ایک جھوٹ دوسرے جھوٹ کو جنم دیتا ہے

پولس رسول نے پہلی صدی کے مسیحیوں سے کہا:‏ ”‏خبردار“‏!‏ وہ اُنہیں کس بات سے خبردار کر رہا تھا؟‏ اِس سوال کا جواب ہمیں پولس رسول کے اِن الفاظ میں ملتا ہے:‏ ”‏کوئی شخص تمہیں اُن فلسفیانہ اور پُرفریب خیالات کا شکار نہ بنانے پائے جن کی بنیاد .‏ .‏ .‏ انسانی روایتوں اور دُنیوی ابتدائی باتوں پر ہے۔‏“‏—‏کلسیوں ۲:‏۸‏،‏ نیو اُردو بائبل ورشن۔‏

پولس رسول کی یہ آگاہی کتنی واضح تھی۔‏ لیکن دوسری صدی کے بعض مسیحی اپنے مذہب کو زیادہ مقبول بنانا چاہتے تھے۔‏ اِس لئے اُنہوں نے پُرانے فلاسفروں کے نظریات کو اپنی تعلیمات میں شامل کر لیا۔‏ اُن کا خیال تھا کہ اِس طرح روم کے پڑھےلکھے لوگ اُنہیں پسند کریں گے اور مسیحی بن جائیں گے۔‏

اِس وجہ سے بہت سارے لوگ مسیحی مذہب کی طرف آنے لگے۔‏ اِن لوگوں میں سے ایک جسٹن مارٹائر تھا جس نے یونانی فلسفے کی تعلیم حاصل کی تھی مگر وہ مسیحی بن گیا۔‏ وہ یہ مانتا تھا کہ یسوع کے آنے سے بہت عرصہ پہلے خدا کا فرشتہ یونانی فلاسفروں سے ہم‌کلام ہوا تھا۔‏ جسٹن اور اُس جیسے دیگر عالموں نے یہ سوچا کہ اگر یونانی فلسفے اور کچھ روایتوں کو مسیحیت میں شامل کر لیا جائے تو اِسے سب لوگ پسند کریں گے۔‏

جسٹن مارٹائر کا خیال صحیح ثابت ہوا۔‏ مسیحیت میں فلسفے اور روایت کو شامل کرنے سے بہت سے لوگ مسیحی بن گئے۔‏ لیکن یونانی جھوٹی روایات کو اپنانے کا نتیجہ کیا نکلا؟‏ ایک جھوٹ نے دوسرے جھوٹ کو جنم دیا اور یوں جھوٹی روایات نے بالآخر مسیحی عقائد کی شکل اختیار کر لی۔‏ اِن جھوٹے عقائد کا پردہ فاش کرنے کے لئے آئیں اِن میں سے چند ایک کو بائبل کی روشنی میں پرکھیں۔‏

‏[‏صفحہ ۳ پر تصویروں کے حوالہ‌جات]‏

Devil: Barrators—Giampolo/The Doré Illustrations For Dante‎’s

‏;Divine Comedy/Dover Publications Inc.; angels: Art Resource, NY

trinity relief: Museo Bardini, Florence