Etu Tulombangi Via Yehova, tu likolisilako oco apata a likuate omunga ci kaile etu ale apata akuavo. Tua sumbila Suku Usovoli wapata. (Efetikilo 2:21-24; Va Efeso 3:14, 15) Vembimbiliya, eye waca olonumbi via kuatisa ale omanu voluali luosi, oco va kuate esanju volohuela loku kuata onima yiwa.

 Tu likolisilako oku kuama alungulo Embimbiliya, momo a tu kuatisa oku kala alume, akãi kuenda olonjali viwa. (Olosapo 31:10-31; Va Efeso 5:22–6:4; 1 Timoteo 5:8) Olondunge vi sangiwa Vembimbiliya, vi pondola oku kuatisa apata ana okuti, ka va kasi vetavo limuamue. (1 Petulu 3:1, 2) Tala eci omanu vamue va popia eci olohueli viavo via linga Olombangi Via Yehova:

•   “Toke anyamo epandu violohuela vietu, tua enda lika oku lihoya loku kuata esumuo. Ivete noke yoku kala Ombangi ya Yehova, epandi liaye lesumbilo, via ndi vetiya. Apongoloko eye a linga, via popela olohuela vietu.”—Clauir, wo ko Brazil.

•   “Ame sia yonguile okuti ulume wange Chansa o lilongisa Embimbiliya Lolombangi Via Yehova, momo nda simĩle okuti, ovio vi tepa apata. Pole, cilo nda limbuka okuti, Embimbiliya lia kuatisa olohuela vietu.”—Agness, wo ko Zambia.

 Kupange wetu woku kunda, tu lekisa ku vosi okuti, oku kapako eci Embimbiliya li popia, ci pondola oku tu kuatisa oku

•   Nõla omunu wa sunguluka oku likuela laye

•   Pandikisa kunyamo watete violohuela

•   Li tata ciwa lolondatembo

•   Talavaya ciwa lolombongo

•   Liwekapo oku lihoyisa

•   Lilongisa oku ecela

•   Pindisa omãla

 Ocili okuti, olonjanja vimue ci koka. Ndeci, kunyamo 1998, ocisoko cimue cakonomuiso ci tukuiwa okuti Sofres, ca konomuisa olohueli vina okuti, umosi lika eye wa kala Ombangi ya Yehova. Ekonomuiso lia lekisa okuti, ci soka akũi avali kolohueli, umue wa kuata ovitangi vialua.

 Yesu wa popele okuti vana va laikele oku kuama alongiso aye, olonjanja vimue va ponduile oku liyaka lovitangi vepata. (Mateo 10:32-36) Ukuovolandu Will Durant wa popia okuti, vokuenda kuviali wo Roma, “etavo Liakristão lia kala oku nyõla olohuela,” a kuenje koloneke vilo, Olombangi vimue Via Yehova via siata oku lundiliwavo. Pole, anga hẽ ohueli yi linga Ombangi ya Yehova oyo muẽle ya siata oku koka ovitangi?

 Poku liyaka locitangi celundi liokuti Olombangi Via Yehova vi tepa apata, Ombonge yo Europa yi Teyuila Ekalo Liomanu ya popia okuti, vana va tiamẽla vepata limuamue okuti Halombangiko Via Yehova, olonjanja vialua vi koka ema poku likala oku “tava loku sumbila elianjo ngandiavo a kuete lioku tiamẽla ketavo likuavo.” Ombonge yamisako ndoco: “Ocitangi eci ca siata calua volohuela viosi vina okuti, olohueli viavo via tiamẽla ketavo likuavo kuenda haicovo ca siata oku li pita Lolombangi Via Yehova.” b Ndaño via siata oku liyaka locitangi caco, Olombangi Via Yehova vi kakatela kelungulo liokuti: “Ko ka fetuluinyi umue cĩvi leci cĩvi. . . . Nda citava, ndeci ca tamba kokuene, kali vakuambembua lomanu vosi.”—Va Roma 12:17, 18.

 Olombangi Via Yehova via kapako onumbi Yembimbiliya yoku kuela “lika vu Ñala,” ale oku kuela lomunu una wa tiamẽlavo vetavo liavo okuti limuamue. (1 Va Korindo 7:39) Onumbi eyi ndaño okuti Yembimbiliya, yi kuatisa. Ndeci ocipama cunyamo 2010, losapi Journal of Marriage and Family ca popia okuti, “olohueli vina okuti via tiamẽla vetavo limuamue kuenda vi tava alongiso loviholo vimuamue,” vi pondola oku kuata olohuela via pama. c

 Handi vali, Olombangi Via Yehova ka vi vetiya omunu umue oku litepa lohueli yaye yina okuti Hambangiko ya Yehova. Embimbiliya liti: “Nda manji umue ulume o kuete ukãi okuti, hukuetavoko kuenje ukãi waco o tava oku kala laye, manji ka ka litepe laye; kuenda nda manji umue ukãi o kuete veyaye okuti hukuetavoko kuenje veyaco o tava oku kala laye, manji ukãi ka ka litepe laye.” (1 Va Korindo 7:12, 13) Olombangi Via Yehova via sumbila onumbi eyi.