Esuvu, ungangala u tunda kesuvu, ungangala omo lioku litepa kuakova kuenda uyaki, a siata oku tukuiwa calua vasapulo.

•   “Omo liuyaki u kasi pokati ka va Isareli lo Gaza kuenda vakuakulinga ombuanja, asapulo esuvu a li vokiya calua vovingungu viasapulo.”—The New York Times, 15 ya Kuvala, 2023.

•   Tunde keteke 7 ya Mbalavipembe, esuvu, esapulo liesuvu kuenda ungangala omo liesuvu, via livokiya calua voluali.”—Dennis Francis, Usongui Wolohongele wolo Nações Unidas, 3 ya Kuvala 2023.

 Asapulo atiamẽla kesuvu, ungangala kuenda uyaki, havinako viokaliye. Ocili okuti, Embimbiliya li tukula vana okuti kosimbu, “[va enda oku] lepika elimi liavo ndosipata” loku vetiya ovoyaki kuenda ungangala. (Osamo 64:3; 120:7; 140:1) Pole Embimbiliya li lombolola okuti, ovina tu lete koloneke vilo li kuete elomboloko limue.

 Embimbiliya li lombolola ovina vivali vi lekisa esunga lieci esuvu lialuila koloneke vilo.

1.  1. Olio lia tukula otembo yimue okuti “ocisola comanu valua ci ka pola.” (Mateo 24:12) Omanu ka va laikele vali oku li sola pokati pole, va laikele oku lekisa ovituwa vi koka oku li suvuka.—2 Timoteo 3:1-5.

2.  2. Oku livokiya kuesuvu koloneke vilo, ku situlula elikolisilo lia Satana Eliapu lioku yapuisa omanu. Embimbiliya li popia okuti, “oluali luosi lu kasi povaka ondingaĩvi.”—1 Yoano 5:19; Esituluilo 12:9, 12.

 Pole, Embimbiliya li sitululavo okuti, Suku ndopo o ka malako ovina vi koka esuvu. Handi vali, eye o ka malako ohali ya siata oku kokiwa omo liesuvu. Embimbiliya li likuminya ndoco:

•   Suku “o ka puenya asuẽlẽla osi vovaso avo, oku fa ka ku ka kalako vali, ndaño oku lila loku liyula levalo ka vi ka kalako vali. Ovina viatete via pita.”—Esituluilo 21:4.