Keteke 19 ya Kupemba yunyamo 2022, ocimunga co Conselho de Segurança das Nações Unidas ocimunga (Colondunguli vi Teyuila Olofeka vi li Kuete Omunga) ca yevelela eci ci pitahãla 75 kolombiali via velapo via popia okuti: “Voluali luosi mua kala ale ekambo liokulia lia kokiwa lefengi lio COVID-19 kuenda lepongoloko liolotembo, cilo ocitangi caco ci kasi oku livokiya okuti, tu ci tukula hati onjala voluali luosi omo liuyaki ko Ukrania.” Noke o revista The Economist ya popia hati: “Uyaki u kasi oku kokela oluali lua hongua koku lisandula kuonjala.” Embimbiliya lia popele ale okuti koloneke vilo kua laikele oku kala ekambo liokulia kuenda li tu sapuilavo ndomo tu tẽla oku liyaka locitangi caco.

•    Yesu wa popia hati: “Ofeka yi ka katukila ofeka kuenda usoma u katukila usoma, ku ka kala onjala.” (Mateo 24:7)

•    Embimbiliya kelivulu Liesituluilo, li popia eci catiamẽla kalume vakuãla vakuakuendela kolokavalu viocindekaise. Umue pokati kavo o lomboloka ovoyaki. Noke kua molẽha ukuavo okuti o lomboloka onjala, vepuluvi lina okuti kua laikele oku kala okulia kutito hakuo ku landisiwa londando yimue ya tĩla calua. “Nda mola okavalu ka tekãva kuenda u wa tumãlako o kuete ombalãsa peka. Nda yeva ondaka yimue . . . ya popia yiti: ‘Okilu yimosi yotiliku yi landiwa lodenariu yimosi kuenda olokilu vitatu viosevata, vi landiwavo lodenariu yimosi.’”—Esituluilo 6:5, 6.

 Ovitumasuku evi Viembimbiliya viatiamẽla kekambo liokulia, vi kasi oku tẽlisiwa kotembo yilo, yina Embimbiliya li tukula okuti, ‘oloneke via sulako.’ (2 Timoteo 3:1) Oco o kũlĩhe ovina vikuavo viatiamẽla “koloneke via sulako” kuenda kalume vakuãla vakuakuendela kolokavalu va tukuiwa kelivulu Liesituluilo, tala ovideo Oluali Lua Pongoloka Tunde Kunyamo 1914, loku tanga ocipama “Olokavalu Vikuãla Via Tukuiwa Kelivulu Liesituluilo—Vi Lomboloka Nye?”

•    Vembimbiliya mu sangiwa olonumbi vi tu kuatisa oku liyaka lovitangi, oku kongelamo elivokiyo liondando yovikulia, ale ekambo liovikulia. Tala vimue pokati kolonumbi viaco vocipama “Como viver com menos dinheiro?” (Tu Litekula Ndati Lolombongo Vitito?)

•    Embimbiliya li tu ĩhavo elavoko liokuti, ekalo li ka kala liwa. Olio li likuminya okuti, eteke limue “ku ka kala olomema vialua kilu lieve” kuenda omanu vosi va ka kuata okulia ku sukiliwa. (Olosamo 72:16) Oco o lilongise ovina vikuavo viatiamẽla kelavoko Embimbiliya li tu ĩha lio kovaso yoloneke kuenda esunga lieci tu kolelela kueci olio li popia, tanga ocipama “O Pondola Oku Kolela Kekalo Liwa Lio Kovaso Yoloneke.”