یسوع مسیح کے بارے میں لوگوں کی رائے

‏”‏یسوع ناصری .‏ .‏ .‏ بِلاشُبہ تاریخ کی سب سے نمایاں شخصیت ہے۔‏“‏—‏ایچ.‏جی.‏ ویلز،‏ انگریز تاریخ‌دان۔‏

‏”‏مسیح .‏ .‏ .‏ تاریخ کے تمام مشہور لوگوں میں ایک منفرد مقام رکھتا ہے۔‏“‏—‏فلپ شیف،‏ مذہبی عالم اور تاریخ‌دان جو سوئٹیزرلینڈ میں پیدا ہوا۔‏

عظیم‌ترین انسان جو کبھی ہو گزرا کون ہے؟‏ آپ کے خیال میں کسی شخص کی عظمت کا اندازہ کیسے لگایا جا سکتا ہے؟‏ اُس کی غیرمعمولی عسکری ذہانت سے؟‏ اُس کی جسمانی قوت سے؟‏ اُس کی ذہنی صلاحیتوں سے؟‏ یاپھر اِس سے کہ اُس کی باتیں اور کام لوگوں پر کس حد تک اثرانداز ہوتے ہیں اور وہ لوگوں کے لئے کیسا نمونہ قائم کرتا ہے؟‏

غور کریں کہ ماضی اور حال کے تاریخ‌دان،‏ سائنس‌دان،‏ مصنّفین،‏ سیاسی لیڈر اور دیگر لوگ یسوع ناصری کے بارے میں کیا کہتے ہیں:‏

‏”‏یسوع ناصری نہ صرف اِن دو ہزار سالوں میں بلکہ انسانی تاریخ کی سب سے ذی‌اثر شخصیت ہے۔‏ اِس حقیقت کی تردید کرنے کے لئے شاید ہی آپ کوئی ثبوت فراہم کر سکیں۔‏“‏‏—‏رینولڈز پرائس،‏ امریکی مصنف اور بائبل عالم۔‏

‏”‏ایک بےگُناہ شخص نے دوسروں یہاں تک کہ اپنے دشمنوں کو فائدہ پہنچانے کے لئے اپنی جان قربان کر دی۔‏ یوں اُس نے ساری دُنیا کے لئے فدیہ مہیا کر کے ایک ایسا کام کِیا جس کی کوئی مثال نہیں ملتی۔‏“‏‏—‏موہن داس کے.‏ گاندھی،‏ انڈیا کا سیاسی اور روحانی پیشوا۔‏

‏”‏بچپن ہی سے مَیں نے بائبل اور یہودی ربیوں کی کتابوں سے تعلیم پائی ہے۔‏ اگرچہ مَیں ایک یہودی ہوں توبھی مَیں یسوع ناصری کی ممتاز شخصیت سے بہت متاثر ہوں۔‏“‏‏—‏البرٹ آئن سٹائن،‏ سائنس‌دان جو جرمنی میں پیدا ہوا۔‏

‏”‏خدا کے بیٹے اور انسان کے بیٹے کے طور پر یسوع مسیح میرے لئے تاریخ کی سب سے اہم شخصیت ہے۔‏ اُس نے جوکچھ بھی کہا اور کِیا وہ آج ہمارے لئے بہت اہمیت کا حامل ہے۔‏ یہ بات آپ ماضی یا حال کے کسی دوسرے شخص کے بارے میں نہیں کہہ سکتے۔‏“‏‏—‏شولیم ایش،‏ مضمون‌نگار جو پولینڈ میں پیدا ہوا؛‏ اُس کا یہ بیان کرسچین ہیرلڈ نامی رسالے میں شائع ہوا۔‏

‏”‏پینتیس سال تک مَیں ایک ایسا شخص تھا جو ہر قسم کے مذہبی یا اخلاقی اصولوں سے انکار کرتا تھا۔‏ پانچ سال پہلے ہی مَیں نے یسوع مسیح کو ایک حقیقی ہستی تسلیم کِیا ہے۔‏ یسوع کی تعلیمات پر ایمان لانے کے بعد میری زندگی بالکل بدل گئی ہے‏۔‏‏“‏‏—‏کاؤنٹ لیو ٹال‌سٹوے،‏ روسی ناول‌نگار اور فلاسفر۔‏

‏”‏اِس زمین پر جتنے بھی انسان گزرے ہیں اُن میں سے یسوع مسیح کی شخصیت سب سے زیادہ مسحورکُن ہے اور یہ آج بھی لوگوں کو متاثر کرتی ہے۔‏“‏‏—‏کینتھ سکاٹ لاٹوریٹ،‏ امریکی تاریخ‌دان اور مصنف۔‏

‏”‏کیا ہمیں یسوع کی زندگی اور کردار کی تاریخ کو محض ایک من‌گھڑت کہانی سمجھنا چاہئے؟‏ درحقیقت ایسا نہیں ہے۔‏ اگر سقراط کی تاریخ کو دیکھا جائے جس پر کوئی اعتراض نہیں اُٹھاتا تو وہ بھی اتنی مستند نہیں جتنی کہ یسوع مسیح کی تاریخ۔‏“‏‏—‏ژاں-‏ژاک رُوسو،‏ فرانسیسی فلاسفر۔‏

اِن تمام بیانات سے یہ بات بالکل واضح ہے کہ صرف یسوع مسیح ہی ایک ایسی ہستی ہے جس کے نمونے کی ہم نقل کر سکتے ہیں۔‏ پولس رسول جسے یسوع مسیح نے اپنا پیروکار ہونے اور قوموں کو گواہی دینے کے لئے چُنا پہلی صدی کا اعلیٰ تعلیم‌یافتہ شخص تھا۔‏ وہ بھی ہمیں یسوع کو ’‏تکتے رہنے‘‏ کی تاکید کرتا ہے۔‏ (‏عبرانیوں ۱۲:‏۲؛‏ اعمال ۹:‏۳‏)‏ یسوع مسیح کے نمونے سے ہم زندگی گزارنے کے بارے میں کیا سیکھ سکتے ہیں؟‏ اُس کی زندگی سے آپ کیسے فائدہ حاصل کر سکتے ہیں؟‏