کے ساتھ گھر سے تھوڑی دُور کھیتوں میں کھیلنے کے لئے جایا کرتا تھا۔‏ وہاں وہ شراب پیتے اور فلمی کرداروں کی نقل کِیا کرتے تھے۔‏ ایلن اور اُس کے دوست جن کرداروں کی نقل کرتے تھے وہ تو اصلی نہیں ہوتے تھے مگر شراب اصلی ہوتی تھی۔‏

پہلے تو ٹونی ہر شام ایک یا دو پیگ پیا کرتا تھا لیکن ۴۰ سال کی عمر میں اُس نے پانچ سے چھ پیگ پینا شروع کر دئے۔‏ ایک وقت آیا کہ اُسے اِس بات کا اندازہ ہی نہ رہا کہ وہ ہر روز کتنے پیگ پیتا ہے۔‏

ایلن نے شراب پینے کی عادت پر قابو پانے کے لئے مدد حاصل کرنے کی کوشش کی جبکہ ٹونی نے اپنے خاندان اور دوستوں کی مدد کو رد کر دیا۔‏ اِسی لئے ایلن آج بھی زندہ ہے مگر ٹونی کچھ سال پہلے شراب پینے کی وجہ سے کار کے حادثے میں اپنی زندگی گنوا بیٹھا۔‏

اگرچہ شراب تو ایک شخص پیتا ہے لیکن اِس کے افسوس‌ناک نتائج دوسرے لوگوں کو بھی بھگتنے پڑتے ہیں۔‏ * حد سے زیادہ شراب پینا مختلف مسائل کا باعث بنتا ہے۔‏ اِن میں لڑائی جھگڑے،‏ قتل‌وغارت،‏ ٹریفک حادثات،‏ ملازمت کی جگہ پر حادثات اور بہت سی بیماریاں شامل ہیں۔‏ شراب پینے والے لوگوں کی وجہ سے نہ صرف اُن کے خاندانوں کو ذاتی اور جذباتی نقصان پہنچتا ہے بلکہ معاشرے کو بھی اِس کی بھاری قیمت چکانی پڑتی ہے۔‏

امریکہ کا نیشنل انسٹیٹیوٹس آف ہیلتھ بیان کرتا ہے،‏ ”‏بعض لوگ ہر روز شراب تو پیتے ہیں مگر اِس کے عادی نہیں ہوتے جبکہ بعض ہر روز نہ پینے کے باوجود اِس کے عادی ہو جاتے ہیں۔‏“‏ اِس کا مطلب ہے کہ بہتیرے لوگ شراب پینے کی عادت میں مبتلا نہیں ہوتے مگر وہ آہستہ‌آہستہ باقاعدگی سے پینا شروع کر دیتے ہیں۔‏ کچھ ایسے بھی ہیں جو کبھی‌کبھار پیتے ہیں مگر جب بھی پیتے ہیں پانچ چھ پیگ سے زیادہ پی جاتے ہیں۔‏

اگر آپ شراب پینے کا فیصلہ کرتے ہیں تو کتنی مقدار مناسب ہوگی؟‏ آپ کیسے جان سکتے ہیں کہ حد سے زیادہ پینا یعنی ”‏بس ایک پیگ اَور“‏ لگانا کب غلط ہوگا؟‏ اگلے مضامین میں ہم اِس موضوع پر نہایت مفید معلومات حاصل کریں گے۔‏

‏[‏فٹ‌نوٹ]‏