Pokati komanu vavali oco pa kale ukamba uwa, va sukila oku sapela. Cimuamue haico, Suku o tu laleka oku sapela laye, poku lekisa onjila yi tu kuatisa oku linga ukamba laye. Eye wa popia hati: “Kotembo yaco vu mbilikiya; wiyi oku likutilila kokuange, kuenje ndu yevi.” (Yeremiya 29:12) Eci o vangula la Suku, o ka ‘amela kokuaye kuenda eye amela kokuove.’ (Tiago 4:8) Embimbiliya li tu sapuila okuti: “Yehova o kasi ocipepi la vosi vo vilikiya.” (Osamo 145:18) Osimbu tu amamako oku li kutilila kokuaye, ukamba wetu laye u pamisiwa.

Yesu wa popia hati: “Helie pokati kene nda omõlaye u pinga ombolo eye u wiha ewe? Pamue nda u pinga olusi eye u wiha onyoha? Oco, nda ene . . . wa kũlĩhi oku eca oviali viwa komãla vene, Isiene o kasi kilu hẽ, ka velipo oku avela ava vo pinga ovina viwa?” (Mateo 7:9-11) Suku oku laleka oku likutilila momo ‘eye oku lava’ kuenda o yongola oku ku kuatisa. (1 Petulu 5:7) Eye oku laleka oco u sapuile ovitangi viove. Embimbiliya li tu sapuila okuti: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene.”—Va Filipoi 4:6.

Vana va lilongisa catiamẽla ketimba liomunu va siata oku limbuka okuti, omanu valua, va kuete onjongole yoku likutilila. Ndaño muẽle vana ka va tava okuti kuli Suku, va kongeliwavo vetendelo liaco. a Eci ci lekisa okuti, omanu va lulikiwa lesukila lioku yeva ondaka ya Suku. Yesu wa popia okuti: “Ava va yeva ondaka ya Suku kuenje va yi pokola ovo va sumũlũha.” (Luka 11:28) Onjila yimue yi tu kuatisa oku tẽlisa esukila liaco, oku vangula la Suku vapuluvi osi.

Nda tua tava kelaleko lia Suku lioku likutilila kokuaye, tu kuatisiwa ndati?